Last updated on May 9th, 2025 at 01:20 pm
ಕಾಸ್ರೋಡ್, ಮೇ. 09: ಚಿತ್ತಾರಿಕ್ಕಲ್ದ ಕಂಬಳ್ಳೂರ್ಡ್ ಜನವ್ದಿನ ಮಿತ್ತ್ ಆ್ಯಸಿಡ್ ದಾಳಿ ನಡತ್ದ್ಂಡ್. ಕಂಬಳ್ಳೂರ್ಡ್ ಫ್ಯಾನ್ಸಿ ಅಂಗಡಿ ನಡಪಾವೊಂದಿತ್ತಿನ ಸಿಂಧು ಮೋಲ್ (34) ದಾಳಿಗ್ ಬಲಿ ಆತಿನಾರ್. ಕಂಬಳ್ಳೂರ್ ಮೂಲೊದ ರತೀಶ್, ಅಂಗಡಿಡ್ ಕುಲ್ದಿತ್ತಿನ ಸಿಂಧುನ ಮಿತ್ತ್ ಆ್ಯಸಿಡ್ ಮೈತ್ದೆ. ಅವೆರ್ದ್ ಬೊಕ್ಕ ಆಯೆ ಬಲ್ಲ್ ಪಾಡೊಂದಿನ ಸ್ಥಿತಿಟ್ ಪುನ ಆದ್ ತಿಕ್ಕ್ದೆ. ನಡಕೆದ ಬಗೆಟ್ ಪೊಲೀಸೆರ್ ಜಡ್ತೆ ಮಲ್ತ್ದೆರ್.
ಬುಧವಾರ ಪೊಣ್ಣನ ಮಿತ್ತ್ ಕೆಂಗುಡೆ ಆ್ಯಸಿಡ್ ದಾಳಿ ಮಲ್ತಿನೆರ್ದಾವರ ಆಲೆನ ಮೋನೆ, ಕಣ್ಣ್, ನಾಲಿ ಬೊಕ್ಕ ತುಡೆತ ಮಿತ್ತ್ ಗಾತಿದ ಬೇನೆ ಆತ್ಂಡ್. ಸಿಂಧು ಮೋಲ್ಗ್ ಇತ್ತೆ ಪರಿಯಾರಂದ ಸರ್ಕಾರಿ ವೈದ್ಯಕೀಯ ಕಾಲೇಜ್ ಆಸ್ಪತ್ರೆಡ್ ಮರ್ದ್ ನಡತೊಂದುಂಡು. ರತೀಶ್ (34) ಬೊಕ್ಕ ಮುಟ್ಟಡೆ ಒಂಜಿ ಮರಕ್ ಬಲ್ಲ್ ಪಾಡೊಂದು ಆತ್ಮಹತ್ಯೆ ಮಲ್ತೊಂದೆ. ಮಧ್ಯಾಹ್ನ 2 ಗಂಟೆದ ಅಂದಾಜಿಗ್ ಸಿಂಧು ತನ್ನ ಫ್ಯಾನ್ಸಿ ಅಂಗಡಿಡ್ ಇಪ್ಪುನಗ ಈ ನಡಕೆ ನಡತ್ದ್ಂಡ್.
ಸಂತ್ರಸ್ತೆದಿನ ಇಲ್ಲದಕುಲು ರತೀಶ್ ಸಿಂಧುನ ಬೆರಿಯೆ ತಿರ್ಗೊಂದಿತ್ತ್ದ್ ಉಂದೆಕ್ ದುಂಬುಲಾ ಆ್ಯಸಿಡ್ ಪಾಡ್ವೆ ಪನ್ದ್ ಪೋಡಿಕಟ್ಟಾದಿತ್ತೆ ಪನ್ದ್ ತೆರಿಪಾದೆರ್. ಆಲ್ ಇಂಚಿಪಗ್ ಒಯಿಲ್ಲಾ ಬರೆಪಾದಿತ್ತಲ್ಗೆ. ರತೀಶ್ ಬೊಕ್ಕ ಸಿಂಧು ನಿರೆಕರೆತಕುಲಾದಿತ್ತ್ದ್ ಎಡ್ಡೆ ದೋಸ್ತಿಲಾದಿತ್ತೆರ್ಗೆ . ಒವ್ವಾ ನೆವನೊಡೂ ಇರ್ವೆರ್ಲಾ ದೂರ ಆತೆರ್ ಪನ್ದ್ ಪೊಲೀಸ್ ವರದಿಲು ತೆರಿಪಾದ. ರತೀಶ್ ಬೋರ್ವೆಲ್ ಕಂಪನಿಡ್ ದಿನಗೂಲಿ ಕಾರ್ಮಿಕೆ ಆದ್ ಬೇಲೆ ಮಲ್ತೊಂದಿತ್ತೆ ಪನ್ದ್ ತೆರಿದ್ ಬೈದ್ಂಡ್.