Last updated on July 12th, 2025 at 06:08 pm
ರಾಯಚೂರು, ಜು 12: ಕರ್ನಾಟಕೊದ ರಾಯಚೂರುಡು ಪೊಂಜೊವು ಒರ್ತಿ ಸೆಲ್ಫಿ ಗೆತೊನೊಂದುಪ್ಪುನಗ ತನ್ನ ಕಂಡನ್ಯನ್ ಕೃಷ್ಣಾ ಸುದೆಕ್ ನೂಕುದು ಪಾಡ್ದಲ್ ಪನ್ಪಿ ಆರೋಪ ಕೇನ್ದ್ ಬೈದ್ಂಡ್. ವಡ್ಗೇರಾ ತಾಲ್ಲೂಕ್ದ ಗುರ್ಜಾಪುರ ಸಂಕೊದ ಮಿತ್ತ್ ಈ ನಡಕೆ ನಡತಿತ್ತ್ದ್ ದಂಪತಿಲು ಬೈಕ್ಡ್ ಪೋವೊಂದುಪ್ಪುನಗ ಸಂಕದಲ್ಪ ಸೆಲ್ಫಿ ದೆಪ್ಪೆರ ಉಂತಾದೆರ್.
ಬ್ಯಾರೇಜ್ ಇಪ್ಪುನ ಸಂಕೊದ ಮಿತ್ತ್ ತಾನೇ ಸುರುಕು ಫೋಟೋ ದೆಪ್ಪಾವೊಂಡಿನ ಬೊಡೆದಿ ಬೊಕ್ಕ ಕಕಡನ್ಯನ್ ಸಂಕೊದ ಕೋಡಿಗ್ ಪೋದು ಉಂತೆರೆ ಪನ್ತೊಲು. ಉಂದೇ ಪೊರ್ತುಡು ಕಂಡನ್ಯನ್ ತಿರ್ತ್ ನೂಕುದು ಪಾಡ್ದಲ್ಗೆ. ಕೃಷ್ಣಾ ಸುದೆಟ್ ನೀರ್ ಎಚ್ಚ ಇಪ್ಪುನೆರ್ದಾವರ ಆಂಜೊವು ಒಂತೆ ದೂರ ಬೊಲ್ಲಗ್ ಪೋತೆ.
ಫೋಟೋ ದೆಪ್ಪುನ ನೆವನೊಡು ಕಂಡನ್ಯನೇ ಸುದೆಕ್ ನೂಕುದಲ್ ಪನ್ಪಿನ ಆರೋಪ ಇಪ್ಪುನ ಬೊಡೆದಿ ಅಲ್ಪನೇ ಉಂತುದು ತೂವೊಂದಿತ್ತಲ್. ಕಂಡನ್ಯಗ್ ಮೀಂದ್ಯೆರೆ ತೆರಿನೆರ್ದಾವರ ಮೀಂದೊಂದು ಒಂಜಿ ಕಲ್ಲ್ದ ಕೈತಡೆ ಪೋದು ಬರ್ತ್ದ್ ಉಂತೊಂದೆ. “ಕಾಪಾಡಿ ಬ್ರೋ, ಅವಳನ್ನ ಹಿಡೀರಿ ಬ್ರೋ, ಯಾರಿಗಾದ್ರೂ ಫೋನ್ ಮಾಡಿ ಬ್ರೋ” ಪನ್ದ್ ಜೋರು ಕಲ್ಕೆರ ಪತ್ತ್ದೆ.
ಆಯನ ಕಲ್ಕಟಿಗೆ ಕೇನ್ದ್ ಮುಟ್ಟಡೆ ಇತ್ತಿನ ಜವನೆರ್ ಪಾರೊಂದು ಬತ್ತ್ದೆರ್. ಆ ಸಾದಿಯೇ ಪೋವೊಂದಿತ್ತಿನ ಬುಲೆರೋ ಗಾಡಿದಕುಲು ಬೊಕ್ಕ ಕೆಬಿಜೆಎನ್ಎಲ್ ಸಿಬ್ಬಂದಿಲು ಸೇರ್ದ್ ಸುಮಾರ್ ರಡ್ಡ್ ಗಂಟೆದಾತ್ ಪೊರ್ತು ಬಂಙ ಬತ್ತ್ದ್ ಆಂಜೊವುನು ಎಂಚಾಂಡಲಾ ಮಿತ್ತ್ ಒಯ್ತ್ ಪಾಡ್ದೆರ್.
ಮಿತ್ತ್ ಬತ್ತ್ದ್ ಒಂತೆ ಪೊರ್ತು ಪಾತೆರೊಗು ಪಾತೆರ ಆತ್ಂಡ್, ಯಾನ್ ನೂಕುದುನೇ ಇಜ್ಜಿ, ಆರೇ ಕಾರ್ ಜಾರ್ದ್ ಬೂರ್ದೆರ್ ಪನ್ದ್ ಬೊಡೆದಿನ ವಾದ. ಕಡೆಕ್ ಕಂಡನೆ ಬೊಡೆದಿ ಒಟ್ಟುಗು ಅವೇ ಬೈಕ್ಡ್ ಅಲ್ಪರ್ದ್ ಪೋತೆರ್.
ಇತ್ತೆ ಈ ಬಗೆತ ವೀಡಿಯೋ ಸಾಮಾಜಿಕ ಬಲೆತ್ತಾನೊಡು ವೈರಲ್ ಆತ್ಂಡ್.