Last updated on June 27th, 2026 at 05:44 pm
ಕುಡ್ಲ, ಜೂ. 27: ಕುಮಾರಧಾರಾ, ನೇತ್ರಾವತಿಗ್ ನೀರ್ ಕೊರ್ಪುನ ಎತ್ತಿನಹೊಳೆ ಬೊಕ್ಕ ಬೇತೆ ನಾಲ್ ಉಪನದಿಲೆನ್ ತಿರ್ಗಾವುನ, ‘ನೇತ್ರಾವತಿ ನದಿ ತಿರುವು ಯೋಜನೆ’ ಪನ್ದ್ ಸುರು ಆದ್, ಇತ್ತೆ ಎತ್ತಿನಹೊಳೆ ಯೋಜನೆ ಪನ್ಪಿ ಪುದರ್ ಪಗತ್ದ್ ನಡತೊಂದುಪ್ಪುನ ತುಳುನಾಡ್ದ ಪರ್ಪಿ ನೀರ್ ಒಯ್ತ್ದ್ ನೀರ್ದಾಂತಿನಕಲೆಗ್ ಪರ್ಯೆರ ಕೊರ್ಪ ಪನ್ಪಿ ನೆವನ ಕೊರ್ದು ಕಾರ್ಖಾನೆಲೆಗ್ ನೀರ್ ಕೊರ್ಪುನ ಯೋಜನೆನ್ ಉಂತಾವೊಡು ಪನ್ದ್ ಬಿನ್ನಪು ಮಲ್ತ್ದ್ ಇನಿ ಸನಿಯಾರ ಕಾಂಡೆ ಒಂತೆ ಜನ ತುಳುವೆರ್ ಒಟ್ಟಾದ್ ಸಂಸದೆ ಕ್ಯಾ. ಬ್ರಿಜೇಶ್ ಚೌಟೆರೆಗ್ ಆವೊಂದುಪ್ಪುನ ಅನ್ಯಾಯ ಕಾನೂನುಬಾಹಿರ ಬೇಲಲೆಲೆನ ಬಗೆಟ್ ತೆರಿಪಾಯೆರ್.
ಒಂಜಿ ಐಟಿ ಹಬ್, ಮಲ್ಲ ಬಂದರ್ದ ಲೆಕ ಬುಲೆಯೊಂದುಪ್ಪುನ ತುಳುನಾಡ ಮಂಗಳೂರು ಜಿಲ್ಲೆಗ್ ಜನೊಕುಲು ಒಕ್ಕೆಲ್ ಬರ್ಪಿನ, ಬೇಲೆ ನಾಡೊಂದು ಬರ್ಪಿನಲಾ ಬಾರೀ ಎಚ್ಚ ಆತ್ಂಡ್. ಈ ಬುಲೆಚ್ಚಿಲ್ದ ಒಟ್ಟುಗು ಪರ್ಪಿ ನೀರ್ಗ್ ನೇತ್ರಾವತಿದ ನೀರ್ದ ಮಿತ್ತ್ದ ತಾಂಗ್ಲಾ ಎಚ್ಚ ಆವೊಂದುಂಡು. ಈ ಇಸಯೊನು ಇನಿ ಸೇರ್ನ 100ರ್ದ್ ಎಚ್ಚ ಜನ ತುಳುವೆರ್ ಸಂಸದೆರೆಗ್ ಕುಡ್ಲಡ್ ತೆರಿಪಾಯೆರ್.
ಬಿನ್ನಪುದ ಮುಖ್ಯಾಂಶೊಲು:
1. ಎತ್ತಿನಹೊಳೆ ಯೋಜನೆದ ನೀರ್ನ್ ಬೆಂಗಳೂರ್ದ ಕೈಗಾರಿಕೆಲೆಗ್ ಕಡಪುಡುನೆನ್ ಉಂತಾವೊಡು
2. ನೈಸರ್ಗಿಕವಾದ್ ಈತ್ ನೀರ್ ನೇತ್ರಾವತಿಗ್ ಪರಪೊಡು ಪನ್ದ್ ಕಾನೂನು ಮಲ್ಪೊಡು.
3. ಮೂಡಾಯಿಘಟ್ಟೊದ ಬಗೆಟ್ ಮಲ್ದಿನ ಮಾಧವ್ ಗಾಡ್ಗಿಲ್ ವರದಿನ್ ಜಾರಿಗ್ ಕನವೊಡು.
4. ಯೋಜನೆಗ್ ಬೋಡಾದ್ ಕಡ್ತಿನ ಮರೊಕುಲೆ ಪಗತೆಗ್ ಬೇತೆ ಮರೊಕ್ಲೆನ್ ನಡ್ನಗ, ಕಡ್ತಿನ ಜಾತಿದ ದೈ ನೇ ನಡೊಡು.
5. ಮೂಡಾಯಿ ಗಟ್ಟೊರ್ದು ಪಡ್ಡಾಯಿಗ್ ಪರಪುನ ತೋಡು, ತಾರ್, ಸುದೆಕ್ಲೆನ ಕಾಪುಗು ಕಾನೂನು ಕನವೊಡು.
6. ನೀರ್ದ, ಪಸಂದ್ರೊದ, ಬೂಮಿದ, ಸಾಮಾಜಿಕ ತಜ್ಞೆರ್ ಇತ್ತಿನ ಕಮಿಟಿ ಮಲ್ತ್ದ್ ಇದಮುಟ್ಟ ಈ ಯೋಜನೆರ್ದ್ ತುಳುನಾಡ್ ಬೊಕ್ಕ ಮೂಡಾಯಿ ಗಟ್ಟೊಗು ಆತಿನ ನಷ್ಟೊಲೆನ ಬಗೆಟ್ ಅಧ್ಯಯನ ಮಲ್ಪಾವೊಡು.
7. ಬರ್ಸದ ನೀರ್ನ್ ಒರಿಪಾದ್, ಗಲಸುನ ವ್ಯವಸ್ಥೆನ್ ಕಡ್ಡಾಯ ಮಲ್ಪೊಡು.
8. ತುಳುನಾಡ ಸುದೆಕ್ಲೆನ್ ಬದ್ಕಾಯೆರ ಕಾಸ್ ಬುಡುಗಡೆ ಮಲ್ಪೊಡು.