Last updated on March 22nd, 2024 at 08:52 am
ದೆಲ್ಲಿ: ಅಬಕಾರಿ ನೀತಿ ಹಗರಣೊಡು ದೆಲ್ಲಿ ಸಿಎಂ ಅರವಿಂದ್ ಕೇಜ್ರಿವಾಲ್ ಅರೆಸ್ಟ್ ಆತೆರ್. ಅಬಕಾರಿ ನೀತಿ ಹಗರಣೊದ ಜಡ್ತೆ ಮಲ್ತೊಂದಿತ್ತಿನ ಜಾರಿ ನಿರ್ದೇಶನಾಲಯೊದ ಅಧಿಕಾರಿಲು, ಅರವಿಂದ್ ಕೇಜ್ರಿವಾಲ್‌ನ್ ಕೈದ್ ಮನ್ಪೆರೆ ಕೇಂದಿತ್ತೆರ್. ಆಂಡ ತನನ್ ಕೈದ್ ಮಲ್ಪಂದಿನಂಚ ಇಡಿಗ್ ನಿರ್ದೇಶನ ಕೊರೊಡೂಂದು ಕೇಂಡ್ ಕೇಜ್ರಿವಾಲ್ ದೆಲ್ಲಿ ಹೈಕೋರ್ಟ್‌ಗ್ ಪೋದಿತ್ತೆರ್. ಆಂಡ ಅರವಿಂದ್ ಕೇಜ್ರಿವಾಲ್‌ನ ಬಿನ್ನಪುನು ತಿರಸ್ಕರಿತಿನ ಹೈಕೋರ್ಟ್, ಮೆರೆನ್ ದಾಯೆ ಕೈದ್ ಮಲ್ದಿಜರ್ ಪಂದ್ ಇಡಿ ಅಧಿಕಾರಿಲೆನ್ ಕೇಂದಿತ್ತ್ಂಡ್. ಅಂಚಾದ್ ಕೇಜ್ರಿವಾಲ್‌ನ ಇಲ್ಲಗ್ ಪೋಯಿನ ಇಡಿ ಅಧಿಕಾರಿಲು, ವಿಚಾರಣೆ ಮಲ್ತೆರ್. ಆಂಡ ಸಮಗಟ್ಟ್ ಸದು ತಿಕ್ಕಂದಿನೆರ್ದಾವರ ದೆಲ್ಲಿ ಮುಖ್ಯಮಂತ್ರಿನ್ ಕೈದ್ ಮಲ್ದೆರ್.
ದೆಲ್ಲಿ ಅಬಕಾರಿ ನೀತಿ ಹಗರಣೊದ ಜಡ್ತೆ ನಡಪಾವೊಂದುಪ್ಪುನ ಇಡಿ ಅಧಿಕಾರಿಲು, ಅರವಿಂದ್ ಕೇಜ್ರಿವಾಲ್‌ಗ್ ಸಮನ್ಸ್ ಕೊರ್ದಿತ್ತೆರ್. 9 ಸರ್ತಿ ವಿಚಾರಣೆಗ್ ಬರ್ಯೆರ ಜಾರಿ ನಿರ್ದೇಶನಾಲಯೊರ್ದು ಕೇಜ್ರಿವಾಲ್‌ಗ್ ಸಮನ್ಸ್ ಪೋದಿತ್ತ್ಂಡ್.
ದಾದ ಉಂದು ದೆಲ್ಲಿ ಅಬಕಾರಿ ನೀತಿ ಹಗರಣ?
ಖಾಸಗಿ ಸಂಸ್ಥೆಲು ರೀಟೇಲ್ ಲಿಕ್ಕರ್ ವಲಯೊಗು ಪೊಗ್ಗೆರೆ ಅನುವು ಮಲ್ತ್ ಕೊರ್ಪಿಲೆಕ ದೆಲ್ಲಿ ಅಬಕಾರಿ ನೀತಿ 2021-22 ನ್ ಕೇಜ್ರಿವಾಲ್ ಮುತಾಲಿಕೆದ ಎಎಪಿ ಸರ್ಕಾರ ಅನುಷ್ಠಾನ ಮಲ್ತಿತ್ತ್‌ದ್, ಉಂದೆಟ್ ಭ್ರಷ್ಟಾಚಾರ ಆತ್ಂಡ್ ಪಂದ್ ಆರೋಪ ಉಂಡು. ಲೈಸೆನ್ಸ್ ಕೊರ್ಪುನೆಟಾವಡ್, ಲೈಸೆನ್ಸ್ ಶುಲ್ಕ ಮನ್ನಾ ಅತ್ತ್ಂಡ ಕಮ್ಮಿ ಮನ್ಪುನೆಟಾವಡ್, ಎಲ್-1 ಲೈಸೆನ್ಸ್‌ದ ಅನುಮೋದನೆದಾಂತೆ ವಿಸ್ತರಿಸುಪುನೆಟ್ ಲಂಚ ಗೆತೊಂದು ಕಂಪೆನಿಲೆಗ್ ಪಾಕ ಸಾವ್ಕಾಸ ಮಲ್ತ್‌ಕೊರ್ತುಂಡು ಪನ್ಪಿನ ಗಾತಿದ ಆರೋಪ ದೆಲ್ಲಿ ಸರ್ಕಾರೊದ ಮಿತ್ಅ ಉಂಡು.