Last updated on May 21st, 2026 at 01:33 pm
ಆಸಿಫಾಬಾದ್, ಮೇ 21: ಮೊಬೈಲ್ ತೂಪುನ ಬುಡ್ದು ಮೀಲ ಪನ್ದ್ ಇಲ್ಲದಕುಲು ಜೋರು ಮಲ್ತಿನೆಕ್ 17 ವರ್ಸ ಪ್ರಾಯೊದ ಪೊಣ್ಣು ಗೂವೆಲ್ಗ್ ಲಾಗಿದ್ ಆತ್ಮಹತ್ಯೆ ಮಲ್ತೊನರೆ ತೂತಿನ ನಡಕೆ ತೆಲಂಗಾಣದ ಆಸಿಫಾಬಾದ್ದ ಸಂದೀಪ್ ನಗರೊಡು ನಡತ್ದ್ಂಡ್. ಗೂವೆಲ್ಗ್ ಲಾಗಿದಿನ, ಸ್ವರ್ಣಲತಾ ಬೊಕ್ಕ ಪೋಚಿರಾಮ್ ದಂಪತಿಲೆನ 17 ವರ್ಸೊದ ಮಗಲ್ ಸಾತ್ವಿಕಾ ಇತ್ತೆ ಫಸ್ಟ್ ಪಿಯುಸಿ ಆದ್ ನನ ಸೆಕೆಂಡ್ ಪಿಯುಸಿ ಪೋಪುನಾಲ್.
ಬುಧವಾರದಾನಿ ಸಾತ್ವಿಕಾ ಇಲ್ಲಡ್ ಮೀಯಂದೆ ಗಂಟೆಗಟ್ಲೆ ಮೊಬೈಲ್ ಫೋನ್ ತೂವೊಂದು ಕುಲ್ಲುದಿತ್ತಲ್. ಉಂದೆನ್ ತೂದು ಇಲ್ಲದಕುಲು ಆಲೆಗ್ ಜೋರು ಮಲ್ತ್ದ್, ಬೇಗ ಮೀದ್ ಬಲ ಪನ್ದ್ ಪನ್ತೆರ್. ಉಂದೆರ್ದಾವರ ಬೆಸರ್ ಬೊಕ್ಕ ಪಿಸ್ರಾಯಿನ ಪೊಣ್ಣು, ಇಲ್ಲರ್ದ್ ಪಿದಯಿ ಬಲ್ತ್ದ್ ಸಾದಿಬರಿಟಿತ್ತಿನ ಗೂವೆಲ್ಗ್ ಲಾಗಿದಲ್.
ಪಿಸ್ರ್ಡ್ ಗೂವೆಲ್ಗ್ ಲಾಗಿನ ಪೊಣ್ಣಗ್ ನೀರ್ಡ್ ಮುರ್ಕೊಂದಿತ್ತಿಲೆಕನೆ ಪೋಡಿಗೆ ಆತ್ಂಡ್. ಆಲ್ ಗೂವೆಲ್ದ ನೀರ್ಡ್ ಪೊರ್ಮ್ಬೊಂದು ಜೋರು ಕಲ್ಕೆರ ಪತ್ತ್ದಲ್. ಪೊಣ್ಣನ ಬುಲಿಪು ಕೇನ್ದ್ ಬಲ್ತೊಂದು ಬತ್ತಿನ ಕಾಲೋನಿದಕುಲು ಅಪಗನೇ ಪೊಲೀಸೆರೆಗ್ ಒಲವು ಕೊರ್ತೆರ್.
ಒಲವು ತಿಕ್ಕಿನೇ ಎಸ್ಎಚ್ಒ (SHO) ಬಾಲಾಜಿ ವರಪ್ರಸಾದ್ ಮೆರೆನ ಮುತಾಲಿಕೆದ ಪೊಲೀಸ್ ಕೂಟ ಅಗ್ನಿಶಾಮಕ ದಳೊತ ಒಟ್ಟುಗು ಅಡೆಗ್ ಬತ್ತ್ದೆರ್. ಅಗ್ನಿಶಾಮಕ ಸಿಬ್ಬಂದಿಲಾಯಿನ ನರೇಶ್, ರಾಮು ಬೊಕ್ಕ ಡ್ರೈವರ್ ಪ್ರವೀಣ್ ಕುಮಾರ್ ಮೊಕಲು ಬಲ್ಲ್ ಪತೊಂದು ಗೂವೆಲ್ಗ್ ಜತ್ತ್ದೆರ್. ಪೊಣ್ಣಗ್ ಲೈಫ್ ಜಾಕೆಟ್ ಪಾಡ್ಪಾದ್, ಆಲೆನ್ ಬಾರೀ ಜಾಗೃತೆಡ್ ಗೂವೆಲ್ರ್ದ್ ಮಿತ್ತ್ ಲೆತೊಂದು ಬತ್ತ್ದೆರ್.
ಪೊರ್ತುಡು ಬತ್ತ್ದ್ ಪೊಣ್ಣನ ಜೂವ ಕಾತಿನ ಪೊಲೀಸೆರ್ ಬೊಕ್ಕ ಅಗ್ನಿಶಾಮಕ ಸಿಬ್ಬಂದಿಲೆನ ಬೇಲೆನ್ ಉನ್ನತ ಅಧಿಕಾರಿಲು ಬೊಕ್ಕ ಸಾರ್ವಜನಿಕೆರ್ ಪುಗರ್ದೆರ್. ಗೂವೆಲ್ಗ್ ಲಾಗಿದಿನ ಬರಸ್ಗ್ ಪೊಣ್ಣನ ಕಾರ್ಗ್ ಕಿಞ್ಞ ಕಿಞ್ಞ ಗಡಿಕುಲಾದಿತ್ತ್ದ್, ಮರ್ದ್ ಮಲ್ತೊಂದುಲ್ಲೆರ್. ಈತ್ ಎಲ್ಯ ವಿಷಯೊಗು ಜೂವ ಬುಡ್ಯೆರೆ ಪೋತಿನ ಪೊಣ್ಣಗ್ ಪೊಲೀಸೆರ್ ಬುದ್ಧಿ ಪಾತೆರ ಪನ್ಡ್ದ್ ಕೌನ್ಸೆಲಿಂಗ್ (Counseling) ಮಲ್ಪಾದೆರ್.