Last updated on September 20th, 2026 at 04:35 pm
ಕಾರ್ಲ, ಸೆ. 20: ಕಾರ್ಲ-ಬೆದ್ರ ಪೆರ್ಸಾದಿದ ಸಾಣೂರ್ ಜಂಕ್ಷನ್ದ ಕೈತಲ್ ನಡತಿನ ಭೀಕರ ಎಡ್ತೆಡ್ ಮಾಜಿ ಸಚಿವೆರ್ ಬೊಕ್ಕ ಪೆರಿಯ ಕಾಂಗ್ರೆಸ್ ಮುಖಂಡೆ ಬಿ. ರಮಾನಾಥ ರೈ ಬೊಕ್ಕ ಆರೆನ ಕಾರ್ ಡ್ರೈವರ್ ಜೂವೊಗು ದಾಲ ಎಚ್ಚಿಕಮ್ಮಿ ಆವಂದೆ ಬಚಾವಾತೆರ್.
ಕಾರ್ಲರ್ದ್ ಬೆದ್ರದಂಚಿ ಬೀಸ ಪೋವೊಂದಿತ್ತಿನ ಪ್ರೈವೇಟ್ ಬಸ್ ಬೊಕ್ಕ ರಮಾನಾಥ ರೈಕುಲು ಪೋವೊಂದಿತ್ತಿನ ಇನ್ನೋವಾ ಕಾರ್ (KA 70 A 0099) ಭೀಕರವಾದ್ ಎದುರೆದುರು ಎಡ್ತೊಂದ.
ನಡಪುದ ಒಲವು ಬೊಕ್ಕ ರಕ್ಷಣಾ ಕಾರ್ಯ:
ಎಡ್ತಿನ ಬರಸ್ಗ್ ಕಾರ್ದ ಎದುರು ಮೆಯಿ ಅಲಕ್ಕ ಞಕ್ಕೆ ಆದಿತ್ತ್ದ್, ಗ್ಲಾಸ್ ಮಾತಾ ಪುಡಾದ್ಂಡ್. ಕಾರ್ದ ಉಲಯಿ ಏರ್ಬ್ಯಾಗ್ಲು ಓಪನ್ ಆದಿತ್ತ್ಂಡಲಾ, ಎಡ್ತಿನ ಬರಸ್ಗ್ ಎದುರು ಕುಲ್ಲುದಿತ್ತಿನ ಮಾಜಿ ಸಚಿವೆ ರಮಾನಾಥ ರೈಕುಲು ಬೊಕ್ಕ ಕಾರ್ ಡ್ರೈವರ್ ಉಲಯಿ ತಿಕ್ಕ್ದ್ ಬೂರೊಂದೆರ್. ಅಲ್ಪನೇ ಕೈತಲ್ ಇತ್ತಿನಕುಲು ಅಪಗನೇ ಬತ್ತ್ದ್, ಬಾರೀ ಪೊರ್ಮ್ಬುದು ಅಕಲೆನ್ ಕಾರ್ರ್ದ್ ಪಿದಯಿ ಕನತ್ದೆರ್.
ಆಸ್ಪತ್ರೆಗ್ ದಾಕಲ್:
ಎಡ್ತೆಡ್ ಗಡಿಕುಲಾತಿನ ರಮಾನಾಥ ರೈ ಬೊಕ್ಕ ಕಾರ್ ಡ್ರೈವರ್ನ್ ಅಪಗನೇ ಕಡೀರ ಮರ್ದ್ ಮಲ್ತ್ದ್ ಎಚ್ಚಿಗೆ ಮರ್ದ್ಗ್ ಕುಡ್ಲದ ಆಸ್ಪತ್ರೆಗ್ ದಾಕಲ್ತ್ದೆರ್. ಬೆರ್ಮೆರೆ ದಯೆಟ್ ಇರ್ವೆರ್ಲಾ ಪ್ರಾಣಾಪಾಯೊರ್ದು ಬಚಾವಾತೆರ್ ಪನ್ದ್ ತೆರಿದ್ ಬೈದ್ಂಡ್. ಬಸ್ ಬೊಕ್ಕ ಕಾರ್ಡ್ ಇತ್ತಿನ ಬೇತೆ ಜನೊಕ್ಲೆಗ್ ಕಿಞ್ಞ ಕಿಞ್ಞ ಗಡಿಕುಲಾದಿತ್ತ್ದ್, ಕೈತಲ್ ಇತ್ತಿನಕುಲು ಆಸ್ಪತ್ರೆಗ್ ಲೆತೊಂದು ಪೋಯೆರ ಸಕಾಯ ಮಲ್ತ್ದೆರ್.
ರಮಾನಾಥ ರೈಕುಲು ಒಡಿಯೂರ್ಡ್ ನಡತಿನ ಒಡಿಯೂರು ಶ್ರೀ ವಿಕಾಸವಾಹಿನಿ ಸಂಭ್ರಮ ಬೊಕ್ಕ ನೇರಳಕಟ್ಟೆದ ಒಂಜಿ ಲೇಸ್ ಮುಗಿತ್ದ್, ಕುಡ್ಲದ ಕಾರ್ಯಕ್ರಮ ಮುಗಿತ್ದ್ ಕಾರ್ಲದ ಕುಡೊಂಜಿ ಸಮಾರಂಭೊಗು ಪೋವೊಂದುಪ್ಪುನಗ ಈ ನಡಪು ನಡತ್ದ್ಂಡ್. ಪೋಲೀಸೆರ್ ಬತ್ತ್ದ್ ಪರಿಶೀಲನೆ ಮಲ್ತ್ದೆರ್.