Last updated on May 30th, 2026 at 04:56 pm
ಬೆಂಗಳೂರ್, ಮೇ 30: ಬೀದರ್ದ ಬ್ರಿಮ್ಸ್ ಆಸ್ಪತ್ರೆಡ್ ತೀರ್ದಿನ ಪಂಜೊವುಲೆನ ಉರ್ಬುಲಿ ಫೋಟೋ ಕಲೆವೊಂದಿತ್ತಿನ ಅಮಾನವೀಯ ನಡಕೆ ನಡತಿತ್ತ್ದ್, ಈ ನಡಕೆಗ್ ರಾಜ್ಯ ಮಹಿಳಾ ಆಯೋಗ ಪ್ರತಿಕ್ರಿಯೆ ಕೊರ್ತುಂಡು.
ನಡಕೆಗ್ ಸಂಬಂಧಿತ್ದ್ ಪತ್ರಿಕಾ ಪ್ರಕಟಣೆ ಪಿದಡ್ಪಾದಿತ್ತ್ದ್, ಸಂಬಂಧಿತಿನ ಅಧಿಕಾರಿಲು ವರದಿ ಕೊರೊಡು ಪನ್ದ್ ಆರೋಗ್ಯ ಇಲಾಖೆಗ್ ಪನ್ತ್ನ್ಡ್. ಬೀದರ್ ಜಿಲ್ಲೆದ ಬ್ರಿಮ್ಸ್ ಆಸ್ಪತ್ರೆದ ಶವಾಗಾರೊಡು ಅಟೆಂಡರ್ ಮುನೀರ್ ಅಹಮದ್ ಪನ್ಪಿನಾಯೆ ಸೈದಿನ ಪೊಂಜೊವುಲೆನ ಉರ್ಬುಲಿ ಫೋಟೋ ಕಲೆದ್ ವಿಕೃತಿ ತೋಜಾದಿನ ಅಮಾನುಷ ಕೃತ್ಯೊದ ಬಗೆಟ್ ಸಾಮಾಜಿಕ ಬಲೆತ್ತಾನೊಡು ವರದಿ ಆತ್ಂಡ್. ಈ ಪ್ರಕರಣೊದ ಬಗೆಟ್ ನಿಯಮಾನುಸಾರ ಪರಿಶೀಲನೆ ಮಲ್ತ್ದ್ ಮುನೀರ್ ಅಹಮದ್ನ ಮಿತ್ತ್ ಬೋಡಾಪಿನ ಕ್ರಮ ಗೆತೊಂದು, ವರದಿ ಕೊರ್ಯೆರ ಸಂಬಂಧಿತಿನ ಅಧಿಕಾರಿಲೆಗ್ ಸಮ ನಿರ್ದೇಶನ ಕೊರ್ಯೆರ ಕೇನ್ದ ಪನ್ದ್ ರಾಜ್ಯ ಮಹಿಳಾ ಆಯೋಗೊದ ಕಾರ್ಯದರ್ಶಿ ಪ್ರಕಟಣೆಡ್ ತೆರಿಪಾದೆರ್.
ಪಿಎಂಇ ಮಲ್ಪುನ ಪೊರ್ತುಡು ಅನುಮತಿ ಇಜ್ಜಂದೆ ತನ್ನ ಮೊಬೈಲ್ಡ್ ಮುನ್ನಿರ್ ಸೈದಿನ ಪೊಂಜೊವುಲೆನ ಪುನೊತ ಮಿತ್ತ್ದ ಕುಂಟು ದೆತ್ತ್ದ್ ಫೋಟೋ ಕಲೆವೊಂದಿತ್ತೆಗೆ. ಪೊಂಜೊವುಲೆನ ಉರ್ಬುಲಿ ಫೋಟೋ ಕಲೆದ್ ಮೊಬೈಲ್ಡ್ ದೀವೊಂದಿತ್ತೆಗೆ ಆರೋಪಿ ಮುನೀರ್.
ಈ ಚಲ್ಲ್ ಬೇಲೆರ್ದಾವರ ಪೊಂಜೊವುಲೆನ ಘನತೆ, ಕುಟುಂಬಸ್ಥೆರೆನ ಗೌರವ, ವೈದ್ಯಕೀಯ ಗೌಪ್ಯತೆಗ್ ತೆಟ್ಟಾತ್ಂಡ್. ಇತ್ತೆ ಆರೋಪಿ ಮುನೀರ್ನ ಮಿತ್ತ್ ನ್ಯೂ ಟೌನ್ ಪೊಲೀಸ್ ಸ್ಟೇಶನ್ಡ್ ಬಿಎನ್ಎಸ್ ಸೆಕ್ಷನ್ 301, 62 ಅಡಿಟ್ ಪ್ರಕರಣ ದಾಕಲಾತ್ಂಡ್.