Last updated on May 20th, 2025 at 09:42 am
ಕುಡ್ಲ ಮೇ 19: ಹಿಂದೂ ಕಾರ್ಯಕರ್ತೆ ಸುಹಾಸ್ ಶೆಟ್ಟಿನ್ ಕೆರ್ತಿನ ಪ್ರಕರಣೊದ ಪ್ರಮುಖ ಆರೋಪಿ ನೌಷಾದ್ನ ಮಿತ್ತ್ ಕುಡ್ಲದ ಜೈಲ್ಡ್ ಬೇತೆ ಕೈದಿಲು ಹಲ್ಲೆ ಮಲ್ಪೆರೆ ತೂತಿನ ನಡಕೆ ಸೋಮವಾರ ನಡತ್ದ್ಂಡ್ ಪನ್ದ್ ತೆರಿದ್ ಬೈದ್ಂಡ್.
ಆರೋಪಿ ನೌಷಾದ್ ಯಾನೆ ವಾಮಂಜೂರು ನೌಷಾದ್ ಯಾನೆ ಚೊಟ್ಟೆ ನೌಷಾದ್ನ್ ಕುಡ್ಲ ಜೈಲ್ರ್ದ್ ಮೈಸೂರು ಜೈಲ್ಗ್ ಕಡಪುಡುನ ಪೊರ್ತುಡು ಬೇತೆ ಕೈದಿಲು ಕಲ್ಲ್ ಅಂಚೆನೆ ಬೇತೆ ಸೊತ್ತುಲೆನ್ ದಕ್ಕ್ದೆರ್ ಪನ್ದ್ ತೆರಿದ್ ಬೈದ್ಂಡ್. ಅಪಗನೇ ಜೈಲ್ದ ಸಿಬ್ಬಂದಿಲು ಹಲ್ಲೆನ್ ಉಂತಾದೆರ್ ಪನ್ದ್ ಮೂಲೊಲು ತೆರಿಪಾದ. ಸೋಮವಾರಗ್ ನೌಷಾದ್ ಪೊಲೀಸ್ ಕಸ್ಟಡಿ ಮುಗಿದಿತ್ತ್ಂಡ್. ಅಂಚಾದ್ ಪೊಲೀಸೆರ್ ಆಯನ್ ನ್ಯಾಯಂತಡೆಕ್ ಹಾಜಿರಿ ಮಲ್ತಿತ್ತೆರ್. ನ್ಯಾಯಂತಡೆ ಆಯಗ್ ನ್ಯಾಯಾಂಗ ಬಂಧನ ಪಾಡ್ದಿತ್ತ್ಂಡ್. ಆಯನ್ ಮೈಸೂರು ಜೈಲ್ಖ್ ಶಿಫ್ಟ್ ಮಲ್ಪೆರೆ ಪೊಲೀಸೆರ್ ಲೆಕ್ಕ ಪಾಡ್ದಿತ್ತೆರ್.
ಈ ನಡುಟು ಕುಡ್ಲ ಜೈಲ್ಡ್ ಏರೆನೋ ತೂವೊಡು ಪನ್ದ್ ನೌಷಾದ್ ಪನ್ದಿತ್ತೆ. ಕರ್ಪಿಲ್ಲ್ಡ್ ಕುಡೊರಿ ಕೈದಿನ್ ತಿಕ್ಕೆರಗ್ ಪೊಲೀಸೆರ್ ಲೆತೊಂದು ಪೋತೆರ್. ಆಯನ್ ತೂಯಿನ ಜೈಲ್ಡಿತ್ತಿನ ಬೇತೆ ಕೈದಿಲು ಒರರ್ದ್ ಒರಾನೆ ನೌಷಾದ್ನ ಮಿತ್ತ್ ಕಲ್ಲು ಬೊಕ್ಕ ಕೈಕ್ ತಿಕ್ಕಿನೆನ್ ದಕ್ಕ್ದ್ ದಾಳಿ ಮಲ್ದೆರ್. ಇತ್ತೆ ನೌಷಾದ್ನ್ ಮೈಸೂರು ಜೈಲ್ಗ್ ಕಡಪುಡ್ದೆರ್. ನಡಕೆಗ್ ಸಂಬಂಧಿತ್ದ್ ಬರ್ಕೆ ಸ್ಟೇಶನ್ಡ್ ಪ್ರಕರಣ ದಾಕಲಾತ್ಂಡ್.