Last updated on July 7th, 2025 at 08:35 am
ಪುತ್ತೂರು, ಜು. 07: ಪುತ್ತೂರ್ದ ಬೀರಮಲೆ ಗುಡ್ಡೆಡ್ ನಡತಿನ ನೈತಿಕ ಪೊಲೀಸ್ಗಿರಿ ಪ್ರಕರಣೊಡು ಇರ್ವೆರೆನ್ ಪುತ್ತೂರು ನಗರ ಪೊಲೀಸೆರ್ ಅರೆಸ್ಟ್ ಮಲ್ತ್ದೆರ್. ಕೈದಾತಿನಕಲೆನ್ ಕಡಬ ನಿವಾಸಿ ಪುರುಷೋತ್ತಮೆ (43) ಬೊಕ್ಕ ಆರ್ಯಾಪು ಪುತ್ತೂರು ನಿವಾಸಿ ರಾಮಚಂದ್ರೆ (38) ಪನ್ದ್ ಗುರ್ತ ಪತ್ತ್ದೆರ್. ಸಂತ್ರಸ್ತೆ ಆಣನ ಅಮ್ಮೆ ಬರೆಪಾದಿನ ಒಯಿಲ್ದ ಪ್ರಕಾರ ಪ್ರಕರಣ ದಾಕಲ್ತೊಂದಿನ ಪೊಲೀಸೆರ್ ಇರ್ವೆರ್ ಆರೋಪಿಲೆನ್ ಕೈದ್ ಮಲ್ದೆರ್.
ಅಪ್ರಾಪ್ತ ಪ್ರಾಯೊದ ಆಣ್ ಬೊಕ್ಕ ಆಯನ ಗುರ್ತದ ಅಪ್ರಾಪ್ತ ಪೊಣ್ಣು ಒಟ್ಟುಗು ಬೀರಮಲೆ ಗುಡ್ಡೆಗ್ ಪೋದಿತ್ತೆರ್. ಈ ಪೊರ್ತುಡು ಆಡೆಗ್ ಬತ್ತಿನ ಇರ್ವೆರ್ ಅಪ್ರಾಪ್ತೆರೆನ್ ಉಂತಾದ್, ಪೆದಂಬು ನೆರ್ದ್, ನಿಕ್ಲೆನ ವಿಡಿಯೋ ಮಲ್ತ್ದ್ ಸಾಮಾಜಿಕ ಬಲೆತ್ತಾನೊಡು ಪಾಡೂವ ಪನ್ದ್ ಪೋಡಿಕಟ್ಟಾದೆರ್. ಆತೇ ಅತ್ತಂದೆ ಅಪ್ರಾಪ್ತ ಜವನೆರೆನ್ ಬೇತೆ ಧರ್ಮದಾಯೆ ಪನ್ದ್ ನೆರ್ದ್, ಅಲ್ಪನೇ ಇತ್ತಿನ ಬೇತೆ ಸಾರ್ವಜನಿಕೆರೆನ್ ಲೆತ್ತ್ದ್ ಅವಮಾನ ಮಲ್ತ್ದ್ ವಿಡಿಯೋ ಮಲ್ತ್ದೆರ್. ಅವೆರ್ದ್ ಬೊಕ್ಕ ಆರೋಪಿಲು ವಿಡಿಯೋನ್ ಸಾಮಾಜಿಕ ಬಲೆತ್ತಾನೊಡು ವೈರಲ್ ಮಲ್ತ್ದೆರ್ ಪನ್ದ್ ಒಯಿಲ್ಡ್ ತೆರಿಪಾದೆರ್.
ಇತ್ತೆ, ನಡಕೆದ ಮುಕೇನ ಕೋಮು ಸಾಮರಸ್ಯ ತೆಟ್ಟಾಯೆರ ಅಂಚೆನೇ ಧರ್ಮೊಲೆನ ನಡುಟು ಪಗೆ ಪುಟ್ಟಾವುನ ಪ್ರಚೋದನೆ ಮಲ್ದೆರ್ ಪನ್ದ್ ಈ ಇರ್ವೆರೆ ಮಿತ್ತ್ ಪುತ್ತೂರು ಪೊಲೀಸ್ ಸ್ಟೇಶನ್ಡ್ ಪ್ರಕರಣ ದಾಕಲಾತ್ಂಡ್.