Last updated on August 7th, 2026 at 11:16 am
ಕುಡ್ಲ, ಆ. 07: ನಗರ ಪಾಲಿಕೆದ ಸೀಮೆಡ್ ಪೇಂಟೆಡೊರ್ಮೆ ಪತ್ತೆರ್ದ್ಲಾ ಎಚ್ಚ ಬಾರ್ ಬೊಕ್ಕ ಪಬ್ಲೆನ ಮಿತ್ತ್ ಬುಧವಾರ ರಾತ್ರೆ ಅಬಕಾರಿ ಇಲಾಖೆ ಅಧಿಕಾರಿಲು ದಾಳಿ ಮಲ್ತ್ದೆರ್.
ಈ ಪೊರ್ತುಡು ಬಾರ್ಗ್ ಬರ್ಪಿನಕ್ಲೆನ ಗುರ್ತದ ಚೀಟಿ ತಪಾಸಣೆ ಮಲ್ತೆರ್. ಅಪ್ರಾಪ್ತ ಪ್ರಾಯೊದಕಲೆಗ್ ಗಂಗಸರ ಕೊರಂದಿಲೆಕ ಬಾರ್ದಕಲೆಗ್ ಸೂಚನೆ ಕೊರ್ಯೆರ್. ಓಲಾಂಡಲಾ ಕೊರ್ನ್ಡ ಕಠಿಣ ಕ್ರಮ ಗೆತೊನುವ ಪನ್ದ್ ಅಬಕಾರಿ ಅಧಿಕಾರಿಲು ಎಚ್ಚರ್ಗೆ ಕೊರ್ತೆರ್.
ರಾತ್ರೆ 8 ಗಂಟೆರ್ದ್ 10.30 ಮುಟ್ಟ ನಡತಿನ ವಿಶೇಷ ಕಾರ್ಯಾಚರಣೆಡ್ ಅಧಿಕಾರಿಲು ಒಂಜೇ ಪೊರ್ತುಡು ಬೇತೆ ಬೇತೆ ಕಡೆಟ್ ದಾಳಿ ಮಲ್ತ್ದೆರ್. ಅಬಕಾರಿ ಉಪ ಆಯುಕ್ತೆರ್ ಬಿಂದುಶ್ರೀ ಮೆರೆನ ಮಾರ್ಗದರ್ಶನೊಡು ಈ ಕಾರ್ಯಾಚರಣೆ ನಡತ್ಂಡ್.
ದಾಳಿದ ಪೊರ್ತುಡು, ಅಧಿಕಾರಿಲು ಗಿರಾಕಿಲೆನ ಪ್ರಾಯೊದ ಪುರಾಪುನು ಪರಿಶೀಲನೆ ಮಲ್ತೆರ್. “ಎಂಕ್ಲ 10 ರ್ದ್ಲಾ ಎಚ್ಚ ಅಂಗಡಿಲೆನ್ ಪರಿಶೀಲನೆ ಮಲ್ತ್ದ ಬೊಕ್ಕ ಗಿರಾಕಿಲೆನ ಗುರ್ತೊದ ದಾಕಲೆಲೆನ್ ಪರಿಶೀಲನೆ ಮಲ್ತ್ದ. ಒವ್ವೇ ಅಕ್ರಮೊಲು ತಿಕ್ಕ್ದಿಜ. ಆಂಡ , 21 ವರ್ಸೊರ್ದು ತಿರ್ತ್ದ ಪ್ರಾಯೊದಕಲೆಗ್ ಗಂಗಸರ ಕೊರ್ರೆ ಬಲ್ಲಿ ಪನ್ದ್ ದನಿಕುಲು ಬೊಕ್ಕ ಬೇಲೆದಕಲೆಗ್ ಎಚ್ಚರ್ಗೆ ಕೊರ್ತ” ಪನ್ದ್ ಮಂಗಳೂರು ಜಿಲ್ಲೆ ಅಬಕಾರಿ ಇಲಾಖೆದ ಉಪ ಅಧೀಕ್ಷಕೆದಿ ಗಾಯತ್ರಿ ಸಿ.ಎಚ್. ಪನ್ಡೆರ್.
ಮಣಿಪಾಲಡ್ ಇಂಚಿಪ ನಡತಿನ ಮಲ್ಲ ಕಾರ್ಯಾಚರಣೆದ ಲೆಕ ಇಲಾಖೆ ಈ ಕಾರ್ಯಾಚರಣೆನ್ ಪೂರ್ವಭಾವಿಯಾದ್ ಸುರು ಮಲ್ದೆರ್. ಆ ನಡಪುಡು, 21 ವರ್ಸೊರ್ದು ತಿರ್ತ್ದ ಪ್ರಾಯೊದ 88 ಜನ ಗಂಗಸರ ಪರ್ದ್ ತಿಕ್ಕ್ದ್ ಬೂರಿ ಬೊಕ್ಕ ಆಜಿ ಪಬ್ ಬೊಕ್ಕ ಬಾರ್ಲೆನ ಮ್ಯಾನೇಜ್ಮೆಂಟ್ದ ಮಿತ್ತ್ ಕೇಸ್ ಪಾಡ್ದೆರ್.