Last updated on July 8th, 2026 at 12:07 pm
ಒಡಿಪು, ಜು. 08: ಮದಿಮೆ ಆಪೆ ಪನ್ದ್ ನಂಬಾದ್ ಅಪ್ರಾಪ್ತೆದಿ ಪೊಣ್ಣನ ಮಿತ್ತ್ ಬೆರಿಬೆರಿ ಲೈಂಗಿಕ ದೌರ್ಜನ್ಯ ಮಲ್ತ್ದ್, ಆಲೆಗ್ ಬಂಜಿ ಬರ್ಪಾದಿನ ಆಘಾತಕಾರಿ ನಡಪು ಒಡಿಪುಡು ನಡತ್ದ್ಂಡ್. ಪ್ರಕರಣೊಗು ಸಂಬಂಧಿತ್ದ್ ಅಸ್ಸಾಂ ಮೂಲೊದ ಮೂಜಿ ಜನೊತ ಮಿತ್ತ್ ಒಡಿಪು ಮಹಿಳಾ ಪೊಲೀಸ್ ಸ್ಟೇಷನ್ಡ್ ಪ್ರಕರಣ ದಾಕಲಾತ್ಂಡ್.
ಮೂಲತಃ ಉತ್ತರ ಕನ್ನಡ ಜಿಲ್ಲೆದ ಯಲ್ಲಾಪುರೊದ ಈ ಪೊಣ್ಣು ಬೇಲೆಗ್ ಒಡಿಪುಗು ಬತ್ತಿತ್ತಲ್. ಈ ಪೊರ್ತುಡು ಪೊಣ್ಣನ ಗುರ್ತ ಮಲ್ತೊಂಡಿನ ಅಸ್ಸಾಂ ಮೂಲೊದ ಕುಶಾಲ್, ರಾಜೇಶ್ ಬೊಕ್ಕ ಕೌಶಲ್ ಪನ್ಪಿನಕುಲು ಆಲೆನ್ ಮದಿಮೆ ಆಪಿನ ಕಲು ಪಾತೆರ ಕೊರ್ದಿತ್ತೆರ್. ಕರಿನ ಡಿಸೆಂಬರ್ ತಿಂಗೊಲುರ್ದಿಂಚಿ ಈ ಮೂವೆರ್ ಆರೋಪಿಲು ಪೊಣ್ಣನ್ ಒರಿ ಆಯಿ ಬೊಕ್ಕ ಒರಿ ಲೈಂಗಿಕವಾದ್ ಗಲಸೊಂದೆರ್ ಪನ್ದ್ ಒಯಿಲ್ಡ್ ತೆರಿಪಾದೆರ್
ಆರೋಪಿಲೆನ ಈ ಬೆರಿಬೆರಿ ದೌರ್ಜನ್ಯರ್ದಾವರ ಪೊಣ್ಣು ಇತ್ತೆ 7 ತಿಂಗೊಲ್ದ ಬಂಜಿನಾಲ್ ಆತಲ್. ವಿಷಯ ತೆರಿನನೇ ಪೋಡಿನ ಪೊಣ್ಣು, ಆಲೆನ ಗುರ್ತದಕಲೆನ ಸಕಾಯೊಡು ಒಡಿಪು ಮಹಿಳಾ ಪೊಲೀಸ್ ಸ್ಟೇಷನ್ಗ್ ಪೋದು ಒಯಿಲ್ ಬರೆಪಾದಲ್.
ಒಯಿಲ್ನ್ ಗಾತಿಡ್ ಗೆತೊಂದಿನ ಪೊಲೀಸೆರ್, ಮೂವೆರ್ ಆರೋಪಿಲೆನ ಮಿತ್ತ್ ಪೋಕ್ಸೋ (POCSO) ಕಾಯ್ದೆದಡಿಟ್ ಪ್ರಕರಣ ದಾಕಲ್ತೊಂದೆರ್. ಇತ್ತೆ ದೆಂಗ್ತಪ್ಪಾದ್ ಇಪ್ಪುನ ಆರೋಪಿಲೆನ್ ಪತ್ತೆರೆ ಪೊಲೀಸೆರ್ ಬೇಪು ಪಾಡ್ದೆರ್.