Last updated on July 27th, 2026 at 10:46 am
ಕಾಪು , ಜು. 27: ಪ್ರಯಾಣಿಕೆರ್ ದಿಂಜಿದ್ ಇಪ್ಪುನಗನೇ ರಡ್ಡ್ ಎಕ್ಸ್ಪ್ರೆಸ್ ಬಸ್ಸ್ಲ್ ಉದ್ದೇಶಪೂರ್ವಕವಾದ್ ಒಂಜೆಕ್ ಒಂಜಿ ಎಡ್ತೊಂದು ಸಾರ್ವಜನಿಕೆರೆಡ ಪೋಡಿಗೆ ಉಂಡು ಮಲ್ತಿನ ನಡಪು ಇನಿ ಸೋಮವಾರ (ಜು. 27) ಕಾಂಡೆ ಕಾಪು ಬಸ್ ಉಂತಡೆಡ್ ನಡತ್ದ್ಂಡ್.
ಕಾಪು ಸರ್ವಿಸ್ ರೋಡ್ಡ್ ಈ ನಡಪು ನಡತಿತ್ತ್ದ್ ಒಡಿಪುರ್ದ್ ಕುಡ್ಲದಂಚಿ ಪೋವೊಂದಿತ್ತಿನ ಆನಂದ್ ಟ್ರಾವೆಲ್ಸ್ದ ಬಸ್, ಉಂತಡೆಡ್ ಉಂತುದಿತ್ತಿನ ಸಂದೇಶ್ ಟ್ರಾವೆಲ್ಸ್ದ ಬಸ್ ಗ್ ಬೋಡು ಬೋಡೂಂಡು ಪಿರವುರ್ದ್ ಬತ್ತ್ದ್ ಎಡ್ತಿನೆರ್ದಾವರ ಸಾರ್ವಜನಿಕೆರೆಡ ಒಂತೆ ಪೊರ್ತು ಪೋಡಿಗೆದ ವಾತಾವರಣ ಉಂಡಾದದಿತ್ತ್ಂಡ್.
ಒಡಿಪುರ್ದ್ ಕುಡ್ಲದಂಚಿ ಪೋಪುನ ಸಂದೇಶ್ ಟ್ರಾವೆಲ್ಸ್ ಬಸ್ ಬೊಕ್ಕ ಆನಂದ್ ಟ್ರಾವೆಲ್ಸ್ ಬಸ್ದ ಡ್ರೈವರ್ ಬೊಕ್ಕ ಕಂಡಕ್ಟರ್ನಕ್ಲೆನ ನಡುಟು ಟೈಮಿಂಗ್ಸ್ ವಿಚಾರೊಡು ಉದ್ಯಾವರೊರ್ದೇ ಆರೋಪ ಪ್ರತ್ಯಾರೋಪಲು ತೋಜಿದ್ ಬತ್ತಿತ್ತ್ದ್ ಸಂದೇಶ್ ಟ್ರಾವೆಲ್ಸ್ ಕಾಪು ಬಸ್ ಉಂತಡೆಡ್ ಜನೋಕ್ಲೆನ್ ಜಪ್ಪುಡಾದ್, ಬರ್ತಾಯೆರ ಉಂತುದಿತ್ತಿನ ಪೊರ್ತುಡು ಆಕ್ರೋಶ ಜೋರಾತ್ಂಡ್.
ಸಂದೇಶ್ ಟ್ರಾವೆಲ್ಸ್ ಬಸ್ದ ಡ್ರೈವರ್ ಕಾಪು ಉಂತಡೆಡ್ ಬಸ್ಸ್ ಉಂತಾದಿತ್ತಿನ ಪೊರ್ತುಡು ಪಿರವುರ್ದ್ ಬತ್ತಿನ ಆನಂದ್ ಟ್ರಾವೆಲ್ಸ್ ಬಸ್ ದ ಡ್ರೈವರ್ ಸೀದಾ ಬಸ್ಸ್ದ ಬಲತ ಮೆಯಿಕ್ ಎಡ್ತ್ದೆ. ಎಡ್ತೆದ ಬರಸ್ಗ್ ರಡ್ಡ್ ಬಸ್ಡ್ ಇತ್ತಿನ ಪ್ರಯಾಣಿಕೆರ್ಲಾ ಒರ ನರ್ಗ್ದ್, ಪೋಡಿಗೆಡ್ ಕಲ್ಕ್ದೆರ್.
ಉಂದಾಯಿ ಬೊಕ್ಕ ರಡ್ಡ್ ಬಸ್ದ ಡ್ರೈವರ್ನಕುಲ್ಲಾ ಒರಿಯಗೊರಿ ಆರೋಪ ಮಲ್ತೊಂದು ಕಾಪು ಸರ್ವಿಸ್ ರೋಡ್ಡ್ ಸುಮಾರ್ ಪದಿನೈನ್ ನಿಮಿಷ ಕಾಲ ಸಂಚಾರ ಅಸ್ತವ್ಯಸ್ತ ಆದಿತ್ತ್ಂಂಡ್. ಈ ಪೊರ್ತುಡು ಸಾರ್ವಜನಿಕೆರ್ ಬೊಕ್ಕ ರಿಕ್ಷಾ ಡ್ರೈವರ್ನಕುಲು ಎಂಚ ಎಂಚ ಪನ್ಡಲಾ ಅಲ್ಪರ್ದ್ ಪಿದಡೆರೆ ಕೇನಂದಿನ ಬಸ್ ಡ್ರೈವರ್ನಕುಲು ಬಸ್ಸ್ಲೆನ್ ಅಡ್ಡ ದೀದ್ ಬೇತೆ ಗಾಡಿಲೆನ ಸಂಚಾರೊಗ್ಲಾ ತಲೆಪು ಮಲ್ತ್ದೆರ್. ಇಂದೆರ್ದಾವರ ಸರ್ವೀಸ್ ರೋಡ್ಡ್ ಟ್ರಾಫಿಕ್ ಉಂತುದ್ ಪೋದಿತ್ತ್ಂಡ್.
ಅಲ್ಪದಕುಲು ಕಾಪು ಪೊಲೀಸೆರೆಗ್ ಒಲವು ಕೊರ್ದಿತ್ತ್ದ್ ಪೊಲೀಸೆರ್ ಜಾಗೆಗ್ ಬತ್ತ್ದ್ ರಡ್ಡ್ ಬಸ್ಲೆನ್ಲಾ ಸ್ಟೇಶನ್ಗ್ ಕೊನೊತೆರ್.