Last updated on August 7th, 2025 at 12:44 pm
ಕುಡ್ಲ, ಆ. 07: ತನ್ನಾಲ್ಮೆದ ದಿನೊತಪಗ 3 ದಿನ ಬೆರಿ ಬೆರಿ ರಜೆ ಇಪ್ಪುನೆರ್ದಾವರ ಬೆಂಗಳೂರುರ್ದ್ ಕುಡ್ಲ, ಒಡಿಪು, ಕಾರವಾರ ಮಾರ್ಗ ಆದ್ ಗೋವಾಗ್ ವಿಶೇಷ ರೈಲ್ ಬಲಿಪೆರ ಉಂಡು. ರೈಲ್ ಸಾದಿಡ್ ಬೇಲೆ ಆವೊಂದುಪ್ಪುನೆರ್ದಾವರ ಕುಡ್ಲ ಬೆಂಗಳೂರ್ ರಾತ್ರೆದ ರೈಲ್ ಇತ್ತೆ ಬಲಿತೊಂದಿಜ್ಜಿ, ಇತ್ತೆ ರಜೆತ ಪೊರ್ತುಡು ಈ ವಿಶೇಷ ರೈಲ್ ಬುಡ್ತಿನ ಜನೊಕ್ಲೇಗ್ ಭಾರೀ ಎಡ್ಡೆ ಆತ್ಂಡ್.
ತನ್ನಾಲ್ಮೆದ ದಿನ ಶುಕ್ರವಾರಗ್ ತಿಕ್ಕುಂಡು, ಶನಿವಾರ ಐತಾರ ವಾರೊದಕೇರಿದ ರಜೆ ಉಂಡು. ಒಟ್ಟು 3 ದಿನ ರಜೆ ತಿಕ್ಕುಂಡು. ಅಪಗ ಪ್ರಯಾಣಿಕೆರೆ ಎಚ್ಚಿಗೆದ ರಷ್ನ್ ಅಂಕೆಡ್ ದೀಯೆರೆ ಭಾರತೀಯ ರೈಲ್ವೆ ಇಲಾಖೆ ಬೆಂಗಳೂರು ಬೊಕ್ಕ ಕಡಲ ಕರೆತ ಭಾಗೊಲೆನ ನಡುಟು ಪೋಯೆರ ಬರ್ಯೆರ ಸಾವ್ಕಾಸ ಆಪಿಲೆಕ ವಿಶೇಷ ರೈಲ್ದ ವ್ಯವಸ್ಥೆ ಮಲ್ದ್ಂಡ್. ಈ ರೈಲ್ ಒಡಿಪು, ಕಾರವಾರ ಆದ್ ಪೋಪುಂಡು ಪನ್ದ್ ರೈಲ್ವೆ ಇಲಾಖೆದ ಅಧಿಕಾರಿಲು ತೆರಿಪಾದೆರ್.
ವಿಶೇಷ ರೈಲ್ದ ಪೊರ್ತುಪಟ್ಟಿ
ರೈಲ್ ನಂಬ್ರ 06541 ಯಶವಂತಪುರ – ಮಡಗಾಂವ್ ಎಕ್ಸ್ಪ್ರೆಸ್ ವಿಶೇಷ ರೈಲ್ ಆಗಸ್ಟ್ 14 ತಾನಿ (ಗುರುವಾರ) ರಾತ್ರೆ 11.55 ಕ್ಕ್ ಯಶವಂತಪುರರ್ದ್ ಪಿದಡ್ದ್ ಆಗಸ್ಟ್ 15 ತಾನಿ ಬಯ್ಯ 6.05ಕ್ ಗೋವಾ ರಾಜ್ಯೊದ ಮಡಗಾಂವ್ ಎತ್ತುಂಡು.
ರೈಲ್ ನಂಬ್ರ 06542 ಮಡಗಾಂವ್ – ಯಶವಂತಪುರ ಎಕ್ಸ್ಪ್ರೆಸ್ ವಿಶೇಷ ರೈಲ್ ಆಗಸ್ಟ್ 17 ತಾನಿ ರಾತ್ರೆ 10.15ಕ್ ಮಡಗಾಂವ್ರ್ದ್ ಪಿದಡ್ದ್, ಆಗಸ್ಟ್ 18 ತಾನಿ ಬಯ್ಯ 4.30ಕ್ಕ್ ಯಶವಂತಪುರಗ್ ಪಿರ ಬರ್ಪುಂಡು.
ಕುಡ್ಲ, ಒಡಿಪುಗು ರೈಲು ಏತ್ ಗಂಟೆಗ್ ಎತ್ತುಂಡು?
ಬೆಂಗಳೂರ್ದ ಯಶವಂತಪುರರ್ದ್ ರಾತ್ರೆ 11.50ಗ್ ಪಿದಡುನ ರೈಲ್ ಕಾಂಡೆ 8.25 ಕ್ ಸುಬ್ರಹ್ಮಣ್ಯ ರೋಡ್, 9.23 ಕ್ ಪುತ್ತೂರು, 11.53 ಕ್ ಸುರತ್ಕಲ್ ಕುಡ್ಲ, ಮಧ್ಯಾಹ್ನ 12.40 ಗ್ ಒಡಿಪು, 1.20 ಗ್ ಕುಂದಾಪುರ, ಬಯ್ಯ 6 ಗಂಟೆಗ್ ಗೋವಾದ ಮಡಗಾಂವ್ಗ್ ಎತ್ತುಂಡು.
19 ಕಡೆಟ್ ಸ್ಟಾಪ್ ಉಂಡು
ಈ ರೈಲ್ ಪೋನಗ ಬನ್ನಗ ಚಿಕ್ಕಬಾಣಾವರ, ಕುಣಿಗಲ್, ಚನ್ನರಾಯಪಟ್ಟಣ, ಹಾಸನ, ಸಕಲೇಶಪುರ, ಸುಬ್ರಹ್ಮಣ್ಯ ರೋಡ್, ಕಬಕಪುತ್ತೂರು, ಬಂಟ್ವಾಳ, ಸುರತ್ಕಲ್, ಒಡಿಪು, ಕುಂದಾಪುರ, ಬೈಂದೂರು, ಭಟ್ಕಳ, ಮುರುಡೇಶ್ವರ, ಹೊನ್ನಾವರ, ಕುಮಟಾ, ಗೋಕರ್ಣ ರೋಡ್, ಅಂಕೋಲಾ ಬೊಕ್ಕ ಕಾರವಾರ ಉಂತಡೆಲೆಡ್ ಉಂತುಡು.
ಈ ರೈಲ್ಡ್ 18 ಬೋಗಿಲು ಇಪ್ಪುವ, ಅವೆಟ್ 12 ಸ್ಲೀಪರ್ ಕ್ಲಾಸ್, 4 ಜನರಲ್ ಸೆಕೆಂಡ್ ಕ್ಲಾಸ್ ಬೊಕ್ಕ 2 ಎಸ್ಎಲ್ಆರ್/ಡಿ ಬೋಗಿಲು.