Last updated on April 26th, 2025 at 09:18 am
ಕುಡ್ಲ: ಇಲ್ಲಡೇ ಕುಲೊಂದು ದಿನೊಕು 2-3 ಸಾರ ರೂ. ಮಲ್ಪೊಲಿ ಪನೊಂದು ಬತ್ತಿನ ಕಾಲ್ನ್ ನಂಬುದು ಆಂಜೊವು ಒರಿ 12,15,012 ರೂಪಾಯಿ ಕಲೆವೊಂದಿನ ಬಗೆಟ್ ಕದ್ರಿ ಸ್ಟೇಶನ್ಡ್ ಪ್ರಕರಣ ದಾಕಲಾತ್ಂಡ್.
ದೂರುದಾರೆರೆಗ್ ಮಾ.30ದಾನಿ ಕಾಲ್ ಬತ್ತಿತ್ತ್ದ್, ಕಾಲ್ ಮಲ್ತಿನಾಲ್ ಪ್ರೀತಿ ಶರ್ಮಾ ಪನ್ದ್ ಗುರ್ತ ಪನ್ಡ್ದ್, ದಿನೊಕು 2-3 ಸಾರ ರೂ. ಬೆನೊಲಿ. ಡಾಟಾ ಕ್ಲಿಕ್ ಪನ್ಪಿನ ಸಂಸ್ಥೆರ್ದ್ ಈ ಬೇಲೆನ್ ಮಲ್ಪುನು ಅಂಚೆನೇ ಉಂದು ಯೂನೋ ಕಾಯಿನ್ ಟೆಕ್ನಾಲಜಿ ಪನ್ಪಿನ ಸಂಸ್ಥೆದ ಅಂಗ ಸಂಸ್ಥೆ ಪನ್ದ್ಲಾ ತೆರಿಪಾದಲ್. ಬೊಕ್ಕ ಆರೆನ ಮೊಬೈಲ್ ನಂಬ್ರಡ್ ಓಯಾಸಿಸ್ ಫೈನಾನ್ಸ್ ಅಫೀಶಿಯಲ್ 1 ಪನ್ಪಿನ ಟೆಲಿಗ್ರಾಮ್ ಗ್ರೂಪ್ಗ್ ಗೋಡ್ಯಾದಲ್. ಬೊಕ್ಕ ರಾಹುಲ್ ಪನ್ಪಿನಾಯೆ ಸುರುತ ಹಂತೊಡು ಕಾಲಿ ಸ್ಕ್ರೀನ್ಶಾಟ್ ಗೆತ್ತ್ದ್ ಕಡಪುಡ್ಂಡ ಒಂಜೆಕ್ 50 ರೂ. ಕೊರ್ಪ ಪನ್ದ್ ತೆರಿಪಾದೆ. ಅಂಚೆನೇ 1,500 ರೂ.ನ್ ಅಕೌಂಟ್ಗ್ ಪಾಡ್ದೆ. ಟ್ರೇಡಿಂಗ್ ಮಲ್ತ್ಂಡ ಶೇ.30 ದಾತ್ ಲಾಭ ತಿಕ್ಕುಂಡು ಪನ್ದ್ ನಂಬಾದೆ. ಆಯೆ ಪಂಡಿನಂಚ ಎ.1ರ್ದ್ 19ರ ಮುಟ್ಟ ಒಂತೆ ಒಕತೆನೇ ಕಾಸ್ ಕಡಪುಡ್ದೆರ್. ಪಾಡ್ದಿನ ಕಾಸ್ ಟ್ರೇಡಿಂಗ್ ಆದ್ ಸುಮಾರ್ 13 ಲಕ್ಷ ರೂ. ತೋಜಾವೊಂದಿತ್ತ್ದ್, ಈ ಕಾಸ್ನ್ ದೆತೊನರೆ ತೂನಗ ಕ್ರೆಡಿಟ್ ಸ್ಕೋರ್ 100ರ್ದ್ ಕಮ್ಮಿ ಉಂಡು ಅಂಚಾದ್ 3.70 ಲಕ್ಷ ರೂ. ಕಾಸ್ ಎಚ್ಚಿಗೆ ಕಟ್ಟೊಡು ಪನ್ದ್ ಪನ್ತೆ.
ಅಪಗ ತಾನ್ ಮಂಗೆ ಆತಿನ ತೆರಿದ್, ಈ ಬಗೆಟ್ ಸೈಬರ್ ಹೆಲ್ಪ್ಲೈನ್ ನಂಬರ್ಗ್ ದೂರು ಕೊರ್ತೆರ್. ದಗೆ ಮಲ್ತಿನಕ್ಲೆನ ಮಿತ್ತ್ ಕಾನೂನು ಕ್ರಮ ದೆತೊನೊಡು ಪನ್ದ್ ಆಗ್ರಹ ಮಲ್ದೆರ್.