Last updated on September 7th, 2026 at 09:35 am
ಸುಬ್ರಹ್ಮಣ್ಯ: ಕುಕ್ಕೆ ಸುಬ್ರಹ್ಮಣ್ಯರ್ದ್ ಬೆಂಗಳೂರ್ಗ್ ಪೋವೊಂದಿತ್ತಿನ ಕೆಎಸ್ಆರ್ಟಿಸಿ (KSRTC) ಬಸ್ಗ್ ಆಕಸ್ಮಿಕವಾದ್ ಸೂ ಪತೊಂದಿನ ನಡಪು ಸುಬ್ರಹ್ಮಣ್ಯ–ಗುಂಡ್ಯ ರಾಜ್ಯ ಪೆರ್ಸಾದಿದ ಎರ್ಮಾಯಿಲ್ ಕೈತಲ್ ಶನಿವಾರ ರಾತ್ರೆ ನಡತ್ದ್ಂಡ್. ಡ್ರೈವರ್ನ ಸಮಯಪ್ರಜ್ಞೆರ್ದಾವರ ಬಸ್ಡ್ ಇತ್ತಿನ 37 ಜನ ಪ್ರಯಾಣಿಕೆರ್ ಉಂಬರೊರ್ದು ಬಚಾವಾತೆರ್.
ಬಿ.ಸಿ. ರೋಡ್ ಡಿಪೋಗ್ ಸೇರ್ದಿನ ಕೆಎಸ್ಆರ್ಟಿಸಿ ಬಸ್ ಕುಕ್ಕೆ ಸುಬ್ರಹ್ಮಣ್ಯರ್ದ್ ಹಾಸನ ಆದ್ ಬೆಂಗಳೂರ್ಗ್ ಪೋವೊಂದಿತ್ತ್ಂಡ್. ರಾತ್ರೆ 9:15ತ ಅಂದಾಜಿಗ್ ಎರ್ಮಾಯಿಲ್ ಎತ್ತೊಂದು ಬತ್ತಿನೇ ಬಸ್ದ ಇಂಜಿನ್ ಭಾಗೊಡು ಒರರ್ದ್ ಒರಾನೆ ಪುಗೆ ಲಕ್ಕ್ದ್ಂಡ್ಗೆ. ಉಂದೆನ್ ತೂಯಿನ ಡ್ರೈವರ್, ಗಾಡಿನ್ ಸಾದಿಬರಿಟ್ ಉಂತಾದ್ ಪ್ರಯಾಣಿಕೆರೆಗ್ ಎಚ್ಚರ್ಗೆ ಕೊರ್ತೆರ್.
ಒವ್ವೇ ಆತಂಕೊಗು ಅವಕಾಶ ಕೊರಂದೆ, ಮಾತಾ ಪ್ರಯಾಣಿಕೆರೆನ್ ಅಪಗನೇ ಸುರಕ್ಷಿತವಾದ್ ತಿರ್ತ್ ಜಪ್ಪಾವುನೆಟ್ ಡ್ರೈವರ್ ಯಶಸ್ವಿಯಾತೆರ್. ಪ್ರಯಾಣಿಕೆರ್ ಜತ್ತೊಂದಿತ್ತಿಲೆಕನೆ ಸೂತ ಎರಿ ಇಡೀ ಬಸ್ನ್ ನಿಂಗ್ದಿತ್ತ್ದ್, ತೂಯಿ ತೂಯಿಲೆಕನೆ ಇಡೀ ಬಸ್ ಅಲಕ್ಕ ಪೊತ್ತುದ್ ಸುಡು ಸೂಕರಿ ಆತ್ಂಡ್.
ನಡಪುದ ಒಲವು ತಿಕ್ಕಿನೇ ಕೈತಲ್ದಕುಲು, ಅಗ್ನಿಶಾಮಕ ಸಿಬ್ಬಂದಿ ಬೊಕ್ಕ ಪೋಲೀಸ್ ಅಧಿಕಾರಿಲು ಬತ್ತ್ದ್ ಸೂ ತೆಕ್ಕಾದೆರ್. ಶಾರ್ಟ್ ಸರ್ಕ್ಯೂಟ್ ಅತ್ತ್ಂಡ ಇಂಜಿನ್ಡ್ ಉಂಡಾತಿನ ತಾಂತ್ರಿಕ ದೋಷೊನೇ ಸೂ ಪತೊನರೆ ನೆವನ ಆದುಪ್ಪು ಪನ್ದ್ ಎನ್ನ್ದಿತ್ತ್ದ್, ಪತ್ತ ನೆವನ ತೆರಿಯೆರೆ ಜಡ್ತೆ ನಡತೊಂದುಂಡು. ಡ್ರೈವರ್ ಪೊರ್ತುಗು ತಕ್ಕ ನಿರ್ಧಾರ ಗೆತೊಂದಿನೆರ್ದಾವರ ಮಲ್ಲ ಅನಾಹುತ ಒಂಜಿ ತತ್ತ್ದ್ಂಡ್.