Last updated on June 2nd, 2026 at 08:12 am
ಬೋಲ್ತೇರ್, ಜೂ. 02: ತಾಲೂಕ್ದ ಗುರುವಾಯನಕೆರೆದ ಅಲಾದಿಕೊಟ್ಟಿಗೆ ಪನ್ಪಿನಲ್ಪ ಜವನನೊರಿಯಗ್ ಸಮ ಆಕ್ದ್ ಕೆರ್ತಿನ ನಡಕೆ ಜೂನ್ 1 ತಾನಿ ತೆರಿದ್ ಬೈದ್ಂಡ್.
ಬಂಟ್ವಾಳ ತಾಲೂಕ್ದ ಪೆರ್ನೆ ನಿವಾಸಿ ಯತೀಶೆ (33) ತೀರ್ದಿನಾರ್. ಪ್ರಕರಣೊಗು ಸಂಬಂಧಿತ್ದ್ ಬೋಲ್ತೇರ್ ಪೊಲೀಸೆರ್ ಮೂವೆರ್ ಆರೋಪಿಲೆನ್ ಕೈದ್ ಮಲ್ತ್ದ್ ವಿಚಾರಣೆ ಮಲ್ತೊಂದುಲ್ಲೆರ್.
ತೀರ್ದಿನ ಯತೀಶೆರೆನ ಪಲಯೆ ನಿತಿನ್ ಮೆರೆಗ್ ಜೂನ್ 1 ತ ಕಾಂಡೆ ವಾಟ್ಸಾಪ್ ಡ್ ಅಪರಿಚಿತ ಪುನೊತ ಫೋಟೋ ಒಂಜಿ ಬತ್ತಿತ್ತ್ಂಡ್. ಫೋಟೋ ಪರಿಶೀಲನೆ ಮಲ್ಪುನಗ ಅವು ಮೆಗ್ಯೆ ಯತೀಶೆ ಪನ್ದ್ ತೆರಿದ್ ಬೈದ್ಂಡ್. ಅಪಗನೇ ನಿತಿನ್ ಮೇರ್ ಆ ಜಾಗೆಗ್ ಪೋದು, ಅಲ್ಪದ ಸಿಸಿಟಿವಿ (CCTV) ಫೋಟೇಜ್ ತೂತೆರ್.
ಅವೆಟ್ ಮೂಜಿ ಜನ ಕೂಡೊಂದು ಯತೀಶೆರೆಗ್ ತಾರಾಮರ ಆಕೊಂದುಪ್ಪುನ ತೋಜಿದ್ ಬೈದ್ಂಡ್. ಆರೋಪಿಲು ಭೀಕರವಾದ್ ಆಕ್ದಿನೆರ್ದಾವರ ಯತೀಶೆರ್ ಅಲ್ಪನೇ ತೀರ್ದೆರ್ ಪನ್ದ್ ಒಯಿಲ್ಡ್ ಬರೆಪಾದೆರ್.
ಸಿಸಿಟಿವಿ ದೃಶ್ಯಾವಳಿಲೆನ ಆಧಾರೊಡು ಪೊಲೀಸೆರ್ ಮೂವೆರ್ ಆರೋಪಿನ್ ಉಲಕೈ ಮಲ್ತೊಂದೆರ್. ಯಶೋಧರ ಮಿತ್ತಬಾಕಿಲ್, ಬೋಲ್ತೇರ್, ಮೋಹನ್ ಚಾರ್ವಾಕ ಕಡಬ ಬೊಕ್ಕ ಇಬ್ರಾಹಿಂ ಪಡಂಗಡಿ ಕೈದಾತಿನಕುಲು.
ತೀರ್ದಿನಾರೆನ ಪಲಯೆ ನಿತಿನ್ ಮೇರ್ ಬರೆಪಾದಿನ ಒಯಿಲ್ದ ಪ್ರಕಾರ ಬೋಲ್ತೇರ್ ಪೊಲೀಸ್ ಸ್ಟೇಶನ್ಡ್ ಅಪರಾಧ ಸಂಖ್ಯೆ: 65/2026, ಬಿ.ಎನ್.ಎಸ್ (BNS) ಕಾಯ್ದೆದ ಕಲಂ 115(2), 103 ಬೊಕ್ಕ 3(5) ತ ಅಡಿಟ್ ಕೆರ್ತಿನ ಪ್ರಕರಣ ದಾಕಲಾತ್ಂಡ್. ಇತ್ತೆ ಆರೋಪಿಲೆನ ತೀವ್ರ ವಿಚಾರಣೆ ನಡತೊಂದಿತ್ತ್ದ್, ಕೆರ್ಯೆರ ಪತ್ತ ನೆವನ ದಾದ ಪನ್ದ್ ನನ ತೆರಿದ್ ಬರೊಡಾತೆ.