Last updated on August 3rd, 2026 at 08:02 am
ಕುಡ್ಲ, ಆ. 03 : ಕುಡ್ಲದ ಮಿಕ್ಸ್ಡ್ ಮಾರ್ಷಲ್ ಆರ್ಟ್ಸ್ (ಎಂಎಂಎ) ಫೈಟರ್ ನಿಖಿಲ್ ಶೆಟ್ಟಿ ಅಂತರರಾಷ್ಟ್ರೀಯ ಮಟ್ಟೊಡು ಭಾರತೊಗು ಪೆರ್ಮೆ ಕನಪುನ ಸಾದಗ್ ಬೆನ್ತೆರ್. ಮಲೇಷ್ಯಾಡ್ ನಡತಿನ ಗಾಮಾ (GAMMA) ಏಷ್ಯನ್ ಚಾಂಪಿಯನ್ಶಿಪ್–2026ಟ್ ಭಾರತೊನು ಪ್ರತಿನಿಧಿತಿನ ಆರ್, 74.9 ಕೆಜಿ ತೂಕ ವಿಭಾಗೊಡು ಬೊಲ್ಲಿದ ಪದಕ ಗೆಂದ್ದ್ ರನ್ನರ್-ಅಪ್ ಆತೆರ್.
ಏಷ್ಯಾದ ಬೇತೆ ಬೇತೆ ದೇಶೊಲೆನ ಪ್ರಬಲ ಹವ್ಯಾಸಿ ಎಂಎಂಎ ಆಲ್ಲೆನ ನಡುತ ಬಾರೀ ಪಂತೊಡು ನಿಖಿಲ್ ಶೆಟ್ಟಿ ಎಡ್ಡೇನ ಪ್ರದರ್ಶನ ಕೊರ್ದು ಫೈನಲ್ಗ್ ಎತ್ತ್ದಿತ್ತೆರ್. ಅಕೇರಿದ ಕಟ್ಟೊಡು ರಡ್ಡನೇ ತಾನೊ ಗೆತೊಂದು ಬೊಳ್ಳಿ ಪದಕೊನು ಆರೆನ ಪುದರ್ಗ್ ಮಲ್ತೊಂದೆರ್.
ನಿಖಿಲ್ ಶೆಟ್ಟಿ, ಕೋಚ್ ಕೌಶಿಕ್ ಬೋಳೂರು ಮೆರೆನ ಮಾರ್ಗದರ್ಶನೊಡು ಟ್ರೈನಿಂಗ್ ಮಲ್ತೊಂದುಲ್ಲೆರ್. ಆತೇ ಅತ್ತಂದೆ ಮೊಹಿತ್ ಕರ್ಕೇರ, ಸುದೀಪ್ ಕೊಟ್ಟಾರಿ ಬೊಕ್ಕ ಕಾರ್ತಿಕ್ ಪುತ್ರನ್ ಮೊಕಲೆನ ಒಟ್ಟುಗು ಕಶರ್ಪ್ ಫಿಟ್ನೆಸ್ ಬೊಕ್ಕ ದಿ ಡೆನ್ ಡ್ ನಿಯಮಿತವಾದ್ ಅಭ್ಯಾಸ ಮಲ್ತೊಂದುಲ್ಲೆರ್. ಉಂದೇ ಕೇಂದ್ರೊಡು ಆರ್ ಎಂಎಂಎ ಟ್ರೈನಿಂಗ್ಲಾ ಕೊರ್ಪೆರ್.
ಅಂತರರಾಷ್ಟ್ರೀಯ ಕ್ರೀಡಾ ಮಿತ್ತರ್ಮೆಡ್ ತುಳುನಾಡ್ ಬೊಕ್ಕ ಭಾರತೊದ ಪುಗರ್ತೆನ್ ಎಚ್ಚಾದಿನ ನಿಖಿಲ್ ಶೆಟ್ಟಿ ಮೆರೆನ ಸಾದಗೊಗು ತುಳುಸಮಾಚಾರದ ಕಡೆರ್ದ್ ಅಂಚೆನೇ ಮಾತ್ ತುಳುವೆರೆನ ಕಡೆರ್ದ್ ಎಡ್ಡೆಪು ಬಯಕೊಂದುಲ್ಲ.