Last updated on November 14th, 2025 at 09:53 am
ಕಾರ್ಲ, ನ. 14: ಒಡಿಪು ಜಿಲ್ಲೆದ ಕಾರ್ಲ ತಾಲೂಕ್ದ ದುರ್ಗಾ ಗ್ರಾಮೊದ ತೆಳ್ಳಾರ್ದ ಒಂಜಿ ಇಲ್ಲಡ್ 17 ಕೆಜಿ ಉರೆತ ಮಾಸ ತಿಕ್ಕ್ದಿನ ನಡಕೆ ಬೊಲ್ಪುಗು ಬೈದ್ಂಡ್. ಅಕ್ರಮ ಗೋ ಹತ್ಯೆ ಪ್ರಕರಣೊದ ಒಲವುದ ಆಧಾರೊಡು ಗ್ರಾಮಾಂತರ ಸ್ಟೇಷನ್ ಪೊಲೀಸೆರ್ ಮಲ್ತಿನ ದಾಳಿಡ್ ಉರೆತ ಮಾಸ ತಿಕ್ಕ್ದ್ಂಡ್.
ಆರೋಪಿಲಾಯಿನ ಸಾದತ್ ಬೊಕ್ಕ ಶಫತ್ ಪನ್ಪಿನ ಇರ್ವೆರ್ ಅಲ್ಪರ್ದ್ ಪದ್ರಾಡಾದಿತ್ತ್ದ್, ಇಲ್ಲಡ್ ಇತ್ತಿನ ಶಕೂರ್ (48) ನ್ ಪೊಲೀಸೆರ್ ಕೈದ್ ಮಲ್ತ್ದೆರ್. ಪ್ರಾಥಮಿಕ ಜಡ್ತೆಡ್ ಮೊಕುಲು ಪೆತ್ತ ಕನ್ಡುನ ಅಂಚೆನೇ ಅಕ್ರಮವಾದ್ ಕೆರ್ಪುನ ಪ್ರಕರಣೊಲೆಡ್ ಪಾಲ್ಪಡೆತೆರ್ ಪನ್ದ್ ತೆರಿದ್ ಬೈದ್ಂಡ್ ಪನ್ದ್ ಪೊಲೀಸ್ ಮೂಲೊಲು ತೆರಿಪಾದ.
ಆರೋಪಿಲೆನ್ ಪತ್ತೆರೆ ಪೊಲೀಸೆರ್ ಬೇಪು ಪಾಡ್ದೆರ್. ನಡಕೆದ ಬಗೆಟ್ ವನ್ಯಜೀವಿ ಸಂರಕ್ಷಣಾ ಕಾಯ್ದೆದಡಿಟ್ ಪ್ರಕರಣ ದಾಕಲಾದಿತ್ತ್ದ್, ಅರಣ್ಯ ಇಲಾಖೆಗ್ ಈ ಬಗೆಟ್ ಒಲವು ಕೊರ್ತೆರ್. ನನದ ಜಡ್ತೆನ್ ಅರಣ್ಯ ಇಲಾಖೆ ಮಲ್ಪುಂಡು ಪನ್ದ್ ಪೊಲೀಸ್ ಅಧಿಕಾರಿಲು ತೆರಿಪಾದೆರ್.