Last updated on May 30th, 2023 at 09:24 am
ಕರ್ನಾಟಕೊಡು ಪೊಸತಾದ್ ಉಂಡಾತಿನ ಸರಕಾರೊದ 32 ಸಚಿವೆರೆಡ್ 31 ಜನೊಟ ಒಂಜಿ ಕೋಟಿರ್ದ್‌ಲಾ ಎಚ್ಚಿನ ಆಸ್ತಿ ಉಂಡು ಪಂದ್ ಸರ್ಕಾರೇತರ ಸಂಸ್ಥೆ ಅಸೋಸಿಯೇಷನ್ ಫಾರ್ ಡೆಮಾಕ್ರಟಿಕ್ ರಿಫಾರ್ಮ್ಸ್ ವರದಿ ಮಲ್ದ್ಂಡ್. ಚುನಾವಣಾ ಕಾಪು ಸಮಿತಿದ ಪ್ರಕಾರ 24 ಸಚಿವರೆನ ವಿರುದ್ಧ ಕ್ರಿಮಿನಲ್ ಪ್ರಕರಣೊಲು ಉಲ್ಲ.
ವಿಧಾನಸಭಾ ಚುನಾವಣೆಟ್ 224 ಕ್ಷೇತ್ರೊಲೆಡ್ ಕಾಂಗ್ರೆಸ್ 135 ಕ್ಷೇತ್ರೊಲೆನ್ ಗೆಂದ್‌ದ್, ಸಿದ್ದರಾಮಯ್ಯೆರ್ ಕರ್ನಾಟಕೊದ ಮುಖ್ಯಮಂತ್ರಿಯಾತೆರ್. ಮೇ 20ದಾನಿ ಉಪಮುಖ್ಯಮಂತ್ರಿ ಡಿ. ಕೆ. ಶಿವಕುಮಾರ್ ಸೇರ್ದ್ ಒರ್ಂಬ ಜನ ಸಚಿವೆರ್ ಸಂಪುಟೊಗು ಗೋಡಿದೆರ್. ಮೇ 27 ತಾನಿ ರಾಜ್ಯಪಾಲೆರ್ ಥಾವರ್‌ಚಂದ್ ಗೆಹ್ಲೋಟ್ 24 ಪೊಸ ಸಚಿವೆರೆಗ್ ಪ್ರಮಾಣ ವಚನ ಓದಾಯೆರ್. 34 ಸಂಖ್ಯಾಬಲೊತ ರಾಜ್ಯ ಸಚಿವ ಸಂಪುಟ ಸಂಪೂರ್ಣ ವಿಸ್ತರಣೆ ಆತ್ಂಡ್.
ತನ್ನ ವರದಿಡ್ ಅಸೋಸಿಯೇಷನ್ ಫಾರ್ ಡೆಮಾಕ್ರಟಿಕ್ ರಿಫಾರ್ಮ್ಸ್, “34 ಮಂತ್ರಿಲೆಡ್ 32 ಜನೊತ ಚುನಾವಣಾ ಪ್ರಮಾಣ ಪತ್ರೊನು ವಿಶ್ಲೇಷಣೆ ಮಲ್ದ. ಚುನಾವಣಾ ಆಯೋಗೊದ ವೆಬ್‌ಸೈಟ್‌‌ಡ್ ಪತ್ತ ಅಫಿಡವಿಟ್‌ಲು ದಾಂತಿನೆರ್ದಾವರ ಸಚಿವೆ ಕೆ.ಜೆ.ಜಾರ್ಜ್‌ರೆನ ಪ್ರಮಾಣಪತ್ರೊನು ಸಮ ವಿಶ್ಲೇಷಣೆ ಮನ್ಪೆರೆ ಆತಿಜಿ” ಪಂದ್ ಪಂತ್ಂಡ್. ಕುಡೊರಿ ಸಚಿವೆ ಎನ್.ಎಸ್.ಬೋಸರಾಜು ರಾಜ್ಯ ವಿಧಾನಸಭೆ ಅತ್ತ್ಂಡ ವಿಧಾನ ಪರಿಷತ್ತ್‌ದ ಪದುಕೆರತ್ತಂದಿನೆರ್ದಾವರ ಆರೆನ ಒಲವುಲೆನ್ ವಿಶ್ಲೇಷಣೆ ಮನ್ಪೆರಾತಿಜಿ.
32 ಸಚಿವೆರೆನ ಸರಾಸರಿ ಆಸ್ತಿ 119.06 ಕೋಟಿ ರೂಪಾಯಿ ಪಂದ್ ಅಸೋಸಿಯೇಷನ್ ಫಾರ್ ಡೆಮಾಕ್ರಟಿಕ್ ರಿಫಾರ್ಮ್ಸ್‌ದ ವರದಿ ತೆರಿಪಾತ್ಂದ್. ಡಿ.ಕೆ.ಶಿವಕುಮಾರ್‌ರೆಡ 1,413.80 ಕೋಟಿ ರೂಪಾಯಿ ಮೌಲ್ಯೊದ ಘೋಷಿತ ಆಸ್ತಿ ಉಂಡು. ಮುಖ್ಯಮಂತ್ರಿ ಸಿದ್ದರಾಮಯ್ಯೆರೆಡ ಒಟ್ಟು 51.93 ಕೋಟಿ ರೂ. ಆಸ್ತಿ ಉಂಡು.
ಏಳ್ ಸಚಿವೆರ್ ತನ್ಕುಲೆ ವಿರುದ್ಧ ಗಾತಿದ ಕ್ರಿಮಿನಲ್ ಪ್ರಕರಣೊಲು ಇಪ್ಪುನೆನ್ ಪನೊಂದೆರ್ ಪಂದ್ ವರದಿ ತೋಜಾದ್ಂಡ್. ಡಿ.ಕೆ.ಶಿವಕುಮಾರ್, ಡಿ ಸುಧಾಕರ್, ಜಮೀರ್ ಅಹಮದ್ ಖಾನ್, ಕೆಎಚ್ ಮುನಿಯಪ್ಪ, ಸಿದ್ದರಾಮಯ್ಯ, ಬಿ ನಾಗೇಂದ್ರ ಬೊಕ್ಕ ಈಶ್ವರ್ ಖಂಡ್ರೆ ಮೊಕಲೆನ ಮಿತ್ತ್ ಕ್ರಿಮಿನಲ್ ಮೊಕದ್ದಮೆಲು ಉಲ್ಲ.
ಸಚಿವೆ ನಾಗೇಂದ್ರೆರೆನ ವಿರುದ್ಧ 105 ಗಂಭೀರ ಕ್ರಿಮಿನಲ್ ಪ್ರಕರಣೊಲು ಉಲ್ಲ. ಪೊರ್ಮ್ಬಾಟೊದ ಪೊರ್ತುಡ್ಲಾ ಕೆಲ ಕ್ರಿಮಿನಲ್ ಕೇಸ್‌ಲು ಆದುಪ್ಪುವ.
ಅಸೋಸಿಯೇಷನ್ ಫಾರ್ ಡೆಮಾಕ್ರಟಿಕ್ ರಿಫಾರ್ಮ್ಸ್ ಗಾತಿದ ಅಪರಾಧೊಲೆನ್ ಜಾಮೀನ್‌ದಾಂತಿನ ಅಪರಾಧೊಲು ಪಂದ್ ಪನ್ತ್ಂಡ್. ಇಂಚಿನ ಅಪರಾಧೊಲೆಡ್ ಐನ್ ವರ್ಸೊದ ಅತ್ತ್ಂಡ ಅವೆರ್ದ್ ಎಚ್ಚಿನ ಶಿಕ್ಷೆ ಕೊರ್ಪೆರ್. ಹಲ್ಲೆ, ಕೊಲೆ, ಅಪಹರಣ, ಅತ್ಯಾಚಾರ, ಪೊಂಜೊವುಲೆನ ವಿರುದ್ಧೊದ ಅಪರಾಧೊಲು ಬೊಕ್ಕ ಭ್ರಷ್ಟಾಚಾರೊದ ಪ್ರಕರಣೊಲೆಗ್ ಉ್ಂದು ಸಂಬಂಧಿತಿನವಾದುಪ್ಪುವ.