Last updated on August 8th, 2026 at 09:33 am
ಕುಡ್ಲ, ಆ. 07: ತುಳುನಾಡ ವೈಭವೊನು ತೋಜಾಯೆರೆ ಅಂಚೆನೇ ಸಂಸ್ಕೃತಿನ್ ಮೆರೆಪಾವುನ ದಿಟ್ಟಿಡ್ ಎಮ್ಆರ್ಪಿಎಲ್ ಸಂಸ್ಥೆ ಆಗಸ್ಟ್ 7, 2026 ನೇ ಶುಕ್ರವಾರ ದಾನಿ ಬಯ್ಯಡ್ ತುಳು ಪರ್ಬ – 2026 ಪನ್ಪಿ ಲೇಸ್ನ್ ಎಂಆರ್ಪಿಎಲ್ ಎಂಪ್ಲಾಯೀಸ್ ರಿಕ್ರಿಯೇಷನ್ ಸೆಂಟರ್ಡ್ ಅಟ್ಟನೆ ಮಲ್ದಿತ್ತ್ಂಡ್.
ಈ ಪೊರ್ಲ ಲೇಸ್ಡ್ ತುಳು ಸಂಘಟಕೆ ಶ್ರೀ ರೋಶನ್ ರೆನಾಲ್ಡ್, ತುಳುವ ಬೊಳ್ಳಿ ದಯಾನಂದ ಜಿ ಕತ್ತಲ್ಸರ್, ನ್ಯಾಷನಲ್ ಫಿಲ್ಮ್ ಅವಾರ್ಡ್ ಗೆಂದಿನ ಶ್ರೀ ರೂಪಾ ವರ್ಕಾಡಿ ಬೊಕ್ಕ ಮಾಸ್ಟರ್ ಅತೀಶ್ ಶೆಟ್ಟಿ, ಸ್ನೇಹದೀಪಾ ಸಂಸ್ಥೆ ಉಂಡು ಮಲ್ದಿನ ಸಮಾಜಸೇವಕಿ ಶ್ರೀಮತಿ ತಬಸ್ಸುಮ್, ಯಕ್ಷಗಾನ ಕಲಾವಿದೆ ಉಮೇಶ್ ಕುಪ್ಪೆಪದವು ಬೊಕ್ಕ ಕಂಬುಲಡ್ ಮೆನ್ಕೊನ್ದುಪ್ಪುನ ಶ್ರೀ ಕೃತಿಕ್ ಗೌಡ ಮೊಕಲೆಗ್ ಅಕಲಕಲೆನ ಕ್ಷೇತ್ರೊಲೆಡ್ ಬೆನ್ತಿನ ಸಾದಗೊನು ಗುರ್ತ ಪತ್ತ್ದ್ ಮಾನಾದಿಗೆ ಮಲ್ತೆರ್.
ಎಮ್ಆರ್ಪಿಎಲ್ದ ಮ್ಯಾನೇಜಿಂಗ್ ಡೈರೆಕ್ಟರ್ ಶ್ರೀ ಮುಂಡ್ಕೂರ್ ಶ್ಯಾಮ್ ಪ್ರಸಾದ್ ಕಾಮತ್ ಮೆರೆನ ಗುರ್ಕಾರ್ಮೆಡ್ ನಡತಿನ ಈ ಲೇಸ್ಗ್ ಮಾನಾದಿಗೆದ ಬಿನ್ನೆರಾದ್ MRPL ರಿಫೈನರಿ ಡೈರೆಕ್ಟರ್ ನಂದಕುಮಾರ್ ವೇಲಾಯುಧನ್ ಪಿಳ್ಳೈ, MRPL ಫೈನಾನ್ಸ್ ಡೈರೆಕ್ಟರ್ ಶ್ರೀ ದೇವೇಂದ್ರ ಕುಮಾರ್, MRPL ಹೆಚ್ ಆರ್ ಮ್ಯಾನೇಜರ್ ಶ್ರೀ ಪ್ರಶಾಂತ್ ಶಂಕರ್ ಪೊದುವಾಳ್, ಮಲ್ಲ ಬಿನ್ನೆರಾದ್ ಭಂಡಾರಿ ಫೌಂಡೇಶನ್ ಗವರ್ನಿಂಗ್ ಕೌನ್ಸಿಲ್ದ ಮೆಂಬರ್, ಟ್ರಸ್ಟಿ ಶ್ರೀ ಕೃಷ್ಣ ಹೆಗ್ಡೆ ಮೀಯಾರ್ ಅಂಚೆನೇ ಸೆಲೆಬ್ರಿಟಿ ಬಿನ್ನೆರಾದ್ ತುಳು ಜಾನನದ ವಿದ್ವಾಂಸೆರ್, ದೈವ ನರ್ತಕೆರ್ ಶ್ರೀ ದಯಾನಂದ ಜಿ ಕತ್ತಲ್ಸರ್, ನ್ಯಾಶನಲ್ ಫಿಲ್ಮ್ ಅವಾರ್ಡ್ ಗೆಂದಿನ ಶ್ರೀ ರೂಪಾ ವರ್ಕಾಡಿ, ಪೆರಿಯ ತುಳು ಕಲಾವಿದೆ ಭೋಜರಾಜ್ ವಾಮಂಜೂರ್ ಬತ್ತಿತ್ತೆರ್.
ಈ ಪೊರ್ಲ ಬಯ್ಯದ ಲೇಸ್ಡ್ ಪುಗರ್ತೆದ ನಂದಗೋಕುಲ ಟೀಮ್ರ್ದ್ ತುಳು ನಾಟ್ಯ ವೈಭವ, ಟೀಮ್ ತ್ರೀ ಟೂ ವನ್ ರ್ದ್ ತುಳು ಸಂಸ್ಕೃತಿ ಬೊಕ್ಕ ತುಳು ವೈಭವ, ಅಂಚೆನೇ ಮೂಕಾಂಬಿಕಾ ಚೆಂಡೆ ಟ್ರೂಪ್ ರ್ದ್ ಚೆಂಡೆ ಶೋ ನಡತ್ಂಡ್. ಎಂಆರ್ಪಿಎಲ್ ಉದ್ಯೋಗಿಲು ಶರತ್ ಜೋಗಿ, ರಾಕೇಶ್ ಸಾಲಿಯಾನ್ ಅಂಚೆನೇ ಮಾತೆರೆನ ಸಹಕಾರೊಡು ಈ ಲೇಸ್ ಪೊರ್ತು ಕಂತುನ ಪೊರ್ತುಡು ಪೊರ್ಲುಡು ಮೂಡ್ದ್ ಬತ್ತ್ಂಡ್.