Last updated on September 23rd, 2026 at 03:18 pm
ರಾಮಕುಂಜ, ಸೆ.23: ಕಡಬ ತಾಲೂಕ್‌ದ ರಾಮಕುಂಜ ಗ್ರಾಮೊದ ಕಾಜರುಕ್ಕು ದಿ| ವಿಶ್ವನಾಥ ಪೂಜಾರ್ಲೆನ ಮಗೆ, ಕೆಸಿಡಿಸಿ ಡ್ ಕಂತ್ರಾಟ್ ಆಧಾರೊಡು ಅರಣ್ಯ ವೀಕ್ಷಕೆ ಆದ್ ಬೇಲೆ ಮಲ್ತೊಂದಿತ್ತಿನ ಸಚಿನ್ ಪೂಜಾರಿ (33ವ.) ಮೇರ್ ಸೆ.22 ತಾನಿ ಮಧ್ಯಾಹ್ನ 3 ಗಂಟೆದ ಅಂದಾಜಿಗ್ ಹಾರ್ಟ್ ಅಟ್ಯಾಕ್‌ ಆದ್ ತೀರ್ದೆರ್.
ಕಾಜರುಕ್ಕು ಪನ್ಪಿನಲ್ಪ ಬೈಕ್ ಸರ್ವೀಸ್ ಸ್ಟೇಷನ್ ಮಲ್ತಿತ್ತಿನ ಸಚಿನ್ ಅವೆನ್ ಬುಡ್ದು ಕರಿನ ಒಂಜರೆ ವರ್ಸೊರ್ದಿಂಚಿ ಕರ್ನಾಟಕ ಕ್ಯಾಶ್ಯೂ ಡೆವಲಪ್‌ಮೆಂಟ್ ಬೋರ್ಡ್ ಮಂಗಳೂರು ವಿಭಾಗೊಡು ಕಂತ್ರಾಟ್ ಆಧಾರೊಡು ಅರಣ್ಯ ವೀಕ್ಷಕೆ ಆದ್ ಬೇಲೆ ಮಲ್ತೊಂದಿತ್ತೆರ್.
ಏಪಾಂಡಲ ಒರ ಮಧ್ಯಾಹ್ನ ಇಲ್ಲಗ್ ವನಸ್‌ಗ್ ಬರೊಂದಿತ್ತೆರ್‌ಗೆ. ಸೆ.22 ತಾನಿ ಮಧ್ಯಾಹ್ನ 1.30ತ ಅಂದಾಜಿಗ್ ಇಲ್ಲಗ್ ಬತ್ತ್ ವನಸ್ ಮಲ್ತ್ ಜೆತ್ತಿತ್ತಿನ ಸಚಿನ್‌ರೆನ್ ಆರೆನ ಅಪ್ಪೆ ಮಧ್ಯಾಹ್ನ 3 ಗಂಟೆದ ಅಂದಾಜಿಗ್ ಲಕ್ಕಾಯೆರೆ ಪೋನಗ ಸಚಿನ್ ಜೋರುಡು ದಮ್ಮು ದೆತ್ತೊಂದಿತ್ತಿನೆನ್ ತೂದು ಕುಡೊರಿ ಮಗೆ ಚರಣ್‌‌ಗ್ ಫೋನ್ ಮಲ್ತ್ ತೆರಿಪಾದೆರ್. ಚರಣ್ ಮೇರ್ ಇಲ್ಲಗ್ ಬನ್ನಗ ಸಚಿನ್ ದಮ್ಮು ದೆಪ್ಪೆರಾವಂದೆ ಬಂಙ ಬರೊಂದಿತ್ತಿನೆನ್ ತೂದು ಕೈತಲ್ದ ಪ್ರಶಾಂತ್ ಪನ್ಪಿನಾರೆನ ಕಾರ್‌ಡ್ ಮರ್ದ್‌ಗ್ ಕೊಯಿಲ ಪ್ರಾಥಮಿಕ ಆರೋಗ್ಯ ಕೇಂದ್ರೊಗು ಲೆತೊಂದು ಪೋದಿತ್ತ್‌ದ್, ಅಲ್ಪ ಮಧ್ಯಾಹ್ನ 3.10ತ ಅಂದಾಜಿಗ್ ಪರೀಕ್ಷೆ ಮಲ್ತಿನ ವೈದ್ಯಾಧಿಕಾರಿಲು ಸಚಿನ್ ತೀರ್ದೆರ್ ಪನ್ದ್ ದೃಢ ಮಲ್ತ್‌ದೆರ್ ಪನ್ದ್ ವರದಿ ಆತ್ಂಡ್
ಬೊಕ್ಕ ಪುನೊನು ಕಡಬ ಸಮುದಾಯ ಆರೋಗ್ಯ ಕೇಂದ್ರೊಡು ಮರಣೋತ್ತರ ಪರೀಕ್ಷೆ ಮಲ್ತ್‌ದೆರ್. ಸಚಿನ್ ಹಾರ್ಟ್ ಅಟ್ಯಾಕ್‌ ಅತ್ತ್ಂಡ ಒವ್ವಾ ಖಾಯಿಲೆಡ್ ತೀರ್ದಿತ್ತ್‌ದ್ ಈ ಮರಣೊಡು ಬೇತೆ ದಾಲ ಸಂಶಯ ಇಜ್ಜಿ ಪನ್ದ್ ತೀರ್ದಿನ ಸಚಿನ್‌ರೆನ ಪಲಯೆ ಚರಣ್ ಬರೆಪಾದಿನ ಒಯಿಲ್‌ದ ಪ್ರಕಾರ ಕಡಬ ಪೊಲೀಸೆರ್ ಪ್ರಕರಣ ದಾಕಲ್ತೊಂದೆರ್.