Last updated on September 14th, 2026 at 08:07 am
ಸೆ. 14: ಸುಮಾರ್ ವರ್ಸೊರ್ದಿಂಚಿ ನಮ ತುಳುವೆರ್ ತುಳುನು ಕರ್ನಾಟಕ ಬೊಕ್ಕ ಕೇರಳ ರಾಜ್ಯೊಲೆಡ್ ಅಧಿಕೃತ ಮಲ್ಪುಲೆ ಪನ್ಪಿ ಕಾಯೆಸ್ನ್ ಸರಕಾರೊಲೆನ ಎದುರುಡು ದೀವೊಂದೇ ಬೈದ, ಆಂಡ ಈತ್ನೆಟ ಈ ವಿಷಯೊಡು ಇತ್ತೆ ಇಪ್ಪುನಾತ್ ಮುಟ್ಟ ಒರಲಾ ಬೈದಿಜ. ಆಂಡ ಈ ಸರ್ತಿ ದಾದನೋ ಒಂಜಿ ಎಡ್ಡೆ ಸುದ್ದಿ ಕೇನರೆ ತಿಕ್ಕುಂಡುಂದ್ ಸುದ್ದಿ ತಿರ್ಗೊಂದುಂಡು. ಜನಪ್ರತಿನಿಧಿಲೆನ ಬಾಯಿಡ್ ಈತ್ನೇಟ ಆತ್ ತಿಂಗೊಲುಡು ಆಪುಂಡು, ಈತ್ ತಿಂಗೊಲುಡು ಆಪುಂಡು, ಮಿತ್ತ್ಲಾ ನಮ ತಿರ್ತ್ಲಾ ನಮ ಈ ಸರ್ತಿ ಆಪುಂಡು,ಈ ಸರ್ತಿ ಆಯಿಜಿಂಡ ನನ ಏಪ ಆಯೆರೆ, ನಮ ಮಲ್ತ್ದೇ ಮಲ್ಪುವ ಪನ್ಪಿ ಪಾತೆರೊಲೆನ್ ಕೇಂಡಿನ ಅತ್ತಂದೆ ರಾಜಕೀಯ ಇಚ್ಛಾಶಕ್ತಿ ತೋಜಾಯಿನಕುಲು ಏರ್ಲಾ ಇಜ್ಜಿ. ನಮ್ಮ ಊರುದಕುಲೇ ಸಚಿವೆರಾದುಪ್ಪುನ ಪೊರ್ತುಡು ವೋಟು ಮುಟ್ಟ ಬನ್ನಗ ಮಲ್ದಿನ ನಾಟಕೊಲೆನ್ ನಮ ತೂದು ಕಣ್ಣ್ ದಿಂಜಾವೊಂದಿನಕುಲು!
ನಮ ತುಳುವೆರ್ ನಮ್ಮ ನಾಡ್, ಭಾಷೆದ ಇಷಯೊಡು ಕೋಡಿ ಎತ್ತಾದಿನ ವಿಷಯೊಲು ಬಾರೀ ಕಮ್ಮಿ. ಶಿಕ್ಷಣೊಡು ತುಳುವೆರೆಗ್ ಬೇತೆನೇ ಬೋರ್ಡ್ ಬೋಡು, ತುಳು ಭಾಷೆಗ್ ಕರ್ನಾಟಕ, ಕೇರಳಡ್ ಅಧಿಕೃತ ಮಾನಾದಿಗೆ, ನೇತ್ರಾವತಿನ್ ತಿರ್ಗಾವುನೆನ್ ಉಂತಾವುನು, ಪವರ್ಲೈನ್ ಪುದರ್ಡ್ ನುಪ್ಪುದ ಬಟ್ಟಲ್ ಲೆಕಂತಿನ ಸಾಗೋಲಿದ ಕಂಡೊಲೆನ್ ನಾಶ ಮಲ್ಪುನೆನ್, ಎಸ್ಇಝೆಡ್, ನಮ್ಮ ಸುದೆಕ್ಲೆಗ್ ಕಾರ್ಖಾನೆಲೆನ ತೆಟ್ಟ್ ನೀರ್ ಬರಂದಿಲೆಕ ಮಲ್ಪುನವು, ಜಿಲ್ಲೆದ ಪುದರ್ ಪಗಪುನವು ಇಂಚ ಪಾಕ ವಿಷಯೊಲೆಡ್ ನಮ ಅರ್ಧ ಸಾದಿಡೇ ಉಂತುದು ಪೋತ. ಎಣ್ಮನೇ ಪರಿಚ್ಛೇದೊದಲಾ ಆತೇ. ಏರಾಂಡಲಾ ಅಲ್ಪ ಪೊಕ್ಕಡೆ ಆತೊಂಜಿ ಪ್ರಾಮುಖ್ಯತೆದಾಂತಿನ ಜೀರೋಅವರ್ಡ್ ಪಾತೆರ್ಯೆರ್ಂಡ, ಅತ್ತ್ಂಡ ವಿಧಾನಸಭೆಟ್ ನಾಲ್ ತುಳುಟು ಪಾತೆರ್ಯೆರ್ಂಡನೇ ನಮಕ್ ಮಲ್ಲ ಕುಸಿ, ಅವೆರ್ದ್ ಬೊಕ್ಕ ದಾದ ಆಂಡ್ ಪನ್ದ್ ಕೇನರೆ ನಮ್ಮೆಟ್ ಪೋಪುನಕುಲು ಬಾರೀ ಕಮ್ಮಿ.
ಇಂದುವೇ ಬರ್ಪಿನ ಸೆಪ್ಟೆಂಬರ್ 18 ಗ್ ಕುಡ್ಲಡ್ ನಡಪುನ ಸಂಚಿವ ಸಂಪುಟೊದ ಇನಯೊಡು ಕುಡ್ಲನ್ ಕಾಲಿ ಒಂಜಿ ಬಂಗಾರ್ದ ಕೆತ್ತಿ ದೀಪಿನ ಪೆರಡೆ ಲೆಕ ತೂವಂದೆ ಈ ಮಣ್ಣ್ಗ್, ಈ ಮಣ್ಣ ಜೋಕುಲೆಗ್, ಮುಲ್ಪದ ಭಾಷೆಗ್ ದಾಲ ಎಡ್ಡೆ ಆಪಿನ ಬೇಲೆ ಆವಡ್. ಕುಡ್ಲನ್ ಗೋವಾ ದ ಲೆಕ ಮಲ್ಪೆರೆ ಪೋದು, ಮುಲ್ಪದ ನೆಲಮೂಲ ಸಂಸ್ಕೃತಿಗ್ ಪೆಟ್ಟ್ ಪಾಡುನ ಪುನೆಪು ನಡಪುನ ಬೊರ್ಚಿ, ಅಭಿವೃದ್ಧಿದ ಪುದರ್ಡ್ ನನಲಾತ್ ಕಾಡ್, ಮರ, ದೈ ಕಡ್ಪುನ, ಸಾನ-ಕಟ್ಟೆಲೆನ್, ಬನೊಕ್ಲೆನ್ ನಾಶ ಮಲ್ಪುನ ಯೋಜನೆಲೆನ್ ಕನಪುನ ಬೊರ್ಚಿ ಪನ್ದ್ ತುಳುವೆರಾದ್ ನಮ ಕೇಂಡೊನೊಡು.
ತುಳು ಭಾಷೆದ ವಿಷಯೊಡು ತುಳುವೆರೆ ನಡುಟು ಈ ಸಚಿವ ಸಂಪುಟೊದ ಇನಯೊಡೇ ತುಳು ಭಾಷೆನ್ ಅಧಿಕೃತ ಘೋಷಣೆ ಮಲ್ಪುವೆರ್ ಪನ್ಪಿ ಪಾತೆರೊಲು ತಿರ್ಗೊಂದಿತ್ತ್ದ್, ಇಂದೇ ಪೊರ್ತುದ ಲಾಭ ಗೆತೊನರೆ ಮುಲ್ಪದ ರಾಜಕಾರಣಿಲುಲಾ ಮನವಿ ಕೊರ್ಪ, ಮನವಿ ಕೊರ್ಪ ಪನ್ಪಿ ನಾಟಕಲಾ ಗೊಬ್ಬೊಂದುಲ್ಲೆರ್, ಸತ್ಯ ಪನೊಡಾಂಡ ಉಂದು ಮನವಿದ ಪೊರ್ತತ್ತ್, ಒತ್ತಾಯ ಮಲ್ಪುನ ಪೊರ್ತು. ಕಾಲಿ ಮನವಿಡೇ ಆಪುಂಡ ಏಪೊನೇ ಆತೊಡು, ಪ್ರತಿ ಅಧಿವೇಶನ ಬನ್ನಗ ಈ ಸರ್ತಿ ಆಪುಂಡು, ಈ ಸರ್ತಿ ಆಪುಂಡು ಪನ್ದ್ ಕಾತೊಂದು ಕುಲ್ಲುನ ಪರಿಸ್ಥಿತಿ ಬೈದುವಂದ್.
ಈ ಸಚಿವ ಸಂಪುಟೊದ ಸಭೆ ಮೂಂಕುದ ಕೊಡಿಕ್ ನೆಯಿ ಪೂಜುನ ಕುಡೊಂಜಿ ನಾಟಕ ಆವಂದೇ ಉಪ್ಪಡ್, ಕುಡ್ಲನ್ ಕಾಲಿ ಸರ್ಕಾರೊಗು ಕಾಸ್ ದಿಂಜಾವುನ ಜಾಗೆ ಲೆಕ ಮಲ್ಪಂದೆ, ಈ ಮಣ್ಣ್ಗ್ ಗೌರವ ತೋಜಾವುನಂಚಿನ ನಿರ್ಧಾರೊಲು, ಘೋಷಣೆಲು ಕೇನರೆ ತಿಕ್ಕಡ್.