Last updated on May 21st, 2026 at 12:41 pm
ಉಬಾರ್, ಮೇ. 21: ಬೋರಿ ದೊಂಕ್ದ್ ಗಡಿಕುಲಾದಿತ್ತಿನ ಆಂಜೊವು ಮರ್ದ್ ಪಲಿಪಂದೆ ತೀರ್ದಿನ ನಡಕೆಗ್ ಸಂಬಂಧಿತ್ದ್ ಉಬಾರ್ ಆಸ್ಪತ್ರೆದ ಡಾಕ್ಟ್ರ್ ನಾಮಾಸ್ಡ್ ಮರ್ದ್ ಮಲ್ತ್ದೆರ್ ಪನ್ದ್ ಆರೋಪ ಮಲ್ತ್ದ್ ತೀರ್ದಿನಾರೆನ ಇಲ್ಲದಕುಲು ಬೋಲ್ತೇರ್ ಪೊಲೀಸೆರೆಡ ಒಯಿಲ್ ಬರೆಪಾದಿತ್ತ್ದ್ ಪ್ರಕರಣ ದಾಕಲಾತ್ಂಡ್.
ಬೋಲ್ತೇರ್ ತಾಲೂಕ್ದ ಗೇರುಕಟ್ಟೆ ನಿವಾಸಿ ಮೊಹಮ್ಮದ್ ಶರೀಫ್ (35) ತೀರ್ದಿನಾರ್.
ಮೇ 14ತಾನಿ ದೂರುದಾರೆರೆನ ಮೆಗ್ಯೆ ಮಹಮ್ಮದ್ ಶರೀಫ್ ಪಿ. ಪನ್ಪಿನಾರೆಗ್, ಇಲ್ಲದನೇ ಬೋರಿ ದೊಂಕ್ದ್ ಗಡಿಕುಲಾದಿತ್ತ. ಆರೆನ್ ಮರ್ದ್ಗ್ ಉಬಾರ್ದ ಪ್ರೈವೇಟ್ ಆಸ್ಪತ್ರೆಗ್ ದಾಕಲ್ತ್ದೆರ್. ಆಸ್ಪತ್ರೆದ ಡಾಕ್ಟರ್ ನಾಮಾಸ್ಡ್ ಮರ್ದ್ ಮಲ್ತಿನೆರ್ದಾವರ ಮಹಮ್ಮದ್ ಶರೀಫ್ರೆನ ಮೈಸರಿ ಬೊಕಲಾ ತೆಟ್ಟ್ದಿತ್ತ್ದ್, ಆರೆನ್ ಮೇ 16 ತಾನಿ ಎಚ್ಚಿಗೆ ಮರ್ದ್ಗ್ ಕುಡ್ಲದ ಆಸ್ಪತ್ರೆಗ್ ದಾಕಲ್ತ್ದ್ ಮರ್ದ್ ಮಲ್ತ್ಂಡಲಾ, ಮರ್ದ್ ಪಲಿಪಂದೆ ಮಹಮ್ಮದ್ ಶರೀಫ್ ಮೇ 20 ದಾನಿ ತೀರ್ದೆರ್ ಪನ್ದ್ ತೀರ್ದಿನಾರೆನ ಪಲಯೆ ಗೇರುಕಟ್ಟೆ ನಿವಾಸಿ ನಾಸಿರುದ್ದೀನ್.ಪಿ. ಬಿನ್ ಸೂಫಿ ಬ್ಯಾರಿ ಪನ್ಪಿನಾರ್ ಬೋಲ್ತೇರ್ ಪೊಲೀಸ್ ಸ್ಟೇಶನ್ಡ್ ಒಯಿಲ್ ಬರೆಪಾದೆರ್.
ಒಯಿಲ್ದ ಪ್ರಕಾರ ಬೋಲ್ತೇರ್ ಪೊಲೀಸ್ ಸ್ಟೇಶನ್ಡ್ ಯು.ಡಿ.ಆರ್ : 28/2026, ಕಲಂ: 194(3) (iv) ಬಿ.ಎನ್.ಎಸ್,ಎಸ್ 2023 ದಂಚ ಪ್ರಕರಣ ದಾಕಲ್ತೊಂದು ಜಡ್ತೆ ಮಲ್ತೊಂದುಲ್ಲೆರ್.
ಈ ಪ್ರಕರಣೊಡು ಡಾಕ್ಟ್ರೆನ ನಾಮಾಸ್/ಗೋಸ್ಮರಿದ ಆರೋಪನ್ ಪರಿಶೀಲನೆ ಮಲ್ತ್ದ್ ವರದಿ ಕೊರ್ಯೆರ ಬೋಡಾದ್, ವೈದ್ಯಕೀಯ ಕೂಟೊನು ಉಂಡು ಮಲ್ಪೆರೆ ಸಂಬಂಧಿತಿನ ಇಲಾಖೆದೊಟ್ಟುಗು ಪತ್ರವ್ಯವಹಾರ ನಡತಿತ್ತ್ದ್, ವರದಿ ಬತ್ತಿನೇ ಬೋಡಾಪಿನ ಕಾನೂನು ಕ್ರಮ ಗೆತೊನುವ ಪನ್ದ್ ಜಿಲ್ಲಾ ಪೊಲೀಸ್ ವರಿಷ್ಠಾಧಿಕಾರಿ ಒಲವು ಕೊರ್ತೆರ್.