Last updated on December 19th, 2023 at 12:06 pm
ತುಳು ಬಾಸೆಗ್ ತನ್ನ ನಾಡ್‌ದೇ ಉಪೇಕ್ಷೆ, ತುಳುಟು ಎಂ.ಎ ಮಲ್ಪುನ ಅವಕಾಶ ಇತ್ತ್ಂಡಲ ತುಳುಕು ಒಂಜಿ ಸ್ವತಂತ್ರ ಅಧ್ಯಯನ ಕೇಂದ್ರ ಆವಡ್ ಡಿಪಾರ್ಟ್‌ಮೆಂಟ್ ಆವಡ್ ನಮ್ಮ ಕುಡ್ಲದ ಮಂಗಳೂರು ಯುನಿವರ್ಸಿಟಿಡೇ ಉಪ್ಪಂದಿನವು ಬಾರೀ ಬೆಸರ್ದ ಸಂಗತಿ. ಈ ಬಗೆಟ್ ವಿದ್ಯಾರ್ಥಿ ವಲಯೊಡು ಅಂಚೆನೆ ಪ್ರೊಫೆಸರ್‌ನಕಲೆನ ವಲಯೊಡು ಬಾರೀ ಅಸಮಧಾನ ಇತ್ತಿನವು ನಮಕ್ ತೋಜಿದ್ ಬರೊಂದುಂಡು. ದೂರದ ಆಂಧ್ರಪ್ರದೇಶೊಡು ಉಪ್ಪುನ ಡ್ರಾವಿಡಿಯನ್ ಯುನಿವರ್ಸಿಟಿಡ್ ತುಳುಕು ಡಿಪಾರ್ಟ್‌ಮೆಂಟ್ ಉಂಡು ಆಂಡ ತುಳುನಾಡ್‌ಡೇ ಉಪ್ಪುನ ಮಂಗಳೂರು ಯುನಿವರ್ಸಿಟಿಡ್ ಈತ್ ವರ್ಸೊಡು ತುಳುಕು ಸ್ವಂತ ಡಿಪಾರ್ಟ್‌ಮೆಂಟ್ ಆವಂದಿನವು ತುಳುತ ಬಗೆಟ್ ಉಪ್ಪುನ ತಿರಸ್ಕಾರ ಅತ್ತಂದೆ ಬೇತೆ ದಾಲಾ ಅತ್ತ್. ನನಲ ತುಳುನು ಕನ್ನಡ ಡಿಪಾರ್ಟ್‌ಮೆಂಟ್‌ದ ಅಡಿಟ್ ದೀದ್ ತುಳುತ ಸ್ವತಂತ್ರ ಅಸ್ತಿತ್ವೊನು ಕೋಂಟುಗು ನೂಕುನ ಪುನೆಪುಲೆಕ್ಕ ತೋಜುಂಡು.
ಮಂಗಳೂರು ಯುನಿವರ್ಸಿಟಿಡ್ 2018-19ರ್ದು ಹಂಪನಕಟ್ಟೆದ ವಿಶ್ವವಿದ್ಯಾಲಯ ಕಾಲೇಜಿಡ್ ತುಳುಟು ಎಂ.ಎ ಮಲ್ಪುನ ಅವಕಾಶ ಕೊರ್ತೆರ್. ಇದಮುಟ್ಟ ಕರಿನ ಐನ್ ವರ್ಸೊಡು 61 ಜನ ತುಳುಟು ಎಂ.ಎ ಮಲ್ದೆರ್. 37 ಜನ ಇತ್ತೆ ಕಲ್ತೊಂದುಲ್ಲೆರ್. ಆಂಡ ಉಂದು ಇತ್ತೆ ಕನ್ನಡ ವಿಭಾಗದ ಅಡಿಟ್ ಉಂಡು. ಅಂಚಾದ್ ಈ ಜನಕುಲು ನನ ಮಿತ್ತ್ ಗ್ Ph.D ನ್ ತುಳುಟು ಮಲ್ಪೊಡು ಪನ್ಡ ಅವೆಕ್ ಅವಕಾಶ ಇಜ್ಜಿ. ತುಳುಟು ಎಂ.ಎ ಮಲ್ದಿನ ಜನಕುಲು ಅತಂತ್ರ ಪರಿಸ್ಥಿತಿಡ್ ಇತ್ತಿಲೆಕ್ಕ ಆಪುಂಡು. ತುಳುಕು ಸ್ವತಂತ್ರ ವಿಭಾಗ ಮಲ್ಪೊಡು ಪನ್ಪಿನ ಉಮೇದ್ ಮಂಗಳೂರು ವಿಶ್ವವಿದ್ಯಾಲಯೊಗು ಇತ್ತ್‌ದ್ ಈ ಬಗೆತ ಪ್ರಸ್ತಾವೊನು ಕರಿನ ಆಗಸ್ಟ್ ಡೇ ಸರಕಾರೊಗು ಕಡಪುಡುದುಂಡಲಾ ನನಲ ಸರಕಾರೊರ್ದು ಉಂದೆಕ್ ಬೋಡಾಪಿನ ಅನುಮೋದನೆ ಬೈಜಿ. ಉಂದೆನ್ ಸರಕಾರದ ಮಟ್ಟೊಡು ಬೆರಿ ಪತ್ತ್‌ದ್ ಮಲ್ಪಾವುನಕುಲಾ ಇಜ್ಜಿ.
ತುಳುನಾಡ್‌ದ ಶಾಸಕೆರ್, ಸಂಸದೆರ್ ಈ ಬಗೆಟ್ ಬೆರಿ ಪತ್ತ್ ದ್ ಮಲ್ದಿತ್ತೆರೆಡ ಈ ಅನುಮೋದನೆ ಇತೋರ್ತು ತಿಕ್ಕ್‌ದ್ ತುಳು ವಿಭಾಗ ಇತೋರ್ತು ಆತು. ತುಳುಕು ಮಾತಾ ಕಡೆಟ್ಲಾ ಅವಮಾನ ತಿರಸ್ಕಾರ ಅತ್ತಂದೆ ಬೇತೆ ದಾಲಾ ತಿಕ್ಕೊಂದಿಜ್ಜಿ. ಸ್ವತಂತ್ರ ಭಾಷೆನ್ ಕುಡೊಂಜಿ ಭಾಷೆದ ಅಡಿಟ್ ಪಾಡ್‌ದ್ ತುಳುತ ಬೆನ್ನಿ ಆವಂದಿಲೆಕ್ಕ ಮಲ್ಪುನ ವ್ಯವಸ್ಥಿತ ರಾಜಕೀಯ ಷಡ್ಯಂತ್ರ ಮುಲ್ಪ ತೋಜೊಂದುಂಡು. ಬೊಡ್ಚಾಂದಿನೆಕ್ಕ್ ರಪಕ್ಕ ಲಕ್ಕುನ ತುಳುವ ಜನಪ್ರತಿನಿಧಿಲು, ರಾಜಕೀಯ ಸಂಘಟನೆಲು ಉಂದೆಕ್ ಮನಿಪಂದೆ ದಾನೆ ಕುಲ್ಲುದಿನಿ? ಬರ್ಪಿ ಅಕಾಡೆಮಿಕ್ ವರ್ಸೊಡು ತುಳುಕು ಸ್ವತಂತ್ರ ವಿಭಾಗ ಕುಡ್ಲ ಯುನಿವರ್ಸಿಟಿಡ್ ಬತ್ತಿಜಿಡ ತುಳುವೆರ್ ಈ ಬಗೆಟ್ ಪೊರುಂಬಾಟೊಗು ಜಪ್ಪುನ ಎಡ್ಡೆ.