Last updated on June 22nd, 2026 at 03:08 pm
ಕುಡ್ಲ, ಜೂ. 22: ತತ್ತ್ದ್ ಗೂವೆಲ್ಗ್ ಬೂರ್ದಿನ ಒಂಜಿ ಪೆತ್ತನ್ ಅಗ್ನಿಶಾಮಕ ದಳೊದ ಸಿಬ್ಬಂದಿ ಬೊಕ್ಕ ಕೈತಲ್ದಕುಲು ಸೇರ್ದ್ ಬದ್ಕಾಯಿನ ಪಡಪು ಪಚ್ಚನಾಡಿಡ್ ಕೋಡೆ ಐತಾರ ಬಯ್ಯಡ್ ನಡತ್ದ್ಂಡ್.
ಈ ಪೆತ್ತ ಮುಲ್ಪದ ಫ್ರಾಂಕ್ಲಿನ್ ಫರ್ನಾಂಡಿಸ್ ಪನ್ಪಿನಾರೆನವು. ಐತಾರ ಬಯ್ಯಡ್ ಪೆತ್ತ ಇಲ್ಲ ಕೈತಲ್ದ ಗೂವೆಲ್ದ ಕೈತಲ್ ಮೇಯೊಂದುಪ್ಪುನಗ, ತತ್ತ್ದ್ ಗೂವೆಲ್ದ ಉಲಯಿ ಬೂರ್ದ್ಂಡ್ಗೆ. ಸುಮಾರ್ 25 ಫೀಟ್ ಗಂತ್ದ ಗೂವೆಲ್ಡ್ ನೀರ್ಲಾ ಇತ್ತ್ಂಡ್.
ಉಂದು ಇಲ್ಲ ಕೈತಲೇ ನಡತಿನೆರ್ದಾವರ, ಅಕುಲು ಅಪಗನೇ ಪೆತ್ತ ಗೂವೆಲ್ಗ್ ಬೂರ್ದಿನೆನ್ ತೂದು ಕದ್ರಿ ಅಗ್ನಿಶಾಮಕ ದಳೊಗು ಒಲವು ಕೊರ್ತೆರ್.
ಅಪಗನೇ ಅಡೆಗ್ ಬತ್ತಿನ ಅಗ್ನಿಶಾಮಕ ದಳೊದ ಕೂಟ ಕೈತಲ್ದ ಇಲ್ಲದಕ್ಲೆನ ಒಟ್ಟುಗು ಕಾರ್ಯಾಚರಣೆ ಮಲ್ತ್ದ್ ಪೆತ್ತನ್ ಮಿತ್ತ್ ದೇರ್ತ್ದೆರ್.
ಈ ರಕ್ಷಣಾ ಕಾರ್ಯಾಚರಣೆಡ್ ಕದ್ರಿ ಅಗ್ನಿಶಾಮಕ ಠಾಣಾಧಿಕಾರಿ ಆಲ್ಬರ್ಟ್ ಮೋನಿಸ್, ಸಕಾಯಕ ಠಾಣಾಧಿಕಾರಿ ರಮೇಶ್ ದಯಾಕರ್, ಪ್ರಮುಖ ಅಗ್ನಿಶಾಮಕ ಸಿಬ್ಬಂದಿ ಚಂದ್ರಹಾಸ ಸಾಲಿಯಾನ್, ಡ್ರೈವರ್ ಸುರೇಶ್ ಕುಮಾರ್ ಬೊಕ್ಕ ಸಿಬ್ಬಂದಿ ಮಹೇಶ್ ಬೊಕ್ಕ ರುಸ್ತುಂ ಪಾಷಾ ಪಾಲ್ಪಡೆದಿತ್ತೆರ್.