Last updated on June 27th, 2025 at 09:02 am
ಪುತ್ತೂರು, ಜೂ. 27 : ಪುತ್ತೂರ್ದ ಬಿಜೆಪಿ ಮುಖಂಡೆ ಜಗನ್ನಿವಾಸ್ ರಾವ್ ಪನ್ಪಿನಾರೆನ ಮಗೆ ಕೃಷ್ಣ ರಾವ್ ಪನ್ಪಿನಾಯನ ಮಿತ್ತ್ ಅತ್ಯಾಚಾರ ಆರೋಪ ಕೇನ್ದ್ ಬೈದ್ಂಡ್.
ಆರೋಪಿ ಕೃಷ್ಣೆ, ತನ್ನ ಒಟ್ಟುಗು ಕಲ್ಪುನ ಪೊಣ್ಣನ್ ಮೋಕೆ ಮಲ್ತ್ದ್ ಅವೆರ್ದ್ ಬೊಕ್ಕ ದೈಹಿಕ ಸಂಪರ್ಕ ಬುಲೆಪಾದ್ ಆಲೆಗ್ ಬಂಜಿ ಬರ್ಪಾದ್, ಇತ್ತೆ ಮದಿಮೆ ಆಪುಜಿ ಪನ್ದ್ ಪನೊಂದುಲ್ಲೆ ಪನ್ಡ್ದ್ ಸಂತ್ರಸ್ತೆದಿ ಪೊಣ್ಣು, ಪುತ್ತೂರು ಮಹಿಳಾ ಸ್ಟೇಶನ್ಡ್ ಒಯಿಲ್ ಬರೆಪಾದಿತ್ತ್ದ್, ಈ ಪ್ರಕರಣ ದಾಕಲ್ತೊಂದಿನ ಪೊಲೀಸೆರ್ ಕೃಷ್ಣನ್ ಪತ್ಯೆರ ಬೇಪು ನೆಯ್ತೆರ್.
ಒಯಿಲ್ದ ಪ್ರಕಾರ ಕುಡ್ಲದ ಒಂಜಿ ಪ್ರೈವೇಟ್ ಕಾಲೇಜಿಡ್ Bsc ಕಲ್ತೊಂದುಪ್ಪುನ ಪೊಣ್ಣು ಬೊಕ್ಕ ಆರೋಪಿ ಕೃಷ್ಣೆ ಪುತ್ತೂರ್ಡ್ ಹೈಸ್ಕೂಲ್ಡ್ ಓದೊಂದುಪ್ಪುನಗ ಒರಿಯನೊರಿ ಮೋಕೆ ಮಲ್ತೊಂದಿತ್ತೆರ್. ಇಂಚೆನೇ 2024ತ ಅಕ್ಟೋಬರ್ 11ತಾನಿ ಇಲ್ಲಡ್ ಏರ್ಲಾ ಇಜ್ಜಂದಿನಪಗ ಕೃಷ್ಣೆ ಇಲ್ಲಗ್ ಲೆತೊಂದು ಬತ್ತ್ದ್ ಮದಿಮೆ ಆಪೆ ಪನ್ದ್ ನಂಬಾದ್ ದೈಹಿಕ ಸಂಪರ್ಕ ಬುಲೆಪಾದೆ. ಆತೇ ಅತ್ತಂದೆ 2025ತ ಜನವರಿ ತಿಂಗೊಲುಡು ಕುಡ ಬಲವಂತೊಡು ದೈಹಿಕ ಸಂಪರ್ಕ ಮಲ್ತ್ದೆ. ಅಂಚಾದ್ ಜವನ್ದಿ ಬಂಜಿನಾಲ್ ಆತಿನ ವಿಚಾರ ತೆರಿದ್ ಕೃಷ್ಣೆ ಮದಿಮೆಗ್ ಒತ್ತೊನೊಂದಿಜ್ಜೆ ಪನ್ದ್ ಆರೋಪ ಮಲ್ದೆರ್.
ಇತ್ತೆ 9 ತಿಂಗೊಲು ಆತಿನ ಪೊಣ್ಣು, ತಾನ್ ಬಂಜಿನಾಲ್ ಆತಿನ ವಿಚಾರೊನು ತನ್ನ ಅಪ್ಪೆಅಮ್ಮಡ ಪನ್ಡೊನ್ದಲ್. ಅವೆರ್ದ್ ಬೊಕ್ಕ ಇಲ್ಲದಕುಲು ಜವನನ ಇಲ್ಲದಕುಲೆಗ್ ವಿಚಾರ ತೆರಿಪಾದ್ ಪಾತೆರ್ದಾನಗ ಮದಿಮೆಗ್ ಆಣನ ಇಲ್ಲದಕುಲು ಒತ್ತೊಂದೆರ್. ಆಂಡ, ಕೃಷ್ಣ ರಾವ್ ಮದಿಮೆ ಆಯೆರ ಕೇನೊಂದಿಜ್ಜೆ. ಅಂಚಾದ್ ಆರೋಪಿನ ಮಿತ್ತ್ ಬೋಡಾಪಿನ ಕಾನೂನು ಕ್ರಮ ಗೆತೊನೊಡು ಪನ್ದ್ ಜವನ್ದಿ ಒಯಿಲ್ಡ್ ಬರೆಪಾದಲ್.
ಪ್ರಕರಣ ದಾಕಲಾತಿನ ವಿಚಾರ ತೆರಿನೇ ಆರೋಪಿ ಕೃಷ್ಣ ರಾವ್ ದೆಂಗ್ತಪ್ಪಾದ್ ಕುಲ್ಲುದೆ. ಇತ್ತೆ ಪೊಲೀಸೆರ್ ಭಾರತೀಯ ನ್ಯಾಯ ಸಂಹಿತೆಯ 64(1) ಬೊಕ್ಕ 69ತ ಅಡಿಟ್ ಪ್ರಕರಣ ದಾಕಲ್ತೊಂದಿತ್ತ್ದ್, ದೆಂಗ್ತಪ್ಪಾದಿನ ಆರೋಪಿ ಕೃಷ್ಣ ಜೆ. ರಾವ್ನ್ ಪತ್ಯೆರ ಕಾರ್ಯಾಚರಣೆ ಮಲ್ತೊಂದುಲ್ಲೆರ್.