Last updated on May 29th, 2026 at 11:27 am
ಕುಡ್ಲ, ಮೇ. 29: ರಾಜ್ಯ ರಾಜಕೀಯೊಡು ಬಾರೀ ಮಲ್ಲ ಪಗತೆಲಾವೊಂದುಪ್ಪುನ ಪೊರ್ತುಡು ಸಚಿವ ಸಂಪುಟೊಗ್ಲಾ ಬೇಗೊಡು ಸರ್ಜರಿ ಆಪುಂಡು. ಪೊಸ ಸಚಿವ ಸಂಪುಟೊಡು ಆಂಡಲಾ ತುಳುನಾಡ ಜಿಲ್ಲೆಲೆಗ್ ಮುಲ್ಪದ ಬೇನೆ-ಬೆಸರ್, ಸಂಸ್ಕೃತಿನ್ ಅರ್ಥ ಮಲ್ತೊನುನ, ಮುಲ್ಪದ ಭಾಷೆ ಸಂಸ್ಕೃತಿಗ್ ಒತ್ತು ಕೊರ್ಪುನ ಉಸ್ತುವಾರಿಲು ತಿಕ್ಕಡ್ ಪನ್ದ್ ಜನ ಕೇನೊಂದುಲ್ಲೆರ್.
ಸಿದ್ದರಾಮಯ್ಯೆರ್ ರಾಜಿನಾಮೆ ಕೊರ್ನನೇ ಇತ್ತೆ ಇತ್ತಿನ ಸಚಿವ ಸಂಪುಟೊದ ಅಸ್ತಿತ್ವ ಪೋಪುಂಡು. ಸಂಭಾವನೀಯ ಪೊಸ ಮುಖ್ಯಮಂತ್ರಿ ಡಿ. ಕೆ. ಶಿವಕುಮಾರ್ರೆನ ಮುತಾಲಿಕೆದ ಪೊಸ ಸಚಿವ ಸಂಪುಟ ಅಸ್ತಿತ್ವೊಗು ಬರ್ಪುಂಡು. ಈ ಪೊಸ ಸಚಿವ ಸಂಪುಟೊಡು ತುಳುನಾಡ್ದಕಲೆಗ್ ಜಾಗೆ ತಿಕ್ಕುಂಡಾ ಪನ್ದ್ ಕಾತ್ದ್ ತೂವೊಡಾತೆ.
ಕರ್ನಾಟಕೊಡು ಇಪ್ಪುನ ತುಳುನಾಡ್ದ ರಡ್ಡ್ ಜಿಲ್ಲೆಲೆಡ್ ಕಾಂಗ್ರೆಸ್ರ್ದ್ ಗೆಂದ್ದ್ ವಿಧಾನಸಭೆಟ್ ಇಪ್ಪುನಕುಲು ಕಾಲಿ ರಡ್ಡ್ ಜನ, ಸ್ಪೀಕರ್ ಆದುಪ್ಪುನ ಯು. ಟಿ. ಖಾದರ್ ಬೊಕ್ಕ ಸುರುತ ಸರ್ತಿ ಶಾಸಕೆ ಆತಿನ ಅಶೋಕ್ ಕುಮಾರ್ ರೈಕುಲು. ವಿಧಾನ ಪರಿಷತ್ಡ್ಲಾ ಮಂಜುನಾಥ ಭಂಡಾರಿ ಬೊಕ್ಕ ಐವನ್ ಡಿಸೋಜಾ ರಡ್ಡೇ ಜನ. 300(225+75) ಟ್ ಕಾಲಿ 4 ಜನ!
ಅಶೋಕ್ ಕುಮಾರ್ ರೈಕುಲು ಎನರ್ಜೆಟಿಕ್ ಶಾಸಕೆ ಒಟ್ಟುಗು ಡಿ.ಕೆ.ಶಿ ನ ಆಪ್ತೆ ಪನ್ಪಿ ಲೆಕ್ಕೊಡು ಆರೆನ ಪುದರ್ ಸಚಿವೆರೆ ರೇಸ್ಡ್ ಕೇನ್ದ್ ಬರೊಂದುಂಡು. ಓಲ್ಲ ‘ಪೊಸಬೆ ನನೊರ ತೂಕ’ ಪನ್ಪಿ ಪಾತೆರ ಬತ್ತ್ಂಡ ರೈಕ್ಲೆನ ಪುದರ್ ಪಿರವು ಒರಿಪುನ ಸಾಧ್ಯತೆ ಉಂಡು.
ಪ್ರಭಾವಿ ನಾಯಕೆ ಕೆ. ಜೆ. ಜಾರ್ಜ್ ರಾಜ್ಯಸಭೆತಂಚಿ ದಿಟ್ಟಿ ದೀತೆರ್ಗೆ. ಅಂಚಾದ್ ಕ್ರೈಸ್ತ ಸಮುದಾಯೊರ್ದು ಐವನ್ ಡಿಸೋಜಾ ಮೆರೆಗ್ ಸಚಿವ ಸಂಪುಟೊಡು ಜಾಗೆ ತಿಕ್ಕುನ ಸಾಧ್ಯತೆ ಉಂಡು.
ಮಂಜುನಾಥ್ ಭಂಡಾರ್ಲುಲಾ ರಾಷ್ಟ್ರಮಟ್ಟೊದ ನಾಯಕೆರೆಡ ಎಡ್ಡೆಪುಡು ಇತ್ತಿನಾರ್, ಅಂಚಾದ್ ಆರ್ಲಾ ಸಚಿವ ಸ್ಥಾನೊಡ ಆಕಾಂಕ್ಷಿ.
ಅನುಭವಿ ನಾಯಕೆ, ಸ್ಪೀಕರ್ ಖಾದರ್ರೆನ ಪುದರ್ ಸಚಿವ ಸಂಪುಟೊಡು ಬರ್ಪುನ ಮಲ್ಲ ಸಾಧ್ಯತೆ ಉಂಡು. ಆಂಡ ಖಾದರಾಕ ಎಂಕ್ ಐತ ಮಂಡೆಬೆಚ್ಚ ಇಜ್ಜಿ, ಎನ್ನ ಕ್ಷೇತ್ರೊದ ಅಭಿವೃದ್ಧಿಗ್ ಆದ್ಯತೆ ಕೊರ್ಪೆ, ತುಳುನು ಅಧಿಕೃತ ಭಾಷೆ ಮಲ್ಪುನಂಚಿ ಗೇನ ಕೊರ್ಪೆ ಪನ್ದ್ ಪನ್ತೆರ್ಗೆ.
ಇತ್ತೆ ಇಪ್ಪುನ ನಾಲ್ ಪ್ರಭಾವಿ ಪುದರ್ಲ್ಲಾ ಮಂಗಳೂರು ಜಿಲ್ಲೆದಕುಲು, ಒಡಿಪು ಜಿಲ್ಲೆರ್ದ್ ವಿಧಾನ ಪರಿಷತ್ಡ್ಲಾ ಏರ್ಲಾ ಇಜ್ಜೆರ್, ವಿಧಾನಸಭೆಟ್ಲಾ ಏರ್ಲಾ ಇಜ್ಜೆರ್. ಅಂಚಾದ್ ಒಡಿಪುಗು ತುಳುನಾಡ್ದಕುಲು ಸಚಿವೆರಾದ್ ತಿಕ್ಕುನ ಬಾರೀ ಡೌಟ್. ಒಂಜಾ ದುಂಬುದ ಸಚಿವೆರೇ ಉಸ್ತುವಾರಿ ಆದ್ ದುಂಬರಿಪುನ ಸಾಧ್ಯತೆ ಉಂಡು.