Last updated on September 2nd, 2025 at 09:04 am
ಬೆರ್ಮಾವರ, ಸೆ. 02: ಅಪ್ಪೆ ಒರ್ತಿ ತನ್ನ ಒಂಜರೆ ವರ್ಸ ಪ್ರಾಯೊದ ಬಾಲೆಗ್ ಉರ್ಲು ಕೈತ್ದ್ ಬೊಕ್ಕ ತಾನ್ಲಾ ಬಲ್ಲ್ಗೆತೊಂದಿನ ನಡಕೆ ಬೆರ್ಮಾವರ ಪೊಲೀಸ್ ಸ್ಟೇಶನ್ ಸೀಮೆದ ಕುಂಜಾಲ್ ಪೇರಂಜೆ ಕ್ರಾಸ್ ದಲ್ಪ ಕೋಡೆ, ಸೋಮಾರ ನಡತ್ದ್ಂಡ್.
ತೀರ್ದಿನಾರೆನ್ ಸುಷ್ಮಿತಾ (23) ಬೊಕ್ಕ ಬಾಲೆ ಶ್ರೇಷ್ಠ (1.6ವ) ಪನ್ದ್ ಗುರ್ತ ಪತ್ತ್ದೆರ್. ಜಾಗೆಗ್ ಬೆರ್ಮಾವರ ಪೊಲೀಸೆರ್ ಬತ್ತ್ದ್ ಪರಿಶೀಲನೆ ಮಲ್ತ್ದೆರ್. ಕಂಡನೆ ಸುಭಾಷ್ ಬೇಲೆದ ಮಿತ್ತ್ ಬೆಂಗಳೂರ್ಗ್ ಪೋದಿತ್ತ್ದ್ ಇಲ್ಲಡ್ ಏರ್ಲಾ ಇಜ್ಜಂದೆ ಇಪ್ಪುನಗ ಇಂಚ ಮಲ್ತೊಂದೆರ್. ತನ್ನ ಸಾವುಗು ತಾನೇ ನೆವನ ಪನ್ದ್ ಡೆತ್ ನೋಟ್ ಬರೆದ್ ದೀದಿತ್ತ್ದ್, ಅವೆನ್ ಪೊಲೀಸೆರ್ ವಶೊಕು ಗೆತೊಂದೆರ್. ಜಾಗೆಗ್ ಒಡಿಪು ಪೊಲೀಸ್ ವರಿಷ್ಠಾಧಿಕಾರಿ ಹರಿರಾಮ್ ಶಂಕರ್ ಬತ್ತ್ದ್ ಪರಿಶೀಲನೆ ಮಲ್ತ್ದೆರ್.
2009ಟ್ ಬರಿತಿಲ್ಲದ ವಿನ್ಸೆಂಟ್ ಪಾಯಸ್ ಪನ್ಪಿನಾರೆನ ಮಿತ್ತ್ ಸುಷ್ಮಿತಾನ ಕಂಡನೆ ಸುಭಾಷ್ ಬೊಕ್ಕ ಇಲ್ಲದಕುಲು ಹಲ್ಲೆ ಮಲ್ದಿನ ಬಗೆಟ್ ಪ್ರಕರಣ ದಾಕಲಾದಿತ್ತ್ಂಡ್. ಅವೆರ್ದ್ ಬೊಕ್ಕ ವಿಚಾರಣೆ ನಡತ್ದ್ 2012 ಟ್ ಜಿಲ್ಲಾ ನ್ಯಾಯಾಲಯ ಸುಭಾಷ್, ಆರೆನ ಅಪ್ಪೆ ಬೊಕ್ಕ ಮೆಗ್ಯಗ್ 12 ವರ್ಸೊದ ಗರಿಷ್ಠ ಶಿಕ್ಷೆ ಕೊರ್ದಿತ್ತ್ಂಡ್. ಸುಭಾಷ್ ಬೊಕ್ಕ ಇಲ್ಲದಕುಲು ಜಿಲ್ಲಾ ಕೋರ್ಟ್ ಕೊರ್ತಿನ ಶಿಕ್ಷೆದ ತೀರ್ಪುನು ಹೈಕೋರ್ಟ್ಡ್ ಪ್ರಶ್ನೆ ಮಲ್ತಿತ್ತೆರ್. ಸುಮಾರ್ 12 ವರ್ಸೊದ ವಾದ- ಪ್ರತಿವಾದ ನಡತಿ ಬೊಕ್ಕ ಕರಿನ ಜುಲೈ ತಿಂಗೊಲುಡು ಜಿಲ್ಲಾ ನ್ಯಾಯಂತಡೆದ ತೀರ್ಪುನು ಹೈಕೋರ್ಟ್ ದೆರ್ತ್ ಪತ್ತ್ಂಡ್. ಅಂಚಾದ್ ಅಪ್ಪೆ, ಜೋಕುಲು 12 ವರ್ಸಕರ್ಪಿಲ್ಲ ಶಿಕ್ಷೆ ತಿನರೆ ಪೋಪಿನ ನಿಗಂಟ್ ಆದಿತ್ತ್ಂಡ್.
ಉಂದೇ ವಿಚಾರೊಡು ವಕೀಲೆರೆಡ ಪಾತೆರ್ಯೆರ ಸುಭಾಷ್ ಬೆಂಗಳೂರ್ಗ್ ಪೋದಿತ್ತೆರ್. ಆತೇ ಅತ್ತಂದೆ, ಶಿಕ್ಷೆದ ವಿಚಾರೊಡು ಇಲ್ಲದಕುಲು ಬಾರೀ ಮಂಡೆಬೆಚ್ಚಡ್ ಇತ್ತೆರ್. ಕಂಡನ್ಯಗ್ ಶಿಕ್ಷೆ ಘೋಷಣೆ ಆತಿನೆನ್ ತೆರಿದ್ ಸುಷ್ಮಿತಾ ಬಾರೀ ಬೆಸರ್ಡ್ ಇತ್ತೆರ್ ಪನ್ದ್ ಪನೊಂದುಲ್ಲೆರ್.