Last updated on February 21st, 2023 at 07:05 pm
ಅತ್ತಾವರ ಬಾಲಕೃಷ್ಣ ಶೆಟ್ಟಿ ದೇಶದೊರ್ಮೆ ಎ.ಬಿ ಶೆಟ್ಟಿ ಪನ್ದ್ ಪುದರ್ ಪೋಯಿನಾರ್, ವಿಜಯ ಬ್ಯಾಂಕ್ ಕಟ್ಟಿನರೆನ ಬಗೆಟ್ ನಮಕ್ ಏತ್ ತೆರಿದ್ಂಡ್? ಮೇರ್ ಮದ್ರಾಸ್ ರಾಜ್ಯೊಡು ಮಂತ್ರಿಲಾ ಆದಿತ್ತೆರ್! ಮೆರೆನ ಕತೆನ್ ಇನಿ ಇರೆಗ್ ತೆರಿಪಾವ.
ಎ.ಬಿ ಶೆಟ್ಟಿ ಮುಲ್ಕಿದ ಸಾಹುಕಾರೆ ಕಾಳಪ್ಪ ಶೆಟ್ಟಿ ಬೊಕ್ಕ ಅತ್ತಾವರ ಉನ್ಹಕ್ಕೆನ ಮಗೆ ಆದ್ 1883ನೇ ಇಸವಿಡ್ ಪುಟ್ಟಿಯೆರ್. ಮೇರ್ ಕುಡ್ಲಡ್ ತನ್ನ ವಿದ್ಯಾಭ್ಯಾಸ ಕರಿತೆರ್. ತುಳುನಾಡ ಜನಕುಲೆಗ್ ವಿಶ್ವದ ಮಾತಾ ವಿಶಯೊಲಿ ತೆರಿಯೊಡು ಪನ್ಪಿ ಸಂಕಲ್ಪೊಡು “ನವಯುಗ” ಪವ್ಪಿನ ಪುದರ್ದ ಕನ್ನಡ ವಾರಪತ್ರಿಕೆನ್ ಸುರು ಮಲ್ತೆರ್. ಈ ವಾರ ಪತ್ರಿಕೆ ತುಳುನಾಡೊರ್ಮೆ 40 ರ್ದುಲಾ ಎಚ್ಚ ವರ್ಸ ಬಾರೀ ಪುಗಾರ್ತೆ ಪಡೆದಿತ್ತ್ಂಡ್.
ನವಯುಗ ವಾರಪತ್ರಿಕೆದೊಟ್ಟುಗು ಕುಡ್ಲಡ್ ಕೆನರಾ ಪ್ರಿಂಟಿಂಗ್ ಪ್ರೆಸ್ ಮಲ್ಪಾವರೆಲಾ ಮಲ್ಲ ನೆವನ ಆದ್ ಶೆಟ್ರ್ ಬೆರಿಟ್ ಇತ್ತೆರ್.
ಕುಡ್ಲದ ಬಂಟ್ಸ್ ಹಾಸ್ಟೆಲ್ಡ್ 1931ನೇ ಇಸವಿಡ್ ಎ.ಬಿ ಶೆಟ್ರ್ ವಿಜಯ ಬ್ಯಾಂಕ್‌ದ ಉದಿಪನ ಮಲ್ತೆರ್. ತುಳಿನಾಡೊರ್ಮೆ ಮಾತ್ರ ಅತ್ತಂದೆ ದೇಶದೊರ್ಮೆದ ಲಕ್ಷ ಲಕ್ಷ ಜನಕುಲೆಗ್ ಬೇಲೆ ಮಾತ್ರ ಅತ್ತಂದೆ ಸೇವೆನ್ಲಾ ಒದಗಿಸಾದ್ ಈ ಬ್ಯಾಂಕ್ ದೇಶೊಡೇ ಬಾರೀ ಪುಗಾರ್ತೆದ ಬ್ಯಾಂಕ್ ಆದಿತ್ತ್ಂಡ್. ಇಂಚೊಗು ಎ.ಬಿ ಶೆಟ್ರ್ ಕಟ್ಟಿನ ವಿಜಯ ಬ್ಯಾಂಕ್‌ನ್ ಕೇಂದ್ರ ಸರಕಾರ ಬ್ಯಾಂಕ್ ಆಫ್ ಬರೋಡದೊಟ್ಟುಗು ಗೋಡ್ಯಾಂಡ್.
ಎ.ಬಿ ಶೆಟ್ರ್ ಥಿಯೋಸೋಫಿಕಲ್ ಸೊಸೈಟಿ, ಬ್ರಹ್ಮ ಸಮಾಜ, ಆರ್ಯಸಮಾಜದ ಪ್ರಭಾವೊಗು ಬೈದಿತ್ತೆರ್. ಸಮಾಜೊಡು ತಿರ್ತ್‌ಡಿತ್ತಿನ ಜನಕುಲೆನ್ ಮಿತ್ತ್ ಕನೊಡು ಪನ್ದ್ ಬಾರೀ ಪುನೆಯೆರ್.
ಮೇರ್ ರಾಜಕೀಯೊಡ್ಲಾ ಸಕ್ರೀಯವಾದ್ ಇತ್ತೆರ್ 1949 ರ್ದ್ 1956 ನೇ ಇಸವಿದ ನಡುಟು ತುಳುನಾಡ್ ಮದ್ರಾಸ್ ರಾಜ್ಯೊದೊಟ್ಟು ಉಪ್ಪುನಗ ಕೃಷಿ ಇಲಾಖೆ, ಆರೋಗ್ಯ ಇಲಾಖೆ, ವಸತಿ ಇಲಾಖೆದಂಚಿನ ಸಚಿವಾಲಯೊದ ಮಂತ್ರಿ ಆದಿತ್ತೆರ್.
ಮೇರ್ ಕಲ್ಯಾಣಿ ಶೆಟ್ಟಿ ಮೆರೆನ್ ಮದ್ಮೆ ಆದಿತ್ತೆರ್. ಮೊಕಲೆಗ್ ರಡ್ಡ್ ಪೊಣ್ಣು ಬೊಕ್ಕ ರಡ್ಡ್ ಆನ್ ಜೋಕುಲು. ಎ.ಬಿ ಶೆಟ್ರ್ 1960ನೇ ಇಸವಿಡ್ ತನ್ನ 77ನೇ ವರ್ಸೊಡು ತೀರಿಯೆರ್.