Last updated on June 10th, 2026 at 11:44 am
ಪುತ್ತೂರ್, ಜೂ. 10: ಐತಾರ ಬಲ್ನಾಡ್ ಗ್ರಾಮೊಡು ಶಿಲಾನ್ಯಾಸ ಕಾರ್ಯಕ್ರಮೊಗು ಪೋದಿತ್ತಿನ ಶಾಸಕೆ ಅಶೋಕ್ ರೈಕುಲು, ಸಾದಿ ನಡುಟು ಅಕಲೆನ ಬಂಙ ಪನ್ಡೊನರೆ ಬತ್ತಿನ ಪಂಜೊವುಲೆನ್ ಪಾತೆರ್ಪಾವೊಂದುಪ್ಪುನಗ ತೋಜಿನ ಒರ್ತಿ ಪ್ರಾಯೊದಾರೆನ ಇಲ್ಲಗ್ ಪೋದು, ಆರ್ ಕೇನ್ಡಿನ ಸಕಾಯೊನು ಒಂಜೇ ದಿನೊಟು ಮಲ್ತ್ ಕೊರ್ತೆರ್.
ಬಲ್ನಾಡ್ ನಿವಾಸಿ ಗಿರಿಜಾ ಪನ್ಪಿನ ಪ್ರಾಯೊದಾರ್ ಇಲ್ಲಡ್ ಒರ್ತಿಯೇ ಇಪ್ಪುನಾರ್. ಮಗೆ ಇತ್ತೆಂಡಲಾ ಇಲ್ಲಗ್ ಬರ್ಪುಜೆ ಪನ್ದ್ ಶಾಸಕೆರೆಡ ಬೆಸರ್ ಪಟ್ಟೊಂಡೆರ್. “ಯಾನ್ ಪುತ್ತೂರ್ದ ಶಾಸಕೆ ಅಶೋಕ್ ರೈ, ಈರೆಗ್ ದಾಯ್ತ ಬೋಡು” ಪನ್ದ್ ಕೇನ್ನಗ, “ಅಟಿಲ್ ಮಲ್ಪೆರ ಗ್ಯಾಸ್ ಇಜ್ಜಿ, ದಿಕ್ಕೆಲ್ ಇಜ್ಜಿ” ಪನ್ದ್ ಪನ್ಡೆರ್. ಅಪಗನೇ ಯಾನ್ ಕೊರ್ಪೆ ಪನ್ದ್ ಶಾಸಕೆರ್ ಪಾತೆರ ಕೊರ್ಯೆರ್.
ಕೊರ್ನ ಪಾತೆರದ ಲೆಕ ಮನದಾನಿಯೇ ಗ್ಯಾಸ್ ಸ್ಟವ್ ಬೊಕ್ಕ ಸಿಲಿಂಡರ್ನ್ ಗಿರಿಜಾ ಮೆರೆನ ಇಲ್ಲಗ್ ಎತ್ತಾಯಿನ ಶಾಸಕೆರ್, ಆರೇ ಸೂ ಪೊತ್ತಾದ್ ಉದಿಪನ ಮಲ್ತೆರ್. ಗ್ಯಾಸ್ ಸ್ಟವ್ ಗಲಸೆರೆ ತೆರಿಯೊಂದಿನ ಪ್ರಾಯೊದಾರೆಗ್ ಶಾಸಕೆರೇ ಎಂಚ ಪೊತ್ತಾವೊಡು ಪನ್ದ್ ಪನ್ಡ್ದ್ ಕೊರ್ಯೆರ್.
ಈ ಪೊರ್ತುಡು ಬ್ಲಾಕ್ ಕಾಂಗ್ರೆಸ್ ಅಧ್ಯಕ್ಷೆ ಕೃಷ್ಣಪ್ರಸಾದ್ ಆಳ್ವ, ಪುಡಾ ಸದಸ್ಯೆ ನಿಹಾಲ್ ಪಿ ಶೆಟ್ಟಿ, ಮುಖಂಡೆರಾಯಿನ ಶರೀಫ್ ಬಲ್ನಾಡ್, ರಾಮಣ್ಣ ಪಿಲಿಂಜ, ದಾಮೋದರ ಮುರ ಒತ್ತುಪಾಲ್ ಇತ್ತೆರ್.
“ಇನಿಕ್ಲಾ ನಮ್ಮ ನಡುಟು ಪಾಕ ಜನ ಬಡಪತ್ತ್ಡ್ ಉಲ್ಲೆರ್. ಬಂಙೊನು ಏರೆಡಲಾ ಪನ್ಡೊನುಜೆರ್. ಅಂಚಿನಕಲೆನ್ ನಾಡ್ದ್ ನಮ ಸಕಾಯ ಮಲ್ಪೊಡು. ಮಾತೆರ್ಲಾ ಕೂಡ್ದ್ ಮಲ್ತ್ಂಡ ಮಾತ್ರ ಕಣ್ಣನೀರ್ ಒಚ್ಚೊಲಿ” ಪನ್ದ್ ಶಾಸಕೆ ಅಶೋಕ್ ರೈಕುಲು ಪನ್ಡೆರ್.
“ಆರ್ ಶಾಸಕೆರ್ ಪನ್ದ್ ಎಂಕ್ ತೆರಿದಿಜ್ಜಂಡ್. ಗ್ಯಾಸ್ ಬೋಡೂಂದು ಪನ್ಡೆ, ಈತ್ ಬೇಗ ತಿಕ್ಕುಂಡು ಪನ್ದ್ ನಂಬುದಿಜ್ಜಂಡ್. ಕೊರ್ನ ಪಾತೆರದ ಲೆಕ ಶಾಸಕೃರ್ ನಡತೊಂದೆರ್. ಆರೆನಂಚಿನಕುಲು ಸಮಾಜೊಡು ಇಪ್ಪೊಡು” ಪನ್ದ್ ಫಲಾನುಭವಿ ಗಿರಿಜಾ ಸೊಲ್ಮೆ ಸಂದಾಯೆರ್.