Last updated on June 25th, 2026 at 08:39 am
ಚೆನ್ನೈ , ಜೂನ್ 25: ಟಿವಿಕೆ ಪಕ್ಷ ಕೊರ್ತಿ ಪಾತೆರೊಲೆಡ್ ಒಂಜಾಯಿನ ಪುರುಬಾಲೆಲೆಗ್ 1 ಗ್ರಾಂ ಬಂಗಾರ್ದ ಉಂಗಿಲ ಕೊರ್ಪುನ ಯೋಜನೆನ್ ಜೂ.22ರ್ದ್ ಪೂರ್ವಾನ್ವಯ ಆಪಿಲೆಕ ಸೆ.15ರ್ದ್ ಜಾರಿಗ್ ಕನಯೆರೆ ತಮಿಳ್ನಾಡ್ ಮುಖ್ಯಮಂತ್ರಿ ವಿಜಯ್ ಮೆರೆನ ಸರ್ಕಾರ ನಿರ್ಧಾರ ಮಲ್ದ್ಂಡ್. ಪ್ರಣಾಳಿಕೆಡ್ ತೆರಿಪಾಯಿಲೆಕ ರಾಜ್ಯೊದ ಸರ್ಕಾರಿ ಆಸ್ಪತ್ರೆಲೆಡ್ ಪುಟ್ಟಿನ ಜೋಕುಲೆಗ್ ಇಂದು ಅನ್ವಯ ಆಪುಂಡು.
ತಮಿಳ್ನಾಡ್ಡ್ ಶಾಶ್ವತವಾದ್ ಇಪ್ಪುನ, ಸರ್ಕಾರಿ ಆಸ್ಪತ್ರೆಲೆಡ್ ಪುಟ್ಟುನ ಮಾತಾ ಜೋಕುಲೆಗ್ ಈ ಯೋಜನೆ ಅನ್ವಯ ಆಪುಂಡು. ಮುಖ್ಯಮಂತ್ರಿ ವಿಜಯ್ ಮೆರೆನ ಪುಟ್ಟಿನ ದಿನ ಜೂನ್ 22 ರ್ದ್ ಪೂರ್ವಾನ್ವಯ ಆಪಿಲೆಕ ಈ ಯೋಜನೆ ಜಾರಿಗ್ ಬರ್ಪುಂಡು. ಮಾಜಿ ಮುಖ್ಯಮಂತ್ರಿ ಸಿ.ಎನ್. ಅಣ್ಣಾದುರೈ ಮೆರೆನ ಪುಟ್ಟಿನ ದಿನ ಸೆಪ್ಟೆಂಬರ್ 15 ತಾನಿ ಈ ಯೋಜನೆ ಅಧಿಕೃತವಾದ್ ಸುರು ಆಪುಂಡು.
ಇತ್ತೆದ ಮಾರ್ಕೆಟ್ ರೇಟ್ದ ಪ್ರಕಾರ ಸುಮಾರ್ 13,600 ರೂ. ಮೌಲ್ಯೊದ 1 ಗ್ರಾಂ ಬಂಗಾರ್ದ ಉಂಗಿಲನ್ ಜೋಕುಲೆಗ್ ಕೊರ್ಪೆರ್. ಈ ಯೋಜನೆಗ್ ಸರ್ಕಾರ ವರ್ಸೊಗು 755.83 ಕೋಟಿ ರೂ. ಕಾಸ್ ದೆತ್ತ್ದೀತ್ಂಡ್. ತಮಿಳ್ನಾಡ್ಡ್ ಬಾಲೆ ಪುಟ್ಟಿಬೊಕ್ಕ ಇಲ್ಲಗ್ ಎದುಕೊನ್ರ ಸಮ್ಮಲೆನ ಕಡೆರ್ದ್ ಬಂಗಾರ್ದ ಉಡಿಗಿರೆ ಕೊರ್ಪುನ (ತೈಮಾಮನ್ ಸೀರ್) ಕಟ್ಟ್ ಉಂಡು. ಇತ್ತೆ ಸರ್ಕಾರೊನೇ ಸಾಂಕೇತಿಕವಾದ್ ಆ ಸಮ್ಮಲೆನ ಜಬದರಿ ಗೆತೊಂದು, ಪ್ರತಿ ಬಾಲೆಗ್ ಈ ಬಂಗಾರ್ದ ಉಂಗಿಲ ಕೊರ್ಯೆರ ಪಿದಡ್ದ್ಂಡ್.
ಬಂಗಾರ್ದ ಉಂಗಿಲೊದ ಆಸೆಗ್ ಗ್ರಾಮೀಣ ಬೊಕ್ಕ ಪಾಪದ ಇಲ್ಲ್ದಕ್ಲು ಪೆದ್ದೆರೆ ಪ್ರೈವೇಟ್ ಆಸ್ಪತ್ರೆಲೆಗ್ ಪೋದು ಕಡ ಗೆತೊನುನ ತಪ್ಪುಂಡು. ಸರ್ಕಾರಿ ಆಸ್ಪತ್ರೆಲೆಡ್ ಪೆದ್ಪಾವುನೆಕ್ ಉತ್ತೇಜನ ಕೊರ್ಯೆರ ಅಂಚೆನೇ ಪುರುಬಾಲೆ ಬೊಕ್ಕ ಪೆದ್ದೊಲ್ತಿನ್ ಮಾನಾದಿಗೆ ಮಲ್ಪುನ ಸರ್ಕಾರೊದ ಮುಖ್ಯ ಉದ್ದೇಶ ಆದುಂಡು.
ಆಣ್ ಬಾಲೆ ಪೊಣ್ಣು ಬಾಲೆ ಪನ್ಪಿ ಭೇದದಾಂತೆ ಮಾತೆರೆಗ್ಲಾ ಈ ಉಂಗಿಲ ತಿಕ್ಕುಂಡು. ಇಲ್ಲದ ಏತ್ನೇ ಬಾಲೆ ಆದಿತ್ತ್ಂಡಲಾ (ಕಡೀರ, ಮಡೀರ ಅತ್ತ್ಂಡ ಮೂಜನೇ ಬಾಲೆ) ಈ ಯೋಜನೆದ ಲಾಭ ಗೆತೊನೊಲಿ. ಫಲಾನುಭವಿಲು ತಮಿಳ್ನಾಡ್ದ ನಿವಾಸಿಲಾದುಪ್ಪೊಡು, ಐಕ್ ರೇಷನ್ ಕಾರ್ಡ್, ಆಧಾರ್ ಕಾರ್ಡ್ ಅತ್ತ್ಂಡ ವೋಟರ್ ಐಡಿ ಕೊರೊಡಾಪುಂಡು.
ತಮಿಳ್ನಾಡ್ ನಿವಾಸಿ ಆದಿತ್ತ್ದ್ಲಾ, ಬೇತೆ ಒವ್ವೇ ಖಾಸಗಿ ಪ್ರೈವೇಟ್ ಸರ್ಸಿಂಗ್ ಹೋಮ್ ಅತ್ತ್ಂಡ ಕಾರ್ಪೊರೇಟ್ ಆಸ್ಪತ್ರೆಲೆಡ್ ಪೆದ್ದ್ಂಡ ಈ ಯೋಜನೆದ ಲಾಭ ತಿಕ್ಕುಜಿ. ಯೋಜನೆದಡಿಟ್ ಕಾಲಿ 1 ಗ್ರಾಂ ತೂಕೊದ ಅಧಿಕೃತ ಬಂಗಾರ್ದ ಉಂಗಿಲ ಮಾತ್ರ ಕೊರ್ಪುನತ್ತಂದೆ ಅವೆತ ಪಗತೆಗ್ ಕಾಸ್ ಗೆತೊನ್ರ ಒವ್ವೇ ಅವಕಾಶ ಇಪ್ಪುಜಿ.