Last updated on June 2nd, 2026 at 04:03 pm
ದೆಲ್ಲಿ, ಜೂ. 02: ತಮಿಳುನಾಡ್ ಬಿಜೆಪಿದ ಪ್ರಮುಖ ನಾಯಕೆ ಕೆ. ಅಣ್ಣಾಮಲೈ ಇನಿ ಭಾರತೀಯ ಜನತಾ ಪಕ್ಷೊಗು ರಾಜೀನಾಮೆ ಕೊರ್ತೆರ್. ಕೆಲ ದಿನೊರ್ದಿಂಚಿ ಅಣ್ಣಾಮಲೈ ಬಿಜೆಪಿನ್ ಬುಡ್ದು ಪೊಸ ಪಕ್ಷ ಕಟ್ಟರೆ ಉಲ್ಲೆರ್ ಪನ್ಪಿ ಸುದ್ದಿಲು ತಿರ್ಗೊಂದೇ ಇತ್ತ. ಆಂಡ, ಈ ಬಗೆಟ್ ಅಣ್ಣಾಮಲೈ ಒವ್ವೇ ಒಲವು ಬುಡ್ದು ಕೊರ್ದಿಜ್ಜಂಡ್. ಇನಿ ದೆಲ್ಲಿಡ್ ಬಿಜೆಪಿ ರಾಷ್ಟ್ರಾಧ್ಯಕ್ಷೆ ನಿತಿನ್ ನಬಿನ್ ಮೆರೆನ್ ತಿಕ್ಕ್ದ್ ಅಣ್ಣಾಮಲೈ ಆರೆನ ರಾಜೀನಾಮೆದ ಓಲೆ ಸಂದಾದೆರ್.
ತಮಿಳುನಾಡ್ ರಾಜಕಾರಣೊಡು ಬಾರೀ ಪ್ರಭಾವಶಾಲಿ ಬೊಕ್ಕ ಆಕ್ರಮಣಕಾರಿ ನಾಯಕೆ ಪನ್ದೇ ಪುದರಾದಿತ್ತಿನ ಮಾಜಿ ಐಪಿಎಸ್ ಅಧಿಕಾರಿ ಕೆ. ಅಣ್ಣಾಮಲೈ ಮೇರ್ ಬಿಜೆಪಿಗ್ ಒರನ್ನೆ ರಾಜೀನಾಮೆ ಕೊರ್ತಿನ ರಾಜಕೀಯ ವಲಯೊಡು ಭಾರೀ ಚರ್ಚೆಗ್ ನೆವನ ಆತ್ಂಡ್. ದೆಲ್ಲಿಗ್ ಪೋತಿನ ಆರ್ ಪಕ್ಷೊದ ಉಸ್ತುವಾರಿ ಬೊಕ್ಕ ಪೆರಿಯ ನಾಯಕೆರಾಯಿನ ನಿತಿನ್ ನಬಿನ್ ರೆಗ್ ಆರೆನ ರಾಜೀನಾಮೆ ಓಲೆನ್ ಕೊರ್ತೆರ್. ತಮಿಳುನಾಡ್ಡ್ ಇಂಚಿಪ ನಡತಿನ ವಿಧಾನಸಭಾ ಚುನಾವಣೆದ ಫಲಿತಾಂಶೊಲು ಬೊಕ್ಕ ಬಿಜೆಪಿದ ಆಂತರಿಕ ಭಿನ್ನಾಭಿಪ್ರಾಯೊಲೆನ ಬೆರಿಟೇ ಈ ಬುಲೆಚ್ಚಿಲ್ ನಡತ್ದ್ಂಡ್.
ಮಾಜಿ ಐಪಿಎಸ್ ಅಧಿಕಾರಿ ಅಣ್ಣಾಮಲೈ ಆರೆನ ಈ ನಿರ್ಧಾರೊಗು ನೆವನ ದಾದ ಪನ್ದ್ ನನಲಾ ಒವ್ವೇ ಸ್ಪಷ್ಟನೆ ಕೊರ್ತಿಜೆರ್. ಆಂಡ, ರಾಜಕೀಯ ವಲಯೊಡು ಆರೆನ ಈ ನಿರ್ಧಾರೊಗು ಪಾಕ ವಿಶ್ಲೇಷಣೆ ನಡತೊಂದುಂಡು. ತಮಿಳುನಾಡ್ಡ್ ಬಿಜೆಪಿನ್ ಅಧಿಕಾರೊಗು ಕನಯೆರ ಅಣ್ಣಾಮಲೈ ಮೇರ್ ‘ಎನ್ ಮಣ್ಣ್, ಎನ್ ಮಕ್ಕಳ್’ ಪಾದಯಾತ್ರೆ ಸೇರ್ದ್ ಭಾರಿ ಪೊರ್ಮ್ಬಾಟ ಮಲ್ತಿತ್ತೆರ್. ಆಂಡ, ಇಂಚಿಪದ ಚುನಾವಣೆಡ್ ಬಿಜೆಪಿಗ್ ಎನ್ನಿನ ಫಲಿತಾಂಶ ಬರಂದಿನೆರ್ದಾವರ ಸೋಲ್ದ ನೈತಿಕ ಜವಾಬ್ದಾರಿ ಗೆತೊಂದು ಆರ್ ಈ ನಿರ್ಧಾರೊಗು ಬೈದೆರ್ ಪನ್ದ್ ಪನೊಂದುಲ್ಲೆರ್.