ಕರಾವಳಿ ಬೈಪಾಸ್ – ಮಲ್ಪೆ ; ಮೂಜಿ ದಿನತ ಉಲಾಯಿ ಬೇಲೆ ಸುರು ಮಲ್ಪೊಡು ಪನ್ದ್ ಗಡು ದೀಯಿನ ಶೋಭಾ ಕರಂದ್ಲಾಜೆ

Last updated on January 9th, 2024 at 12:02 pm

ಕರಾವಳಿ ಬೈಪಾಸ್‌ರ್ದ್ ಮಲ್ಪೆ ಮುಟ್ಟದ ರಾಷ್ಟ್ರೀಯ ಪೆರ್ಸಾದಿ ವಿಸ್ತರಣೆದ ಯೋಜನೆದ ಬೇಲೆ ನನ 3 ದಿನತ ಉಲಾಯಿ ಸುರು ಆವೊಡು ಪನ್ದ್ ಒಡಿಪುದ ಸಂಸದೆರಾಯಿನ ಶೋಭಾ ಕರಂದ್ಲಾಜೆ ಅಧಿಕಾರಿಲೆಗ್ ಸೂಚನೆ ಕೊರ್ತೆರ್.

ಸೋಮಾರ ಡಿಸಿ ಆಫೀಸ್‌ಡ್ ಪೆರ್ಸಾದಿದ ಬೇಲೆದ ಬುಲೆಚ್ಚಿಲ್‌ದ ಬಗೆತ ಮೀಟಿಂಗ್‌ಡ್ ಪಾಲ್ ಪಡೆಯಿನ ಆರ್ ಪಾತೆರಿಯೆರ್. ಬೇಲೆ ನನಲ ಸುರು ಆತಿಜಿ, ಕಾಲಿ ಫೈಲುಲು ಅಂಚಿಂಚಿ ಬಲ್ತೊಂದುಲ್ಲ, ಬೇಲೆ ಸುರು ಮಲ್ಪೊಡು ಪನ್ಪಿನ ಗಾಂಭೀರ್ಯ ಏರೆಗ್ಲಾ ಇಜ್ಜಾ ಪನ್ದ್ ಕೇನ್ಡೆರ್. ಇಂಚ ಕಡೆಸ್ಂಡ ರಾಜ್ಯೊಗು ಬರ್ರೆ ಉಪ್ಪು. ಪೆರ್ಸಾದಿದ ಯೋಜನೆಲೆಗ್ ಸಂಚಿಕಾರ ಬರು ಪನ್ದ್ ಎಚ್ಚರ್ಗೆ ಕೊರಿಯೆರ್.

ಅಂಬಲಪಾಡಿ, ಕಟಪಾಡಿ ಜಂಕ್ಷನ್ ಬೇಲೆ ಬೇಗನೆ ಸುರು ಮಲ್ಪುನಲೆಕ್ಕ ಅಂಚೆನೆ ಸಂತೆಕಟ್ಟೆದ ಬೇಲೆ ಬೇಗ ಮುಗಿಪರೆ ಸೂಚನೆ ಕೊರಿಯೆರ್.

ಇಂದ್ರಾಳಿ ರೈಲ್ವೇ ಸಂಕದ ಗರ್ಡರ್‌ ಬೇಲೆ ಆಯಿನಾತ್ ಆವೊಂದು ಬೈದ್ಂಡ್, ರೈಲ್ವೇ ಸುರಕ್ಷಾ ಪ್ರಾಧಿಕಾರ ಆಯುಕ್ತೆರ್ (ಆರ್‌ಡಿಎಸ್‌ಒ) ಪರಿಶೀಲನೆ ಮಲ್ತಿ ಬೊಕ್ಕ ಗರ್ಡರ್‌ ಸ್ಥಳಾಂತರದ ಬೇಲೆ ಸುರು ಆಪುಂಡು ಪನ್ದ್ ಅಧಿಕಾರಿಲು ತೆರಿಪಾಯೆರ್. ಆರ್‌ಡಿಎಸ್‌ಒ ಸಂಪರ್ಕ ಮಲ್ತ್ ಬೀಸೊಡು ಪರಿಶೀಲನೆ ಮಲ್ತ್ ಅನುಮೋದನೆ ಕೊರ್ಪಿಲೆಕ್ಕ ಸೂಚನೆ ಕೊರ್ಪಾವ ಪನ್ದ್ ಶೋಭಾ ತೆರಿಪಾದೆರ್.