Last updated on May 23rd, 2026 at 08:40 am
ದೆಲ್ಲಿ, ಮೇ 23: ಪಶ್ಚಿಮ ಏಷ್ಯಾ ಸಂಘರ್ಷೊರ್ದಾವರ ಜಾಗತಿಕ ಮಾರುಕಟ್ಟೆಡ್ ಕಚ್ಚಾ ತೈಲೊದ ಬಿಲೆ ಮಿತ್ತ್ ಮಿತ್ತ್ ಪೋವೊಂದುಪ್ಪುನ ಬೆರಿಟೇ, ದೇಶೀಯ ಮಾರುಕಟ್ಟೆಡ್ ತೈಲ ಕಂಪೆನಿಲು ಗ್ರಾಹಕೆರೆಗ್ ಬೆರಿಬೆರಿ ಬಿಲೆ ಏರ್ತ್ದ್ ಸುಡಿ ದೀವೊಂದುಲ್ಲ. ಕರಿನ ಪತ್ತ್ ದಿನೊಟು ಇತ್ತೆ ಮೂಜನೇ ಸರ್ತಿ ಪೆಟ್ರೋಲ್ ಬೊಕ್ಕ ಡೀಸೆಲ್ದ ರೇಟ್ ಎಚ್ಚ ಮಲ್ತಿತ್ತ್ದ್, ಜನಸಾಮಾನ್ಯೆರೆನ ಬಜೆಟ್ ಅಲಕ್ಕ ಅಡಿಮೇಲ್ ಆತ್ಂಡ್.
ಶನಿವಾರ ತೈಲ ಕಂಪೆನಿಲೆನ ನಿರ್ಧಾರೊದ ಪ್ರಕಾರ ಪೆಟ್ರೋಲ್ ಬಿಲೆ ಲೀಟರ್ಗ್ 87 ಪೈಸೆ ಬೊಕ್ಕ ಡೀಸೆಲ್ ಬಿಲೆ ಲೀಟರ್ಗ್ 91 ಪೈಸೆ ಎಚ್ಚ ಆತ್ಂಡ್.
ಮೇ ತಿಂಗೊಲುಡು ಮೂಜನೇ ಸರ್ತಿ ಏರ್ತೆಲ್: ಇಂಚಿಪೊದ ದಿನೊಟು ತೈಲ ಕಂಪೆನಿಲು ಗ್ರಾಹಕೆರೆ ಮಿತ್ತ್ ಬೆರಿಬೆರಿ ಇಂಧನ ಪುದೆ ತುಂಬವೊಂದುಲ್ಲ. ಈ ವಾರೊದ ಸುರುಟೇ ಲೀಟರ್ ಇಂಧನೊಗು 90 ಪೈಸೆ ಎಚ್ಚ ಆದಿತ್ತ್ಂಡ್. ಅವೆಕ್ಲಾ ದುಂಬು ತೈಲ ಮಾರುಕಟ್ಟೆ ಕಂಪೆನಿಲು (OMCs) ಪ್ರತಿ ಲೀಟರ್ಗ್ ಒರಕ್ ಸುಮಾರ್ 3 ರೂ.ದಾತ್ ರೇಟ್ ಎಚ್ಚ ಮಲ್ತ್ದ್ ದೀರ್ಘಾವಧಿದ ಬಿಲೆ ಸ್ಥಿರತೆಗ್ ಬ್ರೇಕ್ ಪಾಡ್ದಿತ್ತ.
ಮಧ್ಯಪ್ರಾಚ್ಯೊಡು ಉಪ್ಪುನ ಕೊಲಲೊದ ವಾತಾವರಣ ಬೊಕ್ಕ ಯುಎಸ್-ಇರಾನ್ ನಡುತ ಶಾಂತಿ ಪಾತೆರಕತೆತ ಅನಿಶ್ಚಿತತೆನೇ ಈ ಬಿಲೆ ಏರ್ತೆಲ್ಗ್ ಮಲ್ಲ ನೆವನ. ಉಂದೆರ್ದಾವರ ಅಂತರರಾಷ್ಟ್ರೀಯ ಮಾರುಕಟ್ಟೆಡ್ ಕಚ್ಚಾ ತೈಲೊದ ಬಿಲೆ ಬಾರೀ ಎಚ್ಚಿ ಕಮ್ಮಿ ಆವೊಂದುಂಡು. ಶುಕ್ರವಾರ ಬ್ರೆಂಟ್ ಕಚ್ಚಾ ತೈಲೊದ ಬಿಲೆ ಬ್ಯಾರೆಲ್ಗ್ 104 ಡಾಲರ್ರ್ದ್ (USD) ಎಚ್ಚ ಆದಿತ್ತ್ಂಡ, ಯುಎಸ್ ವೆಸ್ಟ್ ಟೆಕ್ಸಾಸ್ ಇಂಟರ್ಮೀಡಿಯೇಟ್ ಕಚ್ಚಾ ತೈಲ ಬ್ಯಾರೆಲ್ಗ್ 97 ಡಾಲರ್ದ ಅಂದಾಜಿಗ್ ವೈವಾಟ್ ಮಲ್ದ್ಂಡ್. ಜಾಗತಿಕ ಸಪ್ಲೈದ ಮಂಡೆಬೆಚ್ಚದ ನಡುಟು ಒಂಜಿ ನಿಲವುಡು ಕಚ್ಚಾ ತೈಲೊದ ಬಿಲೆ ಬ್ಯಾರೆಲ್ಗ್ 111 ಡಾಲರ್ಗ್ ಎತ್ತ್ದಿತ್ತ್ಂಡ್.
ಬೆರಿಬೆರಿ ಡೀಸೆಲ್ ರೇಟ್ ಎಚ್ಚ ಮಲ್ದಿನೆರ್ದಾವರ ಲಾರಿ, ಟೆಂಪೋ ಸೇರ್ದ್ ಕಮರ್ಷಿಯಲ್ ಟ್ರಾನ್ಸ್ಪೋರ್ಟ್ದ ಕರ್ಚಿ ಎಚ್ಚ ಆವರೆ ಇತ್ತ್ದ್, ಇಂದು ನನದ ದಿನೊಟು ನಟ್ಟಿಕಾಯಿ, ಪೇರ್ ಬೊಕ್ಕ ಬೇತೆ ಅತ್ಯಗತ್ಯ ಸೊತ್ತುಲೆನ ಬಿಲೆ ಏರ್ಯೆರ ನೆವನ ಆಪುಂಡು ಪನ್ದ್ ಆರ್ಥಿಕ ತಜ್ಞೆರ್ ಪನ್ತೆರ್.