Last updated on May 30th, 2023 at 04:59 pm
ರಾಜ್ಯೊದ ಮಾತ ಪೊಂಜೊವುನಕಲೆಗ್ಲಾ ಸರ್ಕಾರಿ ಬಸ್ಸ್‌ಡ್ ದರ್ಮೊಗು ಪ್ರಯಾಣ ಮನ್ಪಕನ ಯೋಜನೆ ಎಲ್ಲೆರ್ದೇ ಸುರು ಆಪುಂಡು ಪಂದ್ ಸಾರಿಗೆ ಸಚಿವೆ ರಾಮಲಿಂಗಾ ರೆಡ್ಡಿ ಅಂಗಾರೆ ಬೆಂಗ್ಳೂರ್‌ಡ್ ತೆರಿಪಾಯೆರ್.
ರಾಜ್ಯ ಸಾರಿಗೆ ಸಂಸ್ಥೆದ ನಾಲ್ ನಿಗಮೊಲೆನ ಅಧಿಕಾರಿಲೆನೊಟ್ಟುಗು ಇನಯ ಮಲ್ತಿನ ಆರ್, ಕಾಂಗ್ರೆಸ್ ಸರ್ಕಾರ ಓಟುಗು ದುಂಬು ರಾಜ್ಯೊದ ಜನೊಕ್ಲೆಗ್ ಕೊರ್ಪ ಪಂದಿತ್ತಿನ 5 ಗ್ಯಾರಂಟಿ ಯೋಜನೆಲೆಡ್ ಒಂಜಾತಿನ ಪೊಂಜೊವುಲೆಗ್ ಸರ್ಕಾರಿ ಬಸ್ಸ್‌ಡ್ ದರ್ಮೊದ ಪ್ರಯಾಣೊನು ಒವ್ವೇ ಕಂಡೀಷನ್‌ದಾಂತೆ ಜಾರಿಗ್ ಕನಪ ಪಂದ್ ಪಂಡೆರ್.
ಸರ್ಕಾರಿ ಬಸ್ಸ್‌ಲೆಡ್ ಬಿಪಿಎಲ್ ಕಾರ್ಡ್ ಇತ್ತಿನ ಪೊಂಜೊವುಲೆಗ್ ಮಾತ್ರ ದರ್ಮೊದ ಪ್ರಯಾಣ ಪನ್ಪಿನ ದಾಲ ಇಜ್ಜಿ. ಬಿಪಿಎಲ್-ಎಪಿಎಲ್ ಕಾರ್ಡ್ ಇತ್ತಿನ ಮಾತ ಪೊಂಜೊನಕ್ಲೆಗ್ಲಾ ದರ್ಮೊಗು ಪೋವೊಲಿ ಪಂದ್ ಪಂಡೆರ್.
ಸಾರಿಗೆ ಅಧಿಕಾರಿಲು ಮೂಜಿ ನಾಲ್ ಆಯ್ಕೆಲೆನ್ ಕೋರ್ತೆರ್. ಮಾತ ಪೊಂಜೊವುನಕಲೆಗ್ಲಾ ದರ್ಮೊದ ಪ್ರಯಾಣ ಪನ್ಪಿನವು ಎಂಕ್ಲೆನ ಪ್ರಣಾಳಿಕೆಯಾದಿತ್ತ್ಂಡ್. ಎಲ್ಲೆ ಸಚಿವ ಸಂಪುಟೊಡು ಸಾರಿಗೆ ಇಲಾಖೆ ವರದಿ ಕೊರ್ಪ. ಎಲ್ಲೆ ದರ್ಮೊದ ಬಸ್ ಪ್ರಯಾಣ ಗ್ಯಾರಂಟಿ ಜಾರಿಗ್ ಬರ್ಪಿನೆಟ್ ಅನುಮಾನೊನೇ ಇಜ್ಜಿಂದ್ ಪಂಡೆರ್.
ಯೋಜನೆ ಜಾರಿ ಮನ್ಪೆರೆ ವರ್ಸೊಲಾ ಅಂದಾಜಿ 3,200 ಕೋಟಿ ರೂ ಬೋಡಾಪುಂಡು. ಸಾರಿಗೆ ಇಲಾಖೆದ ನಾಲ್ ನಿಗಮೊಲ್ಲಾ ನಷ್ಟೊಡು ಇಪ್ಪುನೆರ್ದಾವರ ಸರ್ಕಾರ ಸಹಾಯಧನ ಕೊರ್ಂಡ ಮಾತ್ರ ಯೋಜನೆ ಜಾರಿ ಮನ್ಪರೆ ಆಪುಂಡು ಪಂದ್ ಇನಯೋಡು ಅಧಿಕಾರಿಲು ಬೀನ್ನೈತೊಂದೆರ್.
ಇನಿ ಕರ್ನಾಟಕ ರಾಜ್ಯ ರಸ್ತೆ ಸಾರಿಗೆ ನಿಗಮೊದ (KSRTC) ಪೆರಿಯ ಅಧಿಕಾರಿಲೆಡ ಪಾತೆರ್ದ್ ಗ್ಯಾರಂಟಿನ್ ಜಾರಿ ಮನ್ಪುನೆತ ಬಗ್ಗೆ ರೂಪುರೇಷೆಲೆನ ಬಗ್ಗೆ ಚರ್ಚೆ ಮಲ್ತೆರ್. ಇನಯೋಡು ಚರ್ಚೆಗ್ ಬತ್ತಿನ ಇಸಯೊಲೆನ್ ವರದಿ ರೂಪೋಡು ಮುಖ್ಯಮಂತ್ರಿಲೆಗ್ ಕೊರ್ಯೆರ ಉಂಡು. ಆರ್ ಇತ್ತೆನೇ ಸಾರಿಗೆ ಇಲಾಖೆದ ಪ್ರಧಾನ ಕಾರ್ಯಂತೆರೆಡ ಪಾತೆರ್ದೆರ್. ಸಾರಿಗೆ ಇಲಾಖೆ ಪ್ರಧಾನ ಕಾರ್ಯಂತೆರ್ ಸಿಎಂಗ್ ವರದಿ ಕೊರ್ಪೆರ್. ಮುಖ್ಯಮಂತ್ರಿಲು ಅಧಿಕಾರಿಲೆಡ ಪಾತೆರ್ದ್ ಯೋಜನೆ ಜಾರಿದ ನಿರ್ಧಾರ ಮನ್ಪೆರ್ ಪಂದ್ ಪಂಡೆರ್.