Last updated on May 4th, 2024 at 10:01 am
ಮುಲ್ಕಿ: ತುಳುನಾಡ ಇತಿಹಾಸೊಡು ಸುಮಾರ್ 450 ವರ್ಸದ ದುಂಬು ಮುಲ್ಕಿ ಸೀಮೆಡ್ ಬೀರೆರಾದ್ ಮೆರೆತಿನ ಬಿರುವ ಜಾತಿದ ಅಮರ್ ನಾಯ್ಗೆರ್ ಕಾಂತಬಾರೆ ಬೊಕ್ಕ ಬೂದಬಾರೆರ್. ಈ ಅಮರ್ ಜೋಕುಲು ತನ್ಕುಲೆ ಜೀವನೊಡು ಬೋಡಾಯಿನ ಸಾದಕ ಬೆನೊಂದು, ಕೊಲಲ ಸಾದಿತೊಂದು ಕಡೆಕ್ ಚಮತ್ರ ಬಾವೊದ ಬೆರ್ಮಸ್ಥಾನೊಡು ಕಾಯ ಬುಡ್ದ್ ಸಾಂಸ್ಕೃತಿಕ ವೀರೆರಾದ್ ದೈವೊಲಾದ್ ಮೆರೆಯೊಂದು ಬತ್ತಿನಕುಲು.
ಮೊಕಲೆನ ಐತಿಹ್ಯೊಗು ಮಸ್ತ್ ಆಧಾರೊಲು ಉಂಡು. ಮೊಕುಲು ಪಾಡೊಂದಿನ ಅಂಗಿ-ಕುಂಟು, ಬಿರು ಪಗರಿ ಕೈದುಲು, ಪಟ್ಟದ ಉಂಗಿಲ ಪೂರಾ ಇತ್ತೆಲಾ ಉಂಡು. ಮೊಕಲೆನ ಜನ್ಮಸ್ಥಳ ತಿರ್ತಗುಡ್ಡೆ ಸಾನೊಡು ಒಂಜಿ ಮಾಮಲ್ಲ ಪಿರಾಕ್ದ 800 ವರ್ಸದ ತಾಕೊಟೆದ ಮರ ಇತ್ತ್ಂಡ್. ಬಾರೆರೆನ ಅಪ್ಪೆ ಆಚು ಬೈದೆದಿ ಈ ಅಮರ್ ಜೋಕುಲೆನ್ ಉಂದೇ ಮರತ ಪಡ್ಡಾಯಿದ ಗೆಲ್ಲ್‌ಗ್ ಕುಂಟುದ ತೊಟ್ಟಿಲ್ ಕಟ್ಟ್ ದ್ ತೂಂಕುದೆರ್. ಈ ಜಾಗೆ ಮುಲ್ಕಿ ತಾಲೂಕು ದ ಕೊಲ್ಲೂರು ತಿರ್ತಗುಡ್ಡೆ ಬಾರೆರೆನ ಜನ್ಮಸ್ಥಳ, ಅಂಚೆನೆ ಅಕಲೆನ ಅಕೇರಿದ ಪೊರ್ತುಡು ಕಾಯ ಬುಡ್ದ್ ಮಾಯ ಆಪಿನೆರ್ದ್ ದುಂಬು ಈ ಮರತ ಮುದೆಲ್ಡೇ ಕುಲ್ದ್ ಬೊಕ್ಕ ಚಮತ್ರ ಬಾವೊಗು ಪೋತೆರ್ ಪನ್ಪಿನ ಐತಿಹ್ಯ ಉಂಡು.
ಇಂಚಿನ ಪವಿತ್ರ ತಾಕೊಟೆದ ಮರ ಕೋಡೆ ಮದ್ಯಾಹ್ನ ಮಟ ಮಟ ನಡಿದೊಂಬುಗು ಸಮಾ 12 ಗಂಟೆಗ್ ಅಡೀರ್ದೇ ಲಕ್ಕ್ ದ್ ಬೂರ್ದುಂಡು. ಮರ ಎಂಚ ಬೂರ್ದುಂಡು ಪನ್ಡ ಅಲ್ಪ ಇತ್ತಿನ ಬಾರೆರ್ನ ಸಾನಿದ್ಯ ಆವಡ್, ಬಂಡಾರದ ಸಾನ ಆವಡ್, ತಿರ್ತ ಗುಡ್ಡೆ ನಾಯ್ಗೆರ್ನ ಇಲ್ಲ್ ಆವಡ್ ಒಯಿಕ್ಲಾ ದಾಲಾ ಪೆಟ್ಟ್ ಆತಿಜಿ. ಎರೆಗ್ಲಾ ಉಪದ್ರ ಕೊರಂದೆ ತನ್ನ ಕಾಲ ಕರೀಂಡ್ ಪನ್ದ್ ಮರ ಮಗ್‌ರ್ಂಡ್. ಈ ಮರತೊಟ್ಟುಗು ಒಂಜಿ ಮಲ್ಲ ಪರತಿರಿತ ಕುರುಹುಲಾ ಪೋಂಡು.
ತಿರ್ತಗುಡ್ಡೆ ಗರೊಡಿದ ಕೋಲೊರ್ದು ದುಂಬು ಮರತ ಒಂಜಿ ಗೆಲ್ಲ್ ಪಗಿದ್ ಬೂರ್ದಿತ್ತ್ಂಡ್. ಅಂಚಾದ್ ಮರ ಒಂಜಿ ಸೈಡ್ ದಂಗ್‌ದಿತ್ತ್ಂಡ್. ಕೋಡೆ ಅಡಿರ್ದೇ ಪೂರಾ ಮರ ಪಗಿಂಡ್. ಮರಕ್ ಮಸ್ತ್ ಪಿರಯ ಆಯಿನೆರ್ದ್ ಅಡಿಟ್ ದಾಲಾ ಬಲ ಇತ್ತಿಜಿ, ಅಂಚೆ ಮರ ಅಲ್ಪಲ್ಪ ತುರಿದ್ ಕುಂಬುಲಾ ಆದಿತ್ತ್ಂಡ್. ಉಂದೇ ಮರತ ಮುದೆಲ್ಡ್ ಜೋಕುಲು ಗೊಬ್ಬೊಂದಿಪ್ಪುವೆರ್, ಅಲ್ಪದ ಇಲ್ಲದಕುಲು ದೊಂಬುಗು ಆಲಿ ಬಜ್ಜಿಗ್ ಅಲ್ಪನೇ ಜೆತ್ತುಪ್ಪುವೆರ್, ಆಂಡ ಮರ ಪಗ್ಯುನಾನಿ ಏರ್ಲಾ ಇತ್ತಿಜೆರ್. ಉಂದು ದೈವೊಲೆನ ಕಲೆ ಕಾರ್ನಿಕ ಪನ್ದ್ ಅಲ್ಪದಕುಲು ಪನೊಂದುಲ್ಲೆರ್.
