Last updated on August 8th, 2025 at 06:27 pm
ಬೊಲ್ತೇರ್, ಆ, 08: ಚೆನ್ನೆಮಣೆ ತುಳುನಾಡ್ದ ಒಂಜಿ ವಿಶೇಷವಾಯಿನ ಗೊಬ್ಬು, ತೂಯೆರ ಕಾಲಿ ಅಂಚಿ ಏಲ್ ಇಂಚಿ ಏಲ್ ಇಲ್ಲಲ್, ಅಯಿಟ್ ಚೆನ್ನೆದಕಾಯಿ ಪಾಡೊಂದು ಪೋಪೆರ್ ಪನ್ದ್ ಎನ್ನ್ಂಡಲಾ ಬಾರೀ ಮಂಡೆಕರ್ಚಿ ಮಲ್ತ್ದ್ ಗೊಬ್ಬೊಡಾಪುನ ಗೊಬ್ಬು.
ಉಂದುವೇ ಬರ್ಪಿನ ಐತಾರ, ಆಟಿಡ್ 25 ಪೋಪುನಾನಿ, ಆಗಸ್ಟ್ 10ಕ್ ಬೊಲ್ತೇರ್ದ ಬಿ. ಆರ್. ಅಂಬೇಡ್ಕರ್ ಭವನೊಡು ತುಲುನಾಡ್ ಒಕ್ಕೂಟ ಸಂಘಟನೆದ ಮುತಾಲಿಕೆಡ್ ಕಾಂಡೆ 10 ಗಂಟೆರ್ದ್ ಬಯ್ಯ 4 ಗಂಟೆ ಮುಟ್ಟ ‘ಚೆನ್ನೆಮಣೆ ಗೊಬ್ಬು ಪಂಥೋ’ ನಡಪರೆಗುಂಡು.
ಕಾಂಡೆ 10 ಗಂಟೆಗ್ ತುಲುನಾಡ್ ಒಕ್ಕೂಟದ ಉದಿಪು ಗುರ್ಕಾರ್ಲಾಯಿನ ಶೈಲೇಶ್ ಆರ್ ಜೆ ಮೆರೆನ ಗುರ್ಕಾರ್ಮೆಡ್ ನಡಪುನ ಉದಿಪನದ ಲೇಸ್ಗ್ ಮಲ್ಲಬಿನ್ನೆರಾದ್ ಧಾರ್ಮಿಕ ಮುಖಂಡೆರ್ ಶ್ರೀ ಕಿರಣ್ಚಂದ್ರ ಡಿ ಪುಷ್ಪಗಿರಿ, ಉದ್ಯಮಿಲಾಯಿನ ಅಭಿನಂದನ್ ಹರೀಶ್ ಕುಮಾರ್, ರಿಟೈರ್ಡ್ ಶಿಕ್ಷಕಿ ಶ್ರೀಮತಿ ಜಯಂತಿ ಸುಧಾಕರ್, ಉದಯವಾಣಿ ವರದಿಗಾರೆ ಚೈತ್ರೇಶ್ ಇಳಂತಿಲ, ಕರ್ಮ್ಬಾರ್ ಶಾಲೆ ಅಭಿವೃದ್ಧಿ ಸಮಿತಿದ ಗುರ್ಕಾರ್ಲು ಪುಷ್ಪರಾಜ್ ಎಂ. ಕೆ. ಬರ್ಯೆರ ಉಲ್ಲೆರ್. ಉದಿಪನ ಲೇಸ್ದ ಸುರುತ ಪಾತೆರೊನು ತುಳುನಾಡ್ ಒಕ್ಕೂಟೊದ ಗುರ್ಕಾರ್ಲು ಶೇಖರ್ ಗೌಂಡತಿಗೆ ಪಾತೆರುವೆರ್.
ಬಯ್ಯ 3:30ರ್ದ್ ತುಲುನಾಡ್ ಒಕ್ಕೂಟ ಬೊಲ್ತೇರ್ ತಾಲೂಕ್ ಕೂಟದ ಗುರ್ಕಾರ್ಲು ಬೈರೊಟ್ಟುರಾಜೇಶ್ ಕುಲಾಲ್ರೆನ ಗುರ್ಕಾರ್ಮೆಡ್ ನಡಪುನ ಮುಗಿತಲೊದ ಲೇಸ್ಗ್ ಮಲ್ಲ ಬಿನ್ನೆರಾದ್ ಬೊಲ್ತೇರ್ ಸ್ಕೌಟ್ಸ್ ಗೈಡ್ಸ್ದ ಕಾರ್ಯಂತೆರ್, ಶಿಕ್ಷಕಿ ಶ್ರೀಮತಿ ಪ್ರಮೀಳ, ಯಕ್ಷಗಾನ ಪ್ರಸಂಗಕರ್ತೆರ್ ಬೊಕ್ಕ ಸಂಘಟಕೆರ್ ನಿತೀನ್ ಕುಮಾರ್ ತೆಂಕಕಾರಂದೂರ್, ಬೊಲ್ತೇರ್ ಸುದ್ದಿ ಬಿಡುಗಡೆದ ಪೆರಿಯ ವರದಿಗಾರೆರ್ ಜಾರಪ್ಪ ಪೂಜಾರಿ ಬೆಲಾಲ್, ಬಾಲಕೃಷ್ಣ ಶೆಟ್ಟಿ ಸವಣಾಲ್, ಎಂ.ಆರ್ ಪ್ರಸನ್ನ ಬರ್ಯೆರಗುಲ್ಲೆರ್.
ತುಲುನಾಡ್ ಒಕ್ಕೂಟ ಬೊಲ್ತೇರ್ ತಾಲೂಕ್ ಕೂಟದ ಕಾರ್ಯಂತೆರ್ ರಾಜು ಬಿ. ಎಚ್ ಮೆರೆಗ್ ಮಾನಾದಿಗೆ ನಡಪರೆಗುಂಡು.
ಈ ಲೇಸ್ಗ್ ಬತ್ತ್ದ್, ಪಂತೊಡು ಪಾಲ್ ಪಡೆದ್ ಲೇಸ್ನ್ ಗೆಂದಾವೊಡು ಪನ್ದ್ ತುಲುನಾಡ್ ಒಕ್ಕೂಟದ ಸ್ಥಾಪಕಾಧ್ಯಕ್ಷೆರ್ ಶೈಲೇಶ್ ಆರ್. ಜೆ. ಬಿನ್ನೈತೊಂದೆರ್.