ಸುಳ್ಯ: ತಿಕ್ಕಿಯಲ್ ನಾಪತ್ತೆ ಆದಿತ್ತಿನ ಅಪ್ರಾಪ್ತೆದಿ ಪೊಣ್ಣು; ಲೈಂಗಿಕ ದೌರ್ಜನ್ಯ ಮಲ್ದಿನ ಕಡಬದ ಜವನೆ ಪೋಕ್ಸೋ ಕಾಯ್ದೆಡ್ ಕೈದ್!

Last updated on July 24th, 2026 at 04:01 pm

ಸುಳ್ಯ, ಜು. 24: ಸುಳ್ಯ ಪೊಲೀಸ್ ಸ್ಟೇಶನ್ ಸೀಮೆಡ್ ತೋಜಂದೆ ಆದಿತ್ತಿನ ಅಪ್ರಾಪ್ತ ಪ್ರಾಯೊದ ಪೊಣ್ಣನ್ ಪೊಲೀಸೆರ್ ಯಶಸ್ವಿಯಾದ್ ನಾಡ್‌ಪತ್ತ್‌ದಿತ್ತ್‌ದ್, ಆಲೆನ್ ಮಂಗೆ ಮಲ್ತ್ ಲೆತೊಂದು ಪೋದು ಲೈಂಗಿಕ ದೌರ್ಜನ್ಯ ಮಲ್ದಿನ ಆರೋಪಡ್ ಕಡಬ ಮೂಲೊದ ಜವನನ್ ಕೈದ್ ಮಲ್ತ್‌ದೆರ್.

ಕಡಬ ನಿವಾಸಿ ಧನುಷ್ (18) ಕೈದಾತಿನ ಆರೋಪಿ.

ಪ್ರಕರಣೊದ ಬಗೆಟ್:
ಸುಳ್ಯ ಪೊಲೀಸ್ ಸ್ಟೇಶನ್ ಸೀಮೆದ ನಿವಾಸಿ ಒರಿಯನ ಅಪ್ರಾಪ್ತ ಪ್ರಾಯೊದ ಮಗಲ್ ಕರಿನ ಮೇ 07, 2026 ತಾನಿ ‘ಕುಡ್ಲಗ್ ಬೇಲೆಗ್ ಪೋಪೆ’ ಪನ್ದ್  ಇಲ್ಲಡ್ ಪನ್ಡ್‌ದ್ ಪೋದಿತ್ತಲ್. ಆಂಡ ಅವೆರ್ದ್ ಬೊಕ್ಕ ಇಲ್ಲಗ್ಲಾ ಬರಂದೆ, ಓಲ್ಲಾ ತಿಕ್ಕಂದೆ ಇತ್ತಿನೆರ್ದಾವರ ಇಲ್ಲದಕುಲು ಬರೆಪಾದಿನ ಒಯಿಲ್‌ದ ಪ್ರಕಾರ ಮೇ 11, 2026 ತಾನಿ ಸುಳ್ಯ ಪೊಲೀಸ್ ಸ್ಟೇಶನ್‌ಡ್ ಅಪರಾಧ ಸಂಖ್ಯೆ: 64/2026, ಕಲಂ: 137(2) BNS 2023 ದ ಪ್ರಕಾರ ಕಿಡ್ನಾಪ್/ಕಾಣೆ ಆತಿನ ಪ್ರಕರಣ ದಾಕಲಾದಿತ್ತ್ಂಡ್.

ಪೊಣ್ಣು ತಿಕ್ಯಲ್, ಪೋಕ್ಸೋ ಕಾಯ್ದೆ ಪಾಡ್ಯೆರ್:
ಪ್ರಕರಣೊದ ಜಡ್ತೆ ಮಲ್ತಿನ ಪೊಲೀಸೆರ್ ಜುಲೈ 22, 2026 ತಾನಿ, ಈ ನಾಪತ್ತೆ ಆದಿತ್ತಿನ ಪೊಣ್ಣನ್ ಸುರಕ್ಷಿತವಾದ್ ನಾಡ್‌ಪತ್ತ್‌ದೆರ್. ಬೊಕ್ಕ ಪೊಣ್ಣನ ವಿಚಾರಣೆ ಮಲ್ತ್‌ದ್ ಪಾತೆರ್ನಗ ಕಡಬ ನಿವಾಸಿಯಾಯಿನ ಆರೋಪಿ ಧನುಷ್ ಪನ್ಪಿನಾಯೆ ಆಲೆನ್ ಪಾತೆರೊಡು ಮರ್ಲ್ ಮಲ್ತ್‌ದ್ ಲೆತೊಂದು ಪೋದು ಲೈಂಗಿಕ ದೌರ್ಜನ್ಯ ಮಲ್ತ್‌ದೆ ಪನ್ದ್ ತೆರಿಪಾದಲ್.

ಪೊಣ್ಣನ ಪಾತೆರೊದ ಆಧಾರೊಡು ಪೊಲೀಸೆರ್ ಪ್ರಕರಣೊಡು ಎಚ್ಚಿಗೆ ಕಲಂ: 64(2)(m) BNS ಬೊಕ್ಕ ಪೋಕ್ಸೋ ಕಾಯ್ದೆದ (POCSO Act) ಕಲಂ 5(l), 6 ತ ಅಡಿಟ್ ಗಾತಿದ ಪ್ರಕರಣೊಲೆನ್ ದಾಕಲ್ತೊಂದೆರ್.

ಆರೋಪಿ ಕೈದ್:
ಜುಲೈ 22, 2026 ತಾನಿ ಆರೋಪಿ ಧನುಷ್‌ನ್ ಪೊಲೀಸೆರ್ ದಸ್ತಗಿರಿ ಮಲ್ತಿತ್ತ್‌ದ್, ಇತ್ತೆ ಆಯನ್ ಉಲಕೈ ಮಲ್ತೊಂದು ವಿಚಾರಣೆ ಮಲ್ತೊಂದುಲ್ಲೆರ್. ಪ್ರಕರಣೊಗು ಸಂಬಂಧಿತ್‌ದ್ ಬೋಡಾಪಿನ ಕಾನೂನು ಕ್ರಮೊಕುಲೆನ್ ಗೆತೊನೊಂದುಲ್ಲ ಪನ್ದ್ ಪೋಲೀಸೆರ್ ತೆರಿಪಾದೆರ್.