Last updated on October 24th, 2026 at 03:40 pm
ಬಂಟ್ವಾಳ, ಅ.24: ವೈವಾಹಿಕ ಲಡಯಿಡ್ ಕಂಡನ್ಯನ ಕೈಟ್ ಪೆಟ್ಟ್ ತಿನ್ತಿನ ಪೊಂಜೊವು ಒರ್ತಿ ಅನುಮಾನಾಸ್ಪದವಾದ್ ತೀರ್ದಿನ ನಡಪು ಬಂಟ್ವಾಳದ ವಗ್ಗ ಪನ್ಪಿನಲ್ಪ ನಡತ್‌ದ್ಂಡ್. ನಡಪುಗು ಸಂಬಂಧಿತ್‌ದ್ ಬಂಟ್ವಾಳ ಗ್ರಾಮಾಂತರ ಪೊಲೀಸೆರ್ ಕೆರ್ತಿನ ಪ್ರಕರಣ ದಾಕಲ್ತೊಂದಿತ್ತ್‌ದ್, ಆರೋಪಿ ಕಂಡನ್ಯನ್ ಉಲಕೈ ಮಲ್ತ್‌ದ್ ವಿಚಾರಣೆ ಮಲ್ತೊಂದುಲ್ಲೆರ್.
ಬಾಗಲಕೋಟೆ, ಜಮಖಂಡಿ ಮೂಲೊದ ಆರೋಪಿ ಸಂಜೀವಕುಮಾರ್ (36) ನ ಬೊಡೆದಿ ಸುನೀತಾ ಮಹಾದೇವ್ ದೇಸಂಗಿ (34) ತೀರ್ದಿನ ಪೊಂಜೊವು. ಈ ದಂಪತಿ ಬಂಟ್ವಾಳ ತಾಲೂಕ್‌ದ ವಗ್ಗಡ್ ಇತ್ತೆರ್.
ತೀರ್ದಿನಾರೆನ ಮೆಗ್ಯೆ ಬೆಳಗಾವಿ ಜಿಲ್ಲೆದ ಅಥಣಿ ನಿವಾಸಿ ಅರುಣ್ ಮಹಾದೇವ್ ದೇಸಂಗಿ (26) ಬರೆಪಾದಿನ ಒಯಿಲ್‌ದ ಆಧಾರೊಡು ಪ್ರಕರಣ ದಾಕಲ್ತೊಂದೆರ್.
ಒಯಿಲ್‌ದ ಪ್ರಕಾರ, ಸುನೀತಾ ಬೊಕ್ಕ ಕಂಡನ್ಯನ ನಡುಟು ಮನಸ್ತಾಪೊಲು ಇತ್ತ್‌ದ್, ಸಂಬಂಧಿಕೆರ್ ರಾಜಿ ಪಂಚಾತಿಗೆ ಮಲ್ಪಾದಿತ್ತೆರ್. ಪೆದ್ದಿ ಬೊಕ್ಕ ಸುನೀತಾ ಆರೆನ ಅಪ್ಪೆ ಇಲ್ಲಡ್ ಇತ್ತೆರ್. ಅಕ್ಟೋಬರ್ 4 ತಾನಿ ಆರೋಪಿ ಕಂಡನೆ ಸಂಜೀವಕುಮಾರ್ ಆರೆನ್ ಬಂಟ್ವಾಳದ ಇಲ್ಲಗ್ ಲೆತೊಂದು ಬತ್ತಿತ್ತೆ.
ಅಕ್ಟೋಬರ್ 22 ತಾನಿ ಸುನೀತಾ ಮೆಗ್ಯಗ್ ಫೋನ್ ಮಲ್ತ್, ಕಂಡನೆ ಆರೆಗ್ ಕಿರುಕುಳ ಕೊರೊಂದುಪ್ಪುನೆನ್, ಆಕುನೆನ್ ಮಾತಾ ತೆರಿಪಾದೆರ್. ಅಕ್ಟೋಬರ್ 23 ತ ಕಾಂಡೆ ಸಂಜೀವಕುಮಾರ್ ದೂರುದಾರೆ ಅರುಣ್‌ಗ್ ಫೋನ್ ಮಲ್ತ್‌ದ್, ಸುನೀತಾ ಉಸಾರ್ ತತ್ತ್‌ದಲ್, ಆಸ್ಪತ್ರೆಗ್ ಲೆತೊಂದು ಪೋವೊಂದುಲ್ಲ ಪನ್ದ್ ಪನ್ತೆ.
ಅರುಣ್ ಅಪಗನೇ ಬತ್ತ್‌ದ್ ತನ್ನ ಪಲಿನ್ ತೂನಗ ಆಲ್ ತೀರ್ದಿನ ತೆರಿದ್ ಬೈದ್ಂಡ್. ಪುನೊತ ಪರಿಶೀಲನೆ ಮಲ್ಪುನಗ ಆಕ್‌ದಿನ ಗಡಿತ ಗುರ್ತ ಬೊಕ್ಕ ನೆತ್ತೆರ್‌ದ ಕಲೆ ತೋಜಿದ್ ಬೈದ್ಂಡ್. ಕೌಟುಂಬಿಕ ಲಡಯಿರ್ದಾವರ ಅಕ್ಟೋಬರ್ 22 ತ ರಾತ್ರೆ ಬೊಕ್ಕ ಅಕ್ಟೋಬರ್ 23 ತ ಕಾಂಡೆ ಸಂಜೀವಕುಮಾರ್ ಸುನೀತಾ ಗ್ ತಾರಾಮಾರ ಆಕ್‌ದ್ ಕೆರ್ತೆ ಪನ್ದ್ ಒಯಿಲ್‌ಡ್ ಬರೆಪಾದೆರ್.
ಒಯಿಲ್‌ದ ಪ್ರಕಾರ ಬಂಟ್ವಾಳ ಗ್ರಾಮಾಂತರ ಪೊಲೀಸ್ ಸ್ಟೇಶನ್‌ಡ್ ಅ.ಕ್ರ: 142/2026, ಕಲಂ:103 BNS 2023 ದ ಪ್ರಕಾರ ಪ್ರಕರಣ ದಾಕಲ್ತೊಂದು ಜಡ್ತೆ ಮಲ್ತೊಂದುಲ್ಲೆರ್.
ಆರೋಪಿ ಸಂಜೀವಕುಮಾರ್‌ನ್ ಉಲಕೈ ಮಲ್ತೊಂದು ವಿಚಾರಣೆ ಮಲ್ತೊಂದುಲ್ಲೆರ್.