ಕೊರ್ತಿನ ಲಂಚ ಯಾರಂದೆ ಕುಡ ಲಂಚೊದ ಕಾಸ್‌ಗ್ ಕಾಯೆಸ್ – ಲೋಕಾಯುಕ್ತೆರೆ ಬೇಪುಗು ಬೂರ್ನ ಸರ್ವೆಯರ್ ಬೊಕ್ಕ ಬ್ರೋಕರ್

Last updated on June 19th, 2025 at 06:24 am

ಕುಡ್ಲ, ಜೂನ್ 18: ಜಾಗೆದ ಸಿಂಗಲ್ ಸೈಟ್ ಬೊಕ್ಕ ಪ್ರಾಪರ್ಟಿ ಕಾರ್ಡ್ ಮಲ್ಪೆರ ಒರ ಲಂಚ‌ದ ಕಾಸ್ ಗೆತೊಂದಿನತ್ತಂದೆ ಕುಡ ಅವ್ವೇ ಬೇಲೆ ಮಲ್ಪೆರೆ ನನಲಾತ್ ಲಂಚೊಗು ಕಾಯೆಸ್ ದೀತಿನ ಸರ್ವೆಯರ್ ಬೊಕ್ಕ ಬ್ರೋಕರ್‌ನ್ ಲೋಕಾಯುಕ್ತ ಪೊಲೀಸೆರ್ ಕೈದ್ ಮಲ್ದೆರ್. ಕೈದಾತಿನಕಲೆನ್ ಸರ್ವೆಯರ್ ನಂದೀಶ್ ಬೊಕ್ಕ ಬ್ರೋಕರ್ ಬಿಜೈದ ದಿವಾಕರ್ ಪನ್ದ್ ಗುರ್ತ ಪತ್ತ್‌ದೆರ್.

ಒಯಿಲ್ ಬರೆಪಾದಿನಾರ್ ತನ್ನ ಬೊಕ್ಕ ತನ್ನ ಅಪ್ಪೆನ ಪುದರ್‌ಡ್ ಇಪ್ಪುನ ಕಂಕನಾಡಿ ಬೊಕ್ಕ ಬಜಾಲ್ ಗ್ರಾಮೊದ ಜಾಗೆನ್ ಸಿಂಗಲ್ ಸೈಟ್ ನಕ್ಷೆ ಬೊಕ್ಕ ಪ್ರಾಪರ್ಟಿ ಕಾರ್ಡ್ ಮಲ್ಪೆರೆ 2025ತ ಫೆಬ್ರವರಿಡ್ ಕುಡ್ಲ ಯು.ಪಿ.ಒ.ಆರ್ ಕಚೇರಿಗ್ ಅರ್ಜಿ ಪಾಡ್ದಿತ್ತೆರ್. ಬೊಕ್ಕ ಸರ್ವೆಯರ್ ನಂದೀಶ್ 2025ತ ಎಪ್ರಿಲ್‌ಡ್ ಸರ್ವೆ ಮಲ್ತ್‌ದ್ ಲಂಚ ಕೇನ್ದೆರ್. 6,500 ರೂ.ನ್ ಸರ್ವೆಯರ್ ತಾನೇ ಗೆತೊಂದಿನತ್ತಂದೆ, 20,000 ರೂ.ನ್ ಬ್ರೋಕರ್ ಬಿಜೈ ದಿವಾಕರ್ ಮುಕೇನ ಗೆತೊಂದೆರ್.

ಬೊಕ್ಕ ಸರ್ವೆಯರ್ ನಂದೀಶ್ ರಡ್ಡ್ ಗ್ರಾಮೊದ ರಡ್ಡ್ ಜಾಗೆಲೆನ ಸಿಂಗಲ್ ಸೈಟ್ ನಕ್ಷೆ ಬೊಕ್ಕ ಪ್ರಾಪರ್ಟಿ ಕಾರ್ಡ್ ಕೊರ್ಯೆರ ಎಚ್ಚಿಗೆ 18,000 ರೂ. ಕೊರ್ಯೆರ ಒತ್ತಾಯ ಮಲ್ದೆರ್. ಈ ಬಗೆಟ್ ಸಾಕ್ಷಿದ ಒಟ್ಟುಗು ಕುಡ್ಲ ಲೋಕಾಯುಕ್ತ ಪೊಲೀಸ್ ಸ್ಟೇಶನ್‌ಡ್ ಒಯಿಲ್ ಬರೆಪಾದೆರ್. ಸರ್ವೆಯರ್ ನಂದೀಶ್ ಉಂದೇ ತಿಂಗೊಲುಡು ಕುಡ 15,000 ರೂ.ನ್ ದಿವಾಕರ್‌ನ ಮುಕೇನ ಗೆತೊಂದೆರ್. ಇಂಚ ಒಟ್ಟು 41,500 ರೂ.ನ್ ಗೆತೊಂದು ಬುಧವಾರ ಕುಡ 2,000 ರೂ. ಗೆತೊನುನಗ ಲೋಕಾಯುಕ್ತ ಪೊಲೀಸೆರೆ ಬಲೆಗ್ ಬೂರ್ದೆರ್. ಕಾರ್ಯಾಚರಣೆಡ್ ಲೋಕಾಯುಕ್ತ ಪೊಲೀಸ್ ಅಧೀಕ್ಷಕೆ ಕುಮಾರಚಂದ್ರ, ಉಪಾಧೀಕ್ಷಕೆರಾಯಿನ ಡಾ.ಗಾನ ಪಿ. ಕುಮಾರ್ ಬೊಕ್ಕ ಸುರೇಶ್ ಕುಮಾರ್ ಪಿ., ಪೊಲೀಸ್ ನಿರೀಕ್ಷಕೆರಾಯಿನ ಭಾರತಿ ಜಿ. ಬೊಕ್ಕ ಚಂದ್ರಶೇಖರ್ ಕೆ.ಎನ್. ಪಾಲ್‌ಪಡೆದಿತ್ತೆರ್.