Last updated on August 16th, 2026 at 09:37 am
ಒಡಿಪು, ಆ. 16 : ಉದ್ಯಮಿ ಡೇವಿಡ್ ಡಿಸೋಜಾ ಮೇರೆನ್ ಶೂಟ್ ಮಲ್ತ್‌ದ್ ಕೆರ್ತಿನ ಪ್ರಕರಣೊಗು ಸಂಬಂಧಿತ್‌ದ್ ಒಡಿಪು ಜಿಲ್ಲಾ ಪೊಲೀಸೆರ್ ಕುಡ ಇರ್ವೆರ್ ಪ್ರಮುಖ ಆರೋಪಿಲೆನ್ ಉಲಕೈ ಮಲ್ತ್‌ದ್, ಆಗಸ್ಟ್ 14 ತಾನಿ ನ್ಯಾಯಂತಡೆದ ಎದುರು ಲೆತೊಂದು ಪೋತೆರ್.
ಎರ್ಮಾಳ್ ಕಿಶೋರ್ ಪೂಜಾರಿ (47) ಪನ್ಪಿನಾರೆನ್ ಆಗಸ್ಟ್ 14ತ ಕಾಂಡೆ ಪೊಲೀಸೆರ್ ಉಲಕೈ ಮಲ್ತ್‌ದೆರ್, ಕುತ್ಯಾರ್ ನಿವಾಸಿ ಸದಾನಂದ ದೇವಾಡಿಗ (45) ಮೆರೆನ್ ಆಗಸ್ಟ್ 13ತ ರಾತ್ರೆ ಉಲಕೈ ಮಲ್ತೊಂದೆರ್. ಕಿಶೋರ್ ಸದಾನಂದೆರೆಗ್ ಕಾಸ್ ಕಡಪುಡ್ದಿತ್ತ್‌ದ್, ಸದಾನಂದ್ ಆ ಕಾಸ್‌ನ್ ಮೂವೆರ್ ಸುಪಾರಿ ಗೆತೊಂದಿನಕಲೆಗ್ ಕಡಪುಡ್ದೆರ್ ಪನ್ದ್ ಪೊಲೀಸೆರ್ ಆರೋಪ ಮಲ್ತ್‌ದೆರ್.
ಈ ಇರ್ವೆರೆ ಕೈದ್‌ದೊಟ್ಟುಗು ಪ್ರಕರಣೊಗು ಸಂಬಂಧಿತ್‌ದ್ ಇದಮುಟ್ಟ ಒಟ್ಟು ಏಲ್ ಜನೊನು ಪೊಲೀಸೆರ್ ಕೈದ್ ಮಲ್ತ್‌ದೆರ್. ಆರೋಪಿಲೆನ್ ನ್ಯಾಯಂತಡೆದ ಎದುರು ಲೆತೊಂದು ಪೋತಿನ ಪೊರ್ತುಡು, ಅಕಲೆನ್ ಆಗಸ್ಟ್ 10 ತಾನಿಯೇ ಪೊಲೀಸೆರ್ ವಶೊಕು ಗೆತೊಂದೆರ್ ಪನ್ದ್ ಅಕುಲು ಪನ್ತೆರ್‌ಗೆ.
ಈ ಪೊರ್ತುಡು ಕಿಶೋರ್ ಪೂಜಾರಿನ ಪರ ವಾದ ಮಂಡನೆ ಮಲ್ತಿನ ವಕೀಲೆರ್, ಕಿಶೋರ್‌ಗ್ ಉಸಾರಿಜ್ಜಿ ಅಂಚೆನೇ ಆರೆನ ಇಲ್ಲದ ಸಿಸಿಟಿವಿ ಸಿಸ್ಟಮ್‌ನ್ ಪೊಲೀಸೆರ್ ಪತೊಂದು ಪೋತೆರ್ ಪನ್ಪಿ ವಿಷಯೊನು ನ್ಯಾಯಂತಡೆದ ಗುಮನೊಗು ಕನತೆರ್. ಇಂದೆನ್ ಕೇನ್ಡಿನ ನ್ಯಾಯಾಧೀಶೆರ್, ಜಡ್ತೆದ ಅಗತ್ಯ ಇತ್ತ್ಂಡ ಪೊಲೀಸೆರ್ ಆರೋಪಿಲೆನ ಪೊಲೀಸ್ ಕಸ್ಟಡಿಗ್ ನ್ಯಾಯಂತಡೆರ್ದ್ ಅನು ಗೆತೊಂದೊಲಿ ಪನ್ಪಿ ಅಭಿಪ್ರಾಯ ತೋಜಾಯೆರ್. ಇಂಚಿನ ಕ್ರಮ ದಾಯೆ ಗೆತೊಂಡೆರ್ ಪನ್ಪಿ ಬಗೆಟ್ಲಾ ನ್ಯಾಯಾಧೀಶೆರ್ ಪ್ರಶ್ನೆ ಮಲ್ತೆರ್.
ಈ ಬಗೆಟ್ ತನಿಖಾಧಿಕಾರಿ ವಿವರಣೆ ಕೊರೊಡು ಪನ್ದ್ ನ್ಯಾಯಾಧೀಶೆರ್ ಮೌಖಿಕವಾದ್ ಸೂಚನೆ ಕೊರ್ತೆರ್ ಪನ್ದ್ ತೆರಿದ್ ಬೈದ್ಂಡ್.