Last updated on July 21st, 2025 at 12:57 pm
ಬೆಂಗಳೂರು, ಜು 21: ಧರ್ಮಸ್ಥಳ ಗ್ರಾಮೊಡು ಪುಣ ಕೌಂತಿನ ಪ್ರಕರಣೊದ ಜಡ್ತೆಗ್ ರಾಜ್ಯ ಸರಕಾರ ಎಸ್ಐಟಿ ಉಂಡು ಮಲ್ದ್ಂಡ್. ಆಂಡ ಎಸ್ಐಟಿ ಉಂಡಾಯಿನ ಬೆರಿಟೇ ಕೂಟೊದ ಇರ್ವೆರ್ ಐಪಿಎಸ್ ಅಧಿಕಾರಿಲು ವೈಯಕ್ತಿಕ ನೆವನೊನು ಎದುರು ದೀದ್ ಈ ಕೂಟೊಗು ಗೋಡ್ಯಂದೆ ಇಪ್ಪುಲೆಕ ತುವೊಂದುಲ್ಲೆರ್. ಈ ಬಗೆಟ್ ರಾಜ್ಯ ಸರ್ಕಾರೊಗು ಓಲೆ ಬರೆಪಿನ ಸಾಧ್ಯತೆ ಉಂಡು ಪನ್ದ್ ಮೂಲೊಲು ತೆರಿಪಾದ.
ಪೆರಿಯ ಐಪಿಎಸ್ ಅಧಿಕಾರಿ ಪ್ರಣವ್ ಮೊಹಾಂತಿ ಮುತಾಲಿಕೆಡ್ ವಿಶೇಷ ಜಡ್ತೆ ಕೂಟೊನು ಸರ್ಕಾರ ಉಂಡು ಮಲ್ದ್ಂಡ್. SIT ಕೂಟ ಮಲ್ತ್ದ್ ಒಂಜಿ ದಿನೊಟೇ ಸುರುತ ತಲೆಪು ಅಡ್ಡ ಬೈದ್ಂಡ್. ವಿಶೇಷ ಜಡ್ತೆ ಕೂಟೊದ ನಾಲ್ವೆರೆಡ್ ಇಬ್ಬರು ಐಪಿಎಸ್ ಅಧಿಕಾರಿಲು ಪಿರಜಾರೊಂದುಲ್ಲೆರ್ ಪನ್ಪಿ ಒಲವು ಉನ್ನತ ಮೂಲೊಲೆರ್ದ್ ತೆರಿದ್ ಬೈದ್ಂಡ್. ಜಡ್ತೆರ್ದ್ ಪಿರಜಾರ್ಯೆರ ಇರ್ವೆರ್ ಅಧಿಕಾರಿಲು ಅಟ್ಟನೆ ಮಲ್ದೆರ್. ಈ ಬಗೆಟ್ ಐಪಿಎಸ್ ಅಧಿಕಾರಿಲಾಯಿನ ಎಂ.ಎನ್ ಅನುಚೇತ್ ಬೊಕ್ಕ ಸೌಮ್ಯಲತಾ ಸರ್ಕಾರೊಗು ಓಲೆ ಬರೆಯೆರ ಪಿದಡ್ದೆರ್. ವೈಯಕ್ತಿಕ ನೆವನ ಕೊರ್ದು ಎಸ್ಐಟಿ ರ್ದ್ ತನ್ಕುಲೆ ಪುದರ್ ಬುಡೊಡು ಪನ್ದ್ ಇನಿ, ಸೋಮವಾರ ಓಲೆ ಬರೆಪೆರ್ ಪನ್ದ್ ಉನ್ನತ ಪೊಲೀಸ್ ಮೂಲೊಲೆರ್ದ್ ತೆರಿದ್ ಬೈದ್ಂಡ್.
ರಾಜ್ಯ ಸರ್ಕಾರ ಗಾತಿಡ್ ಗೆತೊಂದು ಈ ಪ್ರಕರಣೊದ ಸಮಗ್ರ ಜಡ್ತೆಗ್ ಎಸ್ಐಟಿ ಮಲ್ದ್ಂಡ್. ದುಂಬು ಮಲ್ದಿನ ಜಡ್ತೆಲೆಡ್ ತೋಜಾದಿನ ಕರ್ತವ್ಯ ನಿಷ್ಠೆ ಬೊಕ್ಕ ಕಾರ್ಯ ದಕ್ಷತೆನ್ ತೂದು ನಾಲ್ವೆರ್ ಐಪಿಎಸ್ ಅಧಿಕಾರಿಲೆನ್ ಈ ಎಸ್ಐಟಿಗ್ ಅಜತ್ದಿತ್ತ್ಂಡ್. ಇತ್ತೆ ಎಸ್ಐಟಿರ್ದ್ ಇರ್ವೆರ್ ಐಪಿಎಸ್ ಅಧಿಕಾರಿಲು ಪಿರಜಾರೊಂದುಲ್ಲೆರ್. ಓಲ್ಲಾ ಮೊಕುಲು ಈ ಎಸ್ಐಟಿ ರ್ದ್ ತನ್ಕುಲೆ ಪುದರ್ ಬುಡ್ಯೆರೆ ಸರ್ಕಾರೊಗು ಓಲೆ ಬರೆಯೆರ್ನ್ಡ, ಸರ್ಕಾರ ಆ ಇರ್ವೆರ್ ಅಧಿಕಾರಿಲೆನ್ ಲೆಪ್ಪುಡಾದ್ ಒತ್ತೊನೆರೆ ಪನ್ಪುನ ಸಾಧ್ಯತೆಲಾ ಉಂಡು ಪನ್ದ್ ಪನೊಂದುಲ್ಲೆರ್.