Last updated on August 10th, 2026 at 09:09 am
ಇಟ್ಟೆಲ್, ಆ. 10: ಇಟ್ಟೆಲ್ ಕಸಬಾ ಗ್ರಾಮೊದ ಕುರುಂಬಳ ಪನ್ಪಿನಲ್ಪ ಐತಾರ ಕಾಂಡೆ ಗ್ಯಾಸ್ ಸಿಲಿಂಡರ್ ಒರರ್ದ್ ಒರಾನೆ ಪುಡದ್ ಇಲ್ಲದ ಉಲಮೆಯಿ ಪೊಡಿ ಆತ್ಂಡ್. ಬರಿತಿಲ್ಲದಾರೆನ ಸಮಯಪ್ರಜ್ಞೆರ್ದಾವರ ಇಲ್ಲಡಿತ್ತಿನಕುಲು ಉಂಬರೊರ್ದು ಒಂತೆಟೇ ಬಚಾವಾತೆರ್.
ಕುರುಂಬಳದ ಹಮೀದ್ ಪನ್ಪಿನಾರೆನ ಇಲ್ಲಡ್ ಕಾಂಡೆ 11 ಗಂಟೆದ ಅಂದಾಜಿಗ್ ಈ ದುರಂತ ನಡತ್ದ್ಂಡ್. ಇಲ್ಲದ ದನಿ ಹಮೀದ್ ಮೇರ್ ಪೇಂಟೆಗ್ ಪೋದುಪ್ಪುನಗ, ಆರೆನ ಬೊಡೆದಿ ಖೈರುನ್ನಿಸಾ ಅಡ್ಪಿಲ್ಲ್ಡ್ ಬೇಲೆ ಮಲ್ತೊಂದಿತ್ತೆರ್. ಈ ಪೊರ್ತುಡು ಒರರ್ದ್ ಒರಾನೆ ಸಿಲಿಂಡರ್ದ ರೆಗ್ಯುಲೇಟರ್ ದಲ್ಪ ಸೂ ತೋಜಿದ್ ಬೈದ್ಂಡ್. ಪೋಡಿನ ಖೈರುನ್ನಿಸಾ ಕಲ್ಕ್ದಿತ್ತ್ದ್, ಕಲ್ಕಟಿಗೆ ಕೇನ್ದ್ ಬರಿತಿಲ್ಲದ ನಿವಾಸಿ ಉಮರ್ ಪನ್ಪಿನಾರ್ ಅಪಗನೇ ಪಾರೊಂದು ಬೈದೆರ್. ಸನ್ನಿವೇಶೊದ ಗಾತಿನ್ ತೆರಿನ ಉಮರ್, ಅಪಗನೇ ಇಲ್ಲಡಿತ್ತಿನಕಲೆನ್ ಜಾಲ್ಗ್ ಲೆತೊಂದು ಪೋತೆರ್. ಅಕುಲು ಪಿದಯಿ ಬತ್ತಿನ ಒಂತೆ ಪೊರ್ತುಡೇ ಸಿಲಿಂಡರ್ ಭೀಕರವಾದ್ ಪುಡದ್ಂಡ್.
ಪುಡತಿನ ಪೆಟ್ಟ್ಗ್ ಇಲ್ಲದ ಮದೆಲ್ಡ್ ಸಿಲೆ ಬುಡ್ದಿತ್ತ್ದ್, ಅಡ್ಪಿಲ್ಲ್ ಅಲಕ್ಕ ಪೊಡಿ ಆತ್ಂಡ್. ಇಲ್ಲಡಿತ್ತಿನ ಪೀಠೋಪಕರಣೊಲು, ಅಗತ್ಯ ದಾಖಲೆಲು ಬೊಕ್ಕ ಇಲ್ಲಗಲಕೆದ ಸೊತ್ತುಲು ಪೊತ್ತುದ್ ಪೋದು, ಲಕ್ಷಗಟ್ಲೆ ರೂಪಾಯಿ ನಷ್ಟ ಆತ್ಂಡ್ ಪನ್ದ್ ಅಂದಾಜಿ ಪಾಡ್ದೆರ್. ನಡಕೆದ ಬಗೆಟ್ ತೆರಿನನೇ ಇಟ್ಟೆಲ್ ಪೊಲೀಸ್ ಸ್ಟೇಶನ್ ಸಿಬ್ಬಂದಿ ಜಾಗೆಗ್ ಬತ್ತ್ದ್ ಪರಿಶೀಲನೆ ಮಲ್ತ್ದೆರ್.