Last updated on August 7th, 2025 at 07:02 pm
ಕುಡ್ಲ, ಆ. 07: ನಡತಿನ ಕೆಲ ಕೆರ್ತಿನ ಸುದ್ದಿಲೆನೇ ಇಡೀ ದಿನ ಮಲ್ಲೆಟ್ ತೋಜಾದ್ ತೋಜಾದ್ ಕುಡ್ಲ ಪನ್ಡ ಪೆಟ್ಟ್ ಲಡಯಿ, ಕುಡ್ಲ ಪನ್ಡ ಕೋಮುಕೊಲಲ, ಕುಡ್ಲ ಪನ್ಡ ರೌಡಿಲು ಪನ್ಪಿಲೆಕ ಮಲ್ತಿತ್ತಿನಕಲೆನ ಮುಸುಂಟುಗು ಆಕಿಲೆಕ ಕುಡ್ಲ ಇತ್ತೆ ಭಾರತ ದೇಶೊಡೇ ಸುರಕ್ಷಿತ ನಗರೊಲೆನ ಪಟ್ಟಿಡ್ ಕಡೀರ ತಾನ ಪಡೆಯೊಂದುಂಡು.
Numbeo ಪನ್ಪಿನ ಸಂಸ್ಥೆ ಪಾಕ ಡೇಟಾದ ಅಧ್ಯಯನ ಮಲ್ತ್ದ್ ವಿಶ್ವೊದ ಮಲ್ಲ ನಗರೊಲೆಗ್ ಸೇಫ್ಟಿ ರೇಟಿಂಗ್ ಕೊರ್ಪುಂಡು. ಜನೊಕುಲು ಪಗೆಲ್ ರಾತ್ರೆ ರಡ್ಡ್ ಪೊರ್ತುಡುಲಾ ಏತ್ ಪೋಡಿಗೆದಾಂತೆ ಇಪ್ಪುವೆರ್, ಕಲ್ವೆ, ದಗೆ, ಗಾಡಿಲೆನ ಕಲ್ವೆ, ಏರೇರೋ ಬತ್ತ್ದ್ ಆಕುನ, ಸಾರ್ವಜನಿಕ ಜಾಗೆಲೆಡ್ ಕಿರುಕುಳ ಅಂಚೆನೇ ಒರ್ಯನ ರಂಗ್, ಜನಾಂಗೀಯತೆ, ಲಿಂಗ ಅತ್ತ್ಂಡ ಧರ್ಮೊದ ಆಧಾರೊಡು ಮಿತ್ತ್ತಿರ್ತ್ ದೀಪುನ ಇಂಚಿನ ವಿಷಯೊಲೆನ ಬಗೆಟ್ ಸಾರ್ವಜನಿಕ ಗ್ರಯಿಕೆದ ಆಧಾರೊಡು ಈ ರೇಟಿಂಗ್ಸ್ ಕೊರ್ಪುಂಡು.
ಮೈನ್ಸ್ಟ್ರೀಮ್ ಮೀಡಿಯಾಲು ಕಟ್ಟ್ದ್ ಕೊರ್ತಿನ ಕುಡ್ಲದ ಇಮೇಜ್ಗ್ ತದ್ವಿರುದ್ಧವಾದ್ ಈ ಸರ್ವೇದ ಅಂಕಿಅಂಶೊಲು ಉಲ್ಲ. ಅಲ್ಪ ಮುಲ್ಪ ಒಂಜಿ ರಡ್ಡ್ ಕೋಮುಕೊಲಲ, ಕೆರ್ಪುನ ಮಾತಾ ನಡತ್ಂಡಲಾ ತುಳುನಾಡ್ಡ್ ಮಾತಾ ಧರ್ಮದಕುಲು, ಜಾತಿದಕುಲುಲಾ ಒಂಜಪ್ಪೆ ಜೋಕುಲೆಲೆಕ ಉಲ್ಲೆರ್. ಉಂದೆಕ್ ಈ ಸೇಫ್ಟಿ ರೇಟಿಂಗೇ ಸಾಕ್ಷಿ.
74.2 ಸೇಫ್ಟಿ ಇಂಡೆಕ್ಸ್ದ ಒಟ್ಟುಗು ಕುಡ್ಲ ಪಟ್ಟಿಡಿಪ್ಪುನ ನಗರೊಲೆಡ್ ದೇಶೊಡೇ ಸುರಕ್ಷಿತ ನಗರ ಆದಿತ್ತ್ಂಡ ಗುಜರಾತ್ದ ವಡೋದರಾ, ಅಹ್ಮದಾಬಾದ್, ಸೂರತ್ 3, 4, 5 ನೇ ಜಾಗೆಡ್ ಉಲ್ಲ. ವಿಶ್ವೊಡು ನಮ್ಮ ಕುಡ್ಲ 49ನೇ ಸುರಕ್ಷಿತ ನಗರ ಆದುಂಡು.