Last updated on September 25th, 2026 at 08:35 am
ಜಪಾನ್, ಸೆ. 25 : ಏಷ್ಯನ್ ಕ್ರೀಡಾಕೂಟೊದ ಅಥ್ಲೆಟಿಕ್ಸ್ ವಿಭಾಗೊಡು ಭಾರತೀಯ ಅಥ್ಲೀಟ್‌ನಕುಲು ಪದಕೊದ ಬೋಂಟೆನ್ ದುಂಬರಿತ್‌ದಿತ್ತ್‌ದ್, ರೋಚಕವಾದ್ ನಡತಿನ 4×400 ಮೀಟರ್ ಮಿಕ್ಸ್‌ಡ್ ರಿಲೇ (Mixed 4x400m Relay) ಡ್ ಭಾರತ ತಂಡ ಬೊಲ್ಲಿದ ಪದಕ ಗೆಂದ್‌ದ್ಂಡ್. ಅಕೇರಿ ಮುಟ್ಟಲಾ ಕೊಡಿಕಾರ್‌ಡ್ ಉಂತುಲೆಕಮಲ್ತಿತ್ತಿನ ಈ ಪಂತೊಡು ಎಡ್ಡೆ ಫಿನಿಶಿಂಗ್ ಕೊರ್ನ ಭಾರತ ಬಹ್ರೇನ್ ರ್ದ್ ಬೊಕ್ಕ ರಡ್ಡನೇ ಸ್ಥಾನ ಗೆತೊಂದು ಬೊಳ್ಳಿದ ಪದಕೊಗು ಗೆದ್‌ದ್ಂಡ್.
ಭಾರತ 3:14.46 ನಿಮಿಷೊಡು ಈಡ್ ಎತ್ತ್‌ದ್ ರಡ್ಡನೇ ಸ್ಥಾನ ಗೆಂದ್ಂಡ್. ಕಾಲಿ 0.08 ಸೆಕೆಂಡ್‌ಲೆನ ಬಜೀ ಎಲ್ಯ ಅಂತರೊಡು ಭಾರತೀಯ ಅಥ್ಲೀಟ್‌ನಕುಲು ವಿಯೆಟ್ನಾಂ ನ್ ಪಿರವು ಪಾಡ್ಯೆರ್. ವಿಯೆಟ್ನಾಂ 3:14.54 ನಿಮಿಷೊಡ್ ಬಲಿಪು ಮುಗಿತ್‌ದ್ ಮೂಜನೇ ಸ್ಥಾನೊದೊಟ್ಟುಗು ಕಂಚಿದ ಪದಕೊ ಗೆಂದ್ಂಡ್. ಬಾರೀ ಎಡ್ಡೆಡ್ ಬಲಿತಿನ ಬಹ್ರೇನ್ 3:12.87 ನಿಮಿಷಡ್ ಈಡ್ ಎತ್ತ್‌ದ್ ಬಂಗಾರ್‌ದ ಪದಕೊ ಗೆಂದ್ಂಡ್.
ಬಲಿಪುದ ಸುರುಟು ಬಹ್ರೇನ್ ಎದುರೇ ಇತ್ತ್ಂಡಲಾ, ರಡ್ಡ್ ಬೊಕ್ಕ ಮೂಜನೇ ಸ್ಥಾನೊಗು ಭಾರತ ಬೊಕ್ಕ ವಿಯೆಟ್ನಾಂ ನಡುಟು ಬಾರೀ ಪೈಪೋಟಿ ನಡತ್ಂಡ್. ಅಕೇರಿದ ಲ್ಯಾಪ್‌ಡ್ ಭಾರತೊದ ಅಥ್ಲೀಟ್ ಬಲಿತಿನ ಬರಸ್‌ಗ್ ಭಾರತೊಗು ಬೊಲ್ಲಿ ತಿಕ್ಕ್‌ದ್ಂಡ್. ಈ ಮಹತ್ವೊದ ಗೆಲ್ಮೆದ ಒಟ್ಟುಗು ಭಾರತೀಯ ಅಥ್ಲೆಟಿಕ್ಸ್ ಕೂಟ ಈ ಸರ್ತಿದ ಏಷ್ಯನ್ ಕ್ರೀಡಾಕೂಟದ ತನ್ನ ಪದಕದ ಪಟ್ಟಿಗ್ ಕುಡೊಂಜಿ ಪದಕ ಗೋಡ್ಯಾದ್ಂಡ್.