Last updated on April 26th, 2025 at 10:45 am
ತುಮಕೂರು, ಏ. 26: ಜೀನಿ ಸಂಸ್ಥೆಡ್ ಬೇಲೆ ಮಲ್ತೊಂದಿತ್ತಿನ ಪೊಂಜೊವುಗು ಲೈಂಗಿಕ ಕಿರುಕುಳ ಕೊರ್ತಿನ ಆರೋಪಡ್ ಜೀನಿ ಸಂಸ್ಥೆದ ದನಿ ದಿಲೀಪ್ ಕುಮಾರ್ನ ಮಿತ್ತ್ ಕಳ್ಳಂಬೆಳ್ಳ ಸ್ಟೇಶನ್ಡ್ ಎಫ್ಐಆರ್ ದಾಕಲಾತ್ಂಡ್. ತುಮಕೂರುದ ಶಿರಾ ತಾಲೂಕ್ದ ಯರಗುಂಟೆಡ್ ಇಪ್ಪುನ ಜೀನಿ ಕಂಪನಿಡ್ ಬೇಲೆಗ್ ಪೋವೊಂದಿತ್ತಿನ ಮೇಘನ ಪನ್ಪಿನಾರೆಗ್ ದಿಲೀಪ್ ಕುಮಾರ್ ಲೈಂಗಿಕ ಕಿರುಕುಳ ಕೊರ್ತಿನ ಆರೋಪ ಕೇನ್ದ್ ಬೈದ್ಂಡ್.
ಏಪ್ರಿಲ್ 19 ದಾನಿ ಒಂತೆ ಬೇಲೆ ಉಂಡು ಪನ್ಡ್ದ್ ಜೀನಿ ಕಂಪನಿ ಶೆಡ್ಗ್ ಲೆತೊಂದು ಪೋದು ಕೈ ಪತ್ತ್ದ್ ಒಯ್ತ್ದ್ ದಿಲೀಪ್ ಕುಮಾರ್ ಅತ್ಯಾಚಾರ ಮಲ್ಪೆರ ತೂತೆರ್. ಎಂಕ್ ಸಹಕಾರ ಕೊರ್ಲ ನಿನನ್ ರಾಣಿನ ಲೆಕ ತೂವೊನುವೆ ಪನ್ದ್ ಆಸೆ ತೋಜಾದೆರ್. ಓಲ್ಲಾ ಒತ್ತೊನಿಜಂಡ ಬೇಲೆರ್ದ್ ದೆಪ್ಪುವೆ ಪನ್ದ್ ಪೋಡಿಕಟ್ಟಾದೆರ್ ಪನ್ದ್ ಪೊಂಜೊವು ಶಿರಾ ತಾಲೂಕ್ದ ಕಳ್ಳಂಬೆಳ್ಳ ಪೊಲೀಸ್ ಸ್ಟೇಶನ್ಡ್ ಒಯಿಲ್ ಬರೆಪಾದಿತ್ತೆರ್. ಈ ಬಗೆಟ್ ಏ. 24 ತಾನಿ ಎಫ್ಐಆರ್ ದಾಕಲಾತ್ಂಡ್.
ಇತ್ತೆನೇ ಪ್ರಾಥಮಿಕ ಜಡ್ತೆ ಮಲ್ದಿನ ಪೊಲೀಸೆರ್, ಸಂತ್ರಸ್ತೆದಿನ್ ಜಾಗೆಗ್ ಲೆತೊಂದು ಪೋದು ಜಾಗೆ ಮಹಜರ್ ಮಲ್ದೆರ್. ಎಫ್ಐಆರ್ ದಾಕಲಾತಿನೆರ್ದಾವರ, ಜೀನಿ ಸಂಸ್ಥೆದ ದನಿ ದಿಲೀಪ್ ಕುಮಾರ್ನ್ ಕೈದ್ ಮಲ್ತ್ದ್, ನನದ ಕ್ರಮ ಗೆತೊನರ ಪೊಲೀಸೆರ್ ಪಿದಡ್ದೆರ್.
ಒವ್ವೇ ಒತ್ತಡೊಲೆಗ್ ಬಗ್ಗಂದೆ ಆರೋಪಿನ್ ಪೊಲೀಸೆರ್ ಪತ್ತ್ದ್ ಕಾನೂನು ಕ್ರಮ ಗೆತೊಂಡಿಜೆರ್ನ್ಡ ಮಿತ್ತಧಿಕಾರಿಲೆಗ್ ಒಯಿಲ್ ಕೊರ್ಪೆ. ಕಂಪನಿಡ್ ಬೇಲೆ ಮಲ್ಪುನ ಬೇತೆ ಪಾಪದ ಪೊಂಜೊವುಲೆಗ್ಲಾ ಲೈಂಗಿಕ ಕಿರುಕುಳ ಕೊರ್ತಿನ ಆರೋಪ ಉಂಡು, ಐತಲಾ ಜಡ್ತೆ ಆವೊಡು ಪನ್ದ್ ಪೊಂಜೊವು ಆಗ್ರಹ ಮಲ್ದೆರ್.
ಆರೋಪದ ಬಗೆಟ್ ಪಾತೆರ್ದಿನ ಜೀನಿ ದನಿ ದಿಲೀಪ್ ಕುಮಾರ್, ಜೀನಿ ಸಂಸ್ಥೆದ ಬುಲೆಚ್ಚಿಲ್ ತೂಯೆರಾವಂದೆ ಒಂತೆ ಜನ, ಪೊಂಜೊವುನು ಎದುರು ದೀವೊಂದು ಗೊಬ್ಬೊಂದುಲ್ಲೆರ್. ಎನ್ನ ಮಿತ್ತ್ ಬೈದಿನ ಲೈಂಗಿಕ ಕಿರುಕುಳ ಆರೋಪ ಪೊಟ್ಟು ಪನ್ದ್ ಪನ್ತೆರ್.