Last updated on September 23rd, 2026 at 04:52 pm
ಸೆ. 23: ಕಾಂಗ್ರೆಸ್ ಆಡಳಿತೊದ ಕರ್ನಾಟಕ ರಾಜ್ಯ ಸರಕಾರ ತುಳು ಭಾಷೆನ್ ತುಳುನಾಡ ರಡ್ಡ್ ಜಿಲ್ಲೆಲೆಡ್ ಆಡಳಿತ ಭಾಷೆ ಮಲ್ತ್‌ದ್ ಮಾಮಲ್ಲ ಐತಿಹಾಸಿಕ ನಿರ್ಧಾರ ಗೆತೊಂದುಂಡು. ಇಂದೆತ ಅನುಷ್ಠಾನೊದ ಬಗೆಟ್ ನನ ತೂವೊಡಾತೆ, ಆಂಡ ಈ ಒಂಜಿ ಷೋಷಣೆ ತುಳುವೆರೆ ಪಾಕ ವರ್ಸೊದ ಪೊರ್ಮ್ಬುಗೊಂಜಿ ಇನಾಮು ತಿಕ್ಕಿಲೆಕ ಆತ್ಂಡ್.
ಇತ್ತೆ ಈ ಗೆಲ್ಮೆದೊಟ್ಟುಗು ತುಳುನಾಡ್‌ದ ನನೊಂಜಿ ಜಿಲ್ಲೆ, 1956 ಟ್ ದೂರ ಆದ್ ಕೇರಳಂ ಗ್ ಸೇರ್ದಿನ ಕಾಸ್ರೋಡ್ ಜಿಲ್ಲೆಡ್ಲಾ ತುಳುನು ಅಧಿಕೃತ ಮಲ್ಪೊಡು ಪನ್ಪಿ ಒತ್ತಾಯ ಕೇನ್ದ್ ಬರೊಂದುಂಡು. ಐತಿಹಾಸಿಕವಾದ್ ತುಳುನಾಡ್‌ದ ತೆನ್ಕಾಯಿ ಮೆಯಿ ಕಾಸ್ರೋಡ್‌ಡ್ ವರ್ಸ ಮಗ್‌ರ್ಲೆಕನೇ ತುಳು ಪಾತೆರುನಕ್ಲೆನ ಸಂಖ್ಯೆ ಕಮ್ಮಿ ಆವಂದುಂಡು. ತುಳುವ ನೆಲೊಟೇ ತುಳುನಕ ನಿಲೆದಾಂತಿಲೆಕ ಆವೊಂದುಂಡು.
ಇತ್ತೆ ಕಾಸ್ರೋಡ್‌ನ್ ‘ಸಪ್ತಭಾಷಾ ಸಂಗಮ ಭೂಮಿ’ ಪನ್ದ್ ಲೆತ್ತ್ಂಡಲಾ ಪಿರಾಕ್‌ಗೊರ ಮುಕುಡ್ದ್ ತೂನಗ ಈ ಮಣ್ಣ್‌ಡ್ ಇತ್ತಿನಿ ತುಳು, ಬೊಕ್ಕ ಬಾಕಿದ ಬಾಸೆಲು ಒಂಜೊಂಜೇ ಬತ್ತ ಪನ್ದ್ ತೆರಿಪುಂಡು. ಈ ಮಣ್ಣಮೂಲೊದ ಭಾಷೆದ ಒರಿಪುಗು ಕೇರಳಂದ ತುಳುವೆರೆ ಪೊರ್ಮ್ಬಾಟ. ಆಡಳಿತ ಅತ್ತ್ಂಡ ಅಧಿಕೃತ ಭಾಷೆದ ಮಾನಾದಿಗೆ ತಿಕ್ಕ್ಂಡ ಮಾತ್ರ ಕಾಸ್ರೋಡ್‌ಡ್ ತುಳುನು ಒರಿಪಾವರೆ ಸಾಧ್ಯ ಇಜ್ಜಿಂಡ ರಾಜಾಶ್ರಯ ಇತ್ತಿ ಭಾಷೆಲೆ ನಡುಟು ತುಳುನು ದೊಂಕರೆ ತೂಪಿನಕ್ಲೆ ನಡುಟು ತುಳುನು ಒರಿಪಾವುನ ಬಾರೀ ಬಂಙದ ಬೇಲೆ. ಅಂಚಾದ್ ಕೇರಳಂ ರಾಜ್ಯ ಸರ್ಕಾರ ಈ ಬಗೆಟ್ ಚಿಂತನೆ ಮಲ್ತ್‌ದ್ ತುಳುನು ಅಧಿಕೃತ ಭಾಷೆ ಮಲ್ತ್‌ದ್ ತುಳುನಾಡ್‌ದ ಭಾಷೆ, ಸಂಸ್ಕೃತಿ ಒರಿಪಾವುನಂಚಿ ಒಂಜಿ ಮಲ್ಲ ಪಜ್ಜೆ ದೀವೊಡು ಪನ್ದ್ ಕೇರಳಂಡ್ ಇಪ್ಪುನ ತುಳುವೆರೆ ಬಿನ್ನಪು.
ಎಚ್ಚಿಗೆ ರಾಜ್ಯೊಲೆಡ್ ಒಂಜೆರ್ದ್ ಎಚ್ಚ ಬಾಸೆಲು ಆಡಳಿತ ಆತ್ತ್ಂಡ ಅಧಿಕೃತ ಬಾಸೆಲು ಆದುಲ್ಲ, ಅಂಚಾದ್ ಉಂದೆಕ್ ಕಾನೂನ್‌ಡ್ ಮಲ್ಲ ತಲೆಪಾಪುಜಿ. ಕರ್ನಾಟಕೊಡು ಮಲ್ತಿಲೆಕನೆ ಕೇರಳಂಡ್ಲಾ ಮಲ್ಪಡ್ ಪನ್ದ್ ತುಳುವೆರೆ ಕಾಯೆಸ್.