Last updated on June 19th, 2025 at 09:02 am
ಕಾಸ್ರೋಡ್, ಜೂ. 19: ಕೆದುಟ್ ಮುರ್ಕ್ದ್ ಬೆಂಗಳೂರ್ದ ಜವನೆ ಒರಿ ತೀರ್ದಿನ ನಡಕೆ ಬುಧವಾರ ತಳಂಗರೆಡ್ ನಡತ್ದ್ಂಡ್.
ಬೆಂಗಳೂರು ಡಿ.ಜೆ ಹಳ್ಳಿದ ಫೈಝಾನ್(22) ತೀರ್ದಿನ ಜವನೆ.
ಗಾತಿದ ಸ್ಥಿತಿಟ್ ಇಪ್ಪುನ ಫೈಝಾನ್ನ ಮೆಗ್ಯೆ ಸಕ್ಲೈನ್ (20)ನ್ ಕಾಸ್ರೋಡ್ದ ಆಸ್ಪತ್ರೆಗ್ ದಾಕಲ್ತ್ದೆರ್. ಮೊಕುಲು ತಳಂಗರೆದ ಮಾಲಿಕ್ ದಿನಾರ್ ಪಲ್ಲಿಗ್ ಬತ್ತಿನ ಪೊರ್ತುಡು ಈ ನಡಕೆ ನಡತ್ದ್ಂಡ್. ಪಲ್ಲಿದ ಪಿರವುದ ಕೆದುಕು ಮೀಯೆರೆ ಜತ್ತಿನ ಪೊರ್ತುಡು ಮುರ್ಕೊಂದಿತ್ತಿನ ಸಕ್ಲೈನ್ನ್ ಬದ್ಕಾಯೆರ ಪೋಯಿನ ಫೈಝಾನ್ ನೀರ್ಡ್ ಮುರ್ಕುದೆ ಪನ್ದ್ ತೆರಿದ್ ಬೈದ್ಂಡ್.
ಭಾರೀ ಬರ್ಸೊರ್ದಾವರ ಕೆದು ದಿಂಜಿದ್ ತಮೆಲೊಂದಿತ್ತ್ಂಡ್. ಮೆಗ್ಯೆ ಕೆರೆಟ್ ಮುರ್ಕೊಂದುಪ್ಪುನೆನ್ ತೂಯಿನ ಫೈಝಾನ್ ಕೆದುಕ್ ಲಾಗಿದ್ ಬದ್ಕಾಯೆರ ತೂನಗ ಮುರ್ಕುದ್ ತೀರ್ದೆರ್ ಪನ್ದ್ ಪನ್ತೆರ್. ಕಾಸ್ರೋಡ್ರ್ದ್ ಬತ್ತಿನ ಅಗ್ನಿ ಶಾಮಕ ದಳೊದ ಸಿಬ್ಬಂದಿಲು ಇರ್ವೆರೆನ್ ಮಿತ್ತ್ ಕನತ್ದ್ ಆಸ್ಪತ್ರೆಗ್ ಎತ್ತಾಂಡಲಾ ಫೈಝಾನ್ನ ಜೂವ ಒರಿತೊನರೆ ಆತಿಜಿ. ಪುನೊನು ಕಾಸ್ರೋಡ್ ಜನರಲ್ ಆಸ್ಪತ್ರೆದ ಶವಾಗಾರೊಡು ದೀತೆರ್.
ಝಿಯಾರತ್ಗ್ ಬೆಂಗಳೂರ್ರ್ದ್ 11 ಜನ ಅಂಗಾರೆರ ಮಾಲಿಕ್ ದಿನಾರ್ ಪಲ್ಲಿಗ್ ಬತ್ತಿತ್ತೆರ್. ಮೊಕುಲು ಮಾತಾ ಬುಧವಾರ ಮಧ್ಯಾಹ್ನ ಬೆಂಗಳೂರ್ಗ್ ಪಿರ ಪೋಯೆರ ಇತ್ತೆರ್.