Last updated on May 3rd, 2025 at 05:14 pm
ಕುಡ್ಲ, ಮೇ 01: ರೌಡಿಶೀಟರ್ ಒರ್ಯನ ಮಿತ್ತ್ ದುಷ್ಕರ್ಮಿಲೆನ ಕೂಟ ಒಂಜಿ ತಲವಾರ್‌ಡ್ ದಾಳಿ ಮಲ್ದಿನ ನಡಕೆ ಕೋಡೆ ಬಯ್ಯಡ್ ಬಜ್ಪೆದ ಕಿನ್ನಿಪದವು ದಲ್ಪ ನಡತ್‌ದ್ಂಡ್. ಗಾತಿದ ಗಡಿಕುಲಾದಿತ್ತಿನ ಸುಹಾಸ್ ಶೆಟ್ಟಿ ಆಸ್ಪತ್ರೆಡ್ ತೀರ್ದೆರ್.
ಸುಹಾಸ್ ರೌಡಿಶೀಟರ್ ಆದಿತ್ತ್‌ದ್, ಸುರತ್ಕಲ್‌ದ ಫಾಜಿಲ್‌ನ್ ಕೆರ್ತಿನ ಪ್ರಕರಣೊದ ಪ್ರಮುಖ ಆರೋಪಿ ಆದಿತ್ತೆ, 2022ತ ಜುಲೈ 28ದಾನಿ ಸುರತ್ಕಲ್‌ಡ್ ಪಾಜೀಲ್‌ನ್ ಕೆರ್ದಿತ್ತೆರ್. ಫಾಜಿಲ್‌ನ್ ಕೆರ್ತಿನ ಕೇಸ್‌ಡ್ ಪ್ರಮುಖ ಆರೋಪಿ ಆದಿತ್ತಿನ ಸುಹಾಸ್ ಶೆಟ್ಟಿನ್ ಪಾಲೀಸೆರ್ ಅರೆಸ್ಟ್ ಮಲ್ತಿತ್ತೆರ್. ಇತ್ತೆ ನಾಲ್ ಜನತ ಕೂಟ ಒಂಜಿ ಸಾರ್ವಜನಿಕೆರೆ ಎದುರುಡೇ ತಲವಾರ್‌ಡ್ ದಾಳಿ ಮಲ್ತ್‌ದ್ ಸುಹಾಶ್ ಶೆಟ್ಟಿನ್ ಕೆರ್ತೆರ್. ತಲ್ವಾರ್‌ಡ್ ಕಡ್ಪುನ ವಿಡಿಯೋ ಸಾಮಾಜಿಕ ಬಲೆತ್ತಾನೊಡು ವೈರಲ್ ಆತ್ಂಡ್.
ಸುಹಾಸ್ ಶೆಟ್ಟಿ ದುಂಬು ಬಜರಂಗದಳೊಟು ಇತ್ತ್‌ದ್ ಗೋರಕ್ಷಣೆ ವಿಷಯೊಡು ಸಕ್ರಿಯ ಇತ್ತೆರ್. ಕೊಲೆ, ಕೊಲೆಯತ್ನ ಪ್ರಕರಣೊಲೆಡ್ ಆರೋಪಿ ಆದಿತ್ತಿನಾಯನ್ ಕೋಡೆ ರಾತ್ರಿಎ 8.30ತ ಅಂದಾಜಿಗ್ ಆಯನ ಮಿತ್ತ್ ತಲವಾರ್‌ಡ್ ದಾಳಿ ಮಲ್ತ್‌ದ್ ಬರ್ಬರವಾದ್ ಕೆರ್ತೆರ್. ಬಜ್ಪೆ ಪೊಲೀಸ್ ಸ್ಟೇಶನ್ ಸೀಮೆಡ್ ಪ್ರಕರಣ ನಡತ್‌ದ್ಂಡ್.
ಕಿನ್ನಿಪದವು ಪೇಂಟೆಡ್ ಸುಹಾಸ್ ಶೆಟ್ಟಿ ಪೋವೊಂದಿತ್ತಿನ ಕಾರ್‌ಗ್ ಮೀನ್‌ದ ಪಿಕಪ್‌ನ್ ಅಡ್ಡ ಪಾಡ್ದಿತ್ತ್‌ದ್, ಕಾರ್ ಅಲ್ಪನೇ ಒಂಜಿ ಅಂಗಡಿಗ್ ಪೊಗ್ಗುದುಂಡು. ಅವೆರ್ದ್ ಬೊಕ್ಕ ಪಾತೆರೊಗು ಪಾತೆರ ಬುಲೆದ್ ಲಡಯಿ ಸುರು ಆತ್ಂಡ್. ಆರೋಪಿಲು ಮಾರಕಾಸ್ತ್ರೊಲೆಡ್ ಕಡ್ತ್‌ದ್ ಪಜದ್ರಾಡಾತೆರ್ ಪನ್ದ್ ಪೊಲೀಸೆರ್ ಒಲವು ಕೊರ್ತೆರ್. ಜಾಗೆಡ್ ಪೊಲೀಸೆರ್ ಸೆಕ್ಯೂರಿಟಿ ಟೈಟ್ ಮಲ್ತಿತ್ತ್‌ದ್, ಕೃತ್ಯ ನಡತಿನ ಜಾಗೆನ್ ಬಂದ್ ಮಲ್ದೆರ್.