ಕುಡ್ಲ: ಕಲ್ವ ಮಾಲ್ ಗಂಗಸರ ಮಲ್ಪುನ ಅಡ್ಡೆಗ್ ಅಬಕಾರಿ ಅಧಿಕಾರಿಲೆನ ದಾಳಿ: ಒರಿ ಆರೋಪಿ ಕೈದ್

Last updated on September 24th, 2025 at 10:59 am

ಕುಡ್ಲ, ಸೆ. 23: ಪೇಂಟೆದ ಕದ್ರಿ ಲೋಬೊ ಲೇನ್‌‌ಡ್ ಕಲ್ವ ಮಾಲ್ ಮಲ್ಪುನ ಅಡ್ಡೆಗ್ ಅಬಕಾರಿ ಅಧಿಕಾರಿಲು ದಾಳಿ ಮಲ್ತ್‌ದ್ ಸುಮಾರ್ 5,57,690 ರೂ. ಮೌಲ್ಯೊದ ಸೊತ್ತುಲೆನ್ ವಶೊಕು ಗೆತೊಂದೆರ್.

ಮೈಕಲ್ ಬ್ಲೈಸ್ ಮಿನೇಜಸ್ ಪನ್ಪಿನಾಯನ ಇಲ್ಲಡ್ ಕಲ್ವ ಮಾಲ್ ಮಲ್ತೊಂದುಲ್ಲೆರ್ ಪನ್ಪಿ ಪತ್ತ ಒಲವು ಇತ್ತ್‌ದ್, ಅಬಕಾರಿ ಅಧಿಕಾರಿಲು ದಾಳಿ ಮಲ್ತ್‌ದೆರ್. ಈ ಪೊರ್ತುಡು ಇಲ್ಲಡಿತ್ತಿನ ಡುಪ್ಲಿಕೇಟ್ ವೈನ್ – 238.500 ಲೀಟರ್, ವೈನ್ ಮಲ್ಪುನವು – 1,500 ಲೀಟರ್, ಗಂಗಸರ – 3.180 ಲೀಟರ್ , ಕಲ್ವ ವೈನ್ ಮಲ್ಪುನ ಸೊತ್ತುಲೆನ್ ವಶೊಕು ಗೆತೊಂದು ಆರೋಪಿನ್ ಕೈದ್ ಮಲ್ತ್‌ದೆರ್.

ಕುಡ್ಲ ವಿಭಾಗೊದ ಅಬಕಾರಿ ಜಂಟಿ ಆಯುಕ್ತೆರೆ ನಿರ್ದೇಶನೊದ ಪ್ರಕಾರ , ದ.ಕ.ಜಿಲ್ಲೆ ಅಬಕಾರಿ ಉಪ ಆಯುಕ್ತೆರೆ ಮಾರ್ಗದರ್ಶನೊದ ಪ್ರಕಾರ, ಅಬಕಾರಿ ಉಪ ಅಧೀಕ್ಷಕೆರ್ ಕುಡ್ಲ ಉಪ ವಿಭಾಗ-1, ಬೊಕ್ಕ ಕುಡ್ಲ, ಅಬಕಾರಿ ನಿರೀಕ್ಷಕೆರ್, ತಲಪಾಡಿ ತನಿಖಾ ಸ್ಟೇಶನ್‌ದ ಅಬಕಾರಿ ನಿರೀಕ್ಷಕೆರ್ ಬೊಕ್ಕ ಮಂಗಳೂರು ತೆನ್ಕಾಯಿ ವಲಯೊ -1 ತ ಅಬಕಾರಿ ನಿರೀಕ್ಷಕೆರೆ ಮುತಾಲಿಕೆಡ್ ವಲಯೊದ ಅಬಕಾರಿ ಉಪ ನಿರೀಕ್ಷಕೆರೆ ಸಿಬ್ಬಂದಿಲೆನ ಒಟ್ಟುಗು ಸೆ.22 ತಾನಿ ದಾಳಿ ನಡತ್ಂಡ್.

ಇತ್ತೆ ಆರೋಪಿನ್ ಕೈದ್ ಮಲ್ತ್‌ದ್, ನ್ಯಾಯಂತಡೆದ ಎದುರು ಲೆತೊಂದು ಪೋತೆರ್. ಆರೋಪಿನ ಮಿತ್ತ್ ಕರ್ನಾಟಕ ಅಬಕಾರಿ ಕಾಯ್ದೆ 1965ರ ಕಲಂ 13(1)(a), 13(1)(f), 14,15,32(1),32(2),(e), 34,38(A) ದ ಪ್ರಕಾರ ಶಿಕ್ಷಾರ್ಹ ಅಪರಾಧ ಆದುಪ್ಪುನೆರ್ದಾವರ ಮಂಗಳೂರು ತೆನ್ಕಾಯಿ ವಲಯ -1 ಕಚೇರಿದ ಅಬಕಾರಿ ಉಪ ನಿರೀಕ್ಷಕೆರಾಯಿನ ಹರೀಶ್ ಪಿ. ಮೇರ್ ಪ್ರಕರಣ ದಾಕಲ್ತೊಂದೆರ್.